Moskwa (dpa/SN). Ruski prezident Wladimir Putin chce dobyćerjej prezidentskich wólbow w USA hakle po wuličenju wšitkich hłosowanskich lisćikow gratulować. „Mamy za prawe, hač k oficialnemu wozjewjenju wólbneho wuslědka čakać­“, zdźěli rěčnik Putina Dmitrij Pjeskow­ powěsćerni Interfax w Moskwje. Zdobom wón potwjerdźi, zo je Putin k zhromadnemu dźěłu z kóždym prezidentom zwólniwy a zo waži sej wólbny rozsud wobydlerjow USA.

Po słowach Pjeskowa so Ruska nadźija, zo so přichodnemu prezidentej USA poradźi dialog mjez krajomaj wožiwić a mjezsobne poćahi normalizować. Wosebje wažne su prašenja mjezynarodneje wěstoty a strategiskeje stability, a to za wšón swět. Při tym měło so tež zaso wo jadrowym wotbrónjenju rěčeć.

Berlin (dpa/SN). Po prěnim wuspěchu předewzaća Biontech z Mainza při wu­wiću seruma přećiwo koronawirusej chcyła zwjazkowa ministerka za slě­dźenje Anja Karliczek (CDU) produkciju we wulkim stilu na nohi stajić. „Nětko budźe rozsudne, šćěpiwo ručež móžno we wulkich mnóstwach produkować“, rjekny minis­terka powěsćerni dpa w Berlinje. Powěsć předewzaćow Biontech a Pfi­zer je přičina k optimizmej. Wobě běštej wčera zdźěliłoj, zo skići jeju serum wjace hač 90procentowski škit před ko­ro­nawirusom. Přiwšěm njejsu hišće wšitke přepytowanja wotzamknjene. Po słowach Anje Karliczek dźe mjez druhim wo znjesliwosć a skutkownosć seruma we wšelakich starobnych skupinach. To chcedźa spěšnje zrjadować.

Baku/Jerjewan (dpa/SN). Po najnowšim dojednanju, zakónčić wšitke wojowanja wo konfliktnu kónčinu Hórski Karabach, su ruske měrowe jednotki swoju misiju zahajili. Prěnje štyri lětadła typa IL-76 su mi­njenu nóc wojakow a tankowe jězdźi­dła do krizoweje kónčiny přiwjezli, kaž ruske zakitowanske ministerstwo w Moskwje informuje. Přiměr płaći wot dźensnišeho ranja. Zrěčenje wo kóncu wojowanjow běštaj prezidentaj Azerbajdźana a armenski ministerski prezident po posrědkowanju ruskeho prezidenta Wladimira Putina podpisałoj. Wone předwidźi, zasadźić nimale 2 000 ruskich měrowych wojakow a wujednać teritorialne kompromisy.

W krizowej kónčinje bě połoženje dźensa rano měrne. Wo wojowanjach ni­čo­ znate njebě. W armenskej stolicy Jerje­wanje je porno tomu k namócnosćam dóšło. Demonstranća wobsadźichu twarjenje knježerstwa a parlamenta a mjenowachu ministerskeho prezidenta Nikola Pašinjana „přeradnika“. Tón přizna, zo je měrowe dojednanje „bolostne“.

Trjebinska gmejna chce gremij komunalnych zajimow wopušćić

Trjebin (AK/SN). Gmejna Trjebin je přesłapjena wot Łužiskeho kruha (Lausitzrunde). Wona mjeztym rozmysluje gremij komunalnych zajimow wopušćić, kotryž­ zastupuje jako hłós Łužicy wjace hač milion wobydlerjow 20 wokrjesow, městow a komunow. „W decembru chcu k tomu naćisk wobzamknjenja gmejnskej radźe předpołožić“, je wjesnjanosta Waldemar Locke (CDU) minjeny tydźeń na posedźenju Trjebinskich radźićelow připowědźił.