VVO a ZVONso zjednoćitej
Coswig/Drježdźany (SN). Zwjazkowa zhromadźizna wobchadneho zwjazka Hornje Łobjo (VVO) je wčera w Coswigu planowane zjednoćenje z wobchadnym zwjazkom Hornja Łužica-Delnja Šleska (ZVON) schwaliła. ZVON běše fuziji hižo lětsa w juniju přihłosował. Spočatk januara 2026 wutworitej wobchadnej zwjazkaj nowy zaměrowy wobchadny zwjazk Wuchodna Sakska (ZVVO). Přihłosowanje krajneje direkcije Sakskeje je hišće trěbne.
Nowy zwjazk ma wokrjesy Budyšin, Zhorjelc, Mišno a Sakska Šwica/Wuchodne Rudne horiny kaž tež krajnu stolicu Drježdźany a město Zhorjelc zastarać. Na jeho prěnjej zwjazkowej zhromadźiznje, kotraž ma so w januaru wotměć, chcedźa zamołwići wo nowym centralnym tarifje rozsudźić. Zaměr je jednotny tiket, z kotrymž móža sobujěducy w přichodźe po wšej wuchodnej Sakskej jězdźić. Najprjedy pak tuchwilne tarify VVO a ZVON dale płaća. Wob lěto matej wobchadnej zwjazkaj dohromady 225 milionow sobujěducych. „Wšitkim tutym budźe wutworjenje noweho zwjazka z wužitkom“, wuzběhny sakska ministerka za infrastrukturu Regina Kraushaar (CDU).
„KI-Ära“ słowo lěta
Wiesbaden (dpa/SN). Wuraz „KI-Ära“ je słowo lěta 2025. Tole je Towaršnosć za němsku rěč dźensa we Wiesbadenje rozsudźiła. Kaž jury zdźěli, symbolizuje přiběracy wliw kumštneje inteligency (KI) „epochalne wuwiće, přirunujo z industrijnej rewoluciju“. Na druhe městno wuzwolichu fachowcy wuraz „deal“, jedne z najlubšich słowow prezidenta USA Donalda Trumpa. Zapřijeće „wurjadne zamóženje“ zwjazkoweho knježerstwa wobsadźi 4. městno.
Wo renće wothłosowali
Berlin (dpa/SN). Zwjazkowy sejm je dźensa wo rentowym pakeće knježerstwoweje koalicije CDU/CSU a SPD rozsudźił. Hač do kónca njebě jasne, hač so zwjazkowe knježerstwo ze swojim naćiskom přesadźi. Wjacori młodźi zapósłancy z rjadow CDU a CSU so spjećowachu, dokelž zakoń po jich měnjenju zajimy přichodnych generacijow njewobkedźbuje. Wuslědk wothłosowanja hač do kónca redakciskeho časa njepředležeše.
Dalši drogowy čołm zničili
Z tradicionalnej ceremoniju su w grjekskej stolicy Athenje wčera ...
Z koaliciju njespokojom
Bojkotuja ESC Israela dla
Genf (dpa/SN). Po měsacy trajacej zwadźe je nětko rozsudźene, zo smě so Israel klětu na hudźbnym wubědźowanju Eurovision Song Contest 2026 we Wienje wobdźělić, Europska rozhłosowa unija (EBU) zdźěli.
Po rozsudźe