To a tamne (26.03.18)
Swój kwas skomdźił je muž ze Schwerina. Njewjesta bě 35lětneho nawoženju policiji jako zhubjeneho přizjewiła, dokelž njebě na jeju wěrowanje přišoł. Kónc tydźenja do toho bě hišće w Sakskej porjadnje z přećelemi swjećił a so tam z časom nježenjenca rozžohnował. Tak je policija tež tam za nim pytała, ale podarmo. Nětko so njewjesta znowa přizjewi. Kaž so wukopa, je muž w psychiatriskej chorowni. Kak bě so do njeje dóstał, wšak wostanje potajnstwo.
Z 48 tonow ćežkim čerwjenym kranom su paduši dźens tydźenja w Stuttgarće twochnyli. Mjeztym su swědcy napadne jězdźidło sta kilometrow dale blisko braniborskeho Herzberga widźeli. Dotal njeje policija skućićelow hišće lepiła. Hdyž skónčnje tak daloko budźe, drje k přesćěhanju njedóńdźe. Wšako kran spěšnišo hač 55 kilometrow na hodźinu njejědźe.
70 lět serbski zakoń – z mało słowami tak skutkownje spisany
Drježdźany (SN/at). Što by było, njeby-li Sakski krajny sejm dźensa před 70 lětami jednohłósnje Zakoń wo zachowanju prawow serbskeje ludnosće wobzamknył? Prašenje ćehnješe so wčera kaž čerwjena nitka přez zarjadowanje, z kotrymž stej frakcija Lěwicy w sakskim parlamenće a Domowina přehladku „Serbja – Kultura a prawo w sebjedorozumjenju“ składnostnje jubileja serbskeho zakonja wotewrěłoj.
Nětko tež w Brüssselu
Brüssel (SN/JaW). Federalistiska unija europskich narodnych mjeńšin (FUEN) ma wotnětka tež w Brüsselu stajne zastupnistwo. Kaž dźensa informuja, su běrow předwčerawšim swjatočnje wotewrěli. Mjez hosćimi běchu mjez druhim čłonojo parlamenta, zastupowacy madźarsku mjeńšinu w Rumunskej. Zaměstnjeny je nowy běrow w twarjenju Němskorěčneho zhromadźenstwa w Belgiskej, kotrež FUEN trěbne rumnosće přewostaja. Hosćićel a zastupnik wuchodneje Belgiskeje Yves Kreins zwurazni swoje wjeselo, zo wužiwaja rumnosće za dobry skutk. „Byrnjež naše zhromadźenstwo jeničce 57 000 čłonow měło, myslu sej, zo smy ze zbožom žohnowana mjeńšina w Europje. Smy sylne zhromadźenstwo. Chcemy, zo maja wšitke awtochtone mjeńšiny Europy prawo, swoju kulturu zachować směć. Tuž nas wosebje zwjesela, zo přewostajamy rumnosće FUEN a jeje naležnosćam, w kotrychž je pućrubar.“
Nimo wotewrjenja noweho stejnišća swjećachu w Brüsselu tež wuspěch wobydlerskeje iniciatiwy FUEN Minority SafePack, kotraž je mjeztym we wosmym staće trěbnu ličbu podpismow docpěła.
Knježerstwo dale bjez nawody
Barcelona (dpa/SN). Wulke separatistiske strony w Katalonskej zwrěšćichu ze swojim pospytom, na chwatnym posedźenju Jordija Turulla za regionalneho prezidenta španiskeho regiona wuzwolić. Při prěnim wothłosowanju wčera wječor njeje Turull trěbnu wjetšinu hłosow dóstał. Hakle 48 hodźin po tym je dalše wothłosowanje móžne. W tym času pak móhł 51lětny hižo w jastwje sedźeć. Měješe dźensa termin před sudnistwom. Katalanske regionalne knježerstwo tuž přeco hišće žanoho prezidenta nima.
Pósłanc EU wotwołany
Brüssel (dpa/SN). Nadpada z jědom na bywšeho agenta Sergeja Skripala we Wulkej Britaniskej dla je Europska unija swojeho pósłanca z Moskwy za konsultacije do Brüssela wotwołała. Tole wobkrući dźensa rano nižozemski ministerski prezident Mark Rutte po wuradźowanju wjerška EU. Šefojo knježerstwow su w zhromadnej zdźělence swój hłós přećiwo Ruskej přiwótřili. Tak su sej přezjedni, zo je Ruska po wšěm zdaću za nadpad zamołwita. Hinašeho plawsibelneho rozjasnjenja po jich słowach njeje.
AfD zhubja hłosy wolerjow
Na mjeztym 8. akciskim a dožiwjenskim dnju we wobłuku wčerawšeho ...
Z toho móžeš wuknyć
Sym podpisał, ...
... a to jako jedyn z prěnich na lońšim kongresu Federalistiskeje unije europskich narodnych mjeńšin w rumunskim měsće Cluj-Napoca. Mam wobydlersku iniciatiwu Minority SafePack za wažne znamjo mjezsobneje solidarity wšitkich wobydlerjow Europy w naležnosći, kotraž mnohich potrjechi. Woni pak su sami po ličbje přesłabi, zo bychu na kontinenće słyšani byli. Solidarita je wažny element, wažna hódnota za zhromadne žiwjenje modernych ludźi. Wšědnje dožiwjam a stajnje znowa widźu, kak so mjez sobu wotcuzbnjamy. Z podpismom wuprajam so přećiwo tendency wotcuzbnjenja a za solidaritu.
Podpisajće tež wy na internetnej platformje pod www.minority-safepack.eu, pósćelće nam wobraz wo was a přidajće cyle skrótka w dwěmaj sadomaj, što je was pohnuło, wobydlersku iniciatiwu Federalistiskeje unije europskich narodnych mjeńšin Minority SafePack za škit narodnych mjeńšin w Europje podpěrać. Waš wobraz a tekst pósćelće k wozjewjenju redakciji Serbskich Nowin najlěpje na e-mailowu adresu: .
To a tamne (23.03.18)
Wopyt dwaj metraj dołheho warana měješe thailandski wuměnkar w swojej kupjeli. Hač bě so reptil přez kanalizaciju abo prosće přez durje dóstał, njeje jasne. Znajmjeńša tón tam cyle woměrje ležeše. Ale tež 81lětny muž wosta měrny a jeho fotografowaše, prjedy hač durje kupjele zaso začini. Na to zawoła wón fachowcow, kotřiž warana popadnychu a w přirodźe wusadźichu.
Pornografiski film na elektroniskej reklamowej tafli při wulkim křižowanišću w Manili je skandal na přewažnje katolskich Filipinach wuskutkował. Kaž dyrbješe měšćanostka Makati Abigail Binay přiznać, běchu so hackerojo do systema reklamoweje tafle zadobyli a film wusyłali. Po poł minuće drje taflu spěšnje hasnychu, přiwšěm su mnozy pasanća porik při seksu fotografowali abo natočili a to w socialnych medijach wozjewili.
Nowe knježerstwo w Słowakskej
Bratislava (SŽ/K). Prezident Andrej Kiska je dźensa Petera Pellegrinija za noweho słowakskeho premiera pomjenował. Naslědnje přiwza wón wot Pellegrinija skorigowany namjet zestawy přichodneho kabineta. Wutoru předpołoženu lisćinu ministrow Kiska njebě akceptował, wotpokazujo noweho nutřkowneho ministra, za kotrehož bě Pellegrini namjetował Jozefa Ráža. Za te zastojnstwo je nětko předwidźany dotalny minister za strowotnistwo, njestronjan Tomáš Drucker. Wjetšina tamnych ministrow je hižo knježerstwu premiera Fica přisłušała.
Šansy na wuwzaća móžne
Wahington (dpa/SN). Kraje Europskeje unije smědźa so na wuwzaća dwělomnych chłostanskich cłow USA za wukrajny wocl a aluminij nadźijeć. Społnomócnjeny USA za wikowanje Robert Lighthizer poda w tym nastupanju pozitiwne signale. Tež zwjazkowy hospodarski minister Peter Altmaier (CDU) ma nadźiju. Wuwzaća měli tak dołho płaćić, doniž njejsu wikowanske rozmołwy zakónčene. Hižo jutře mějachu nowe cła płaćić.
Na kandidata so dojednali
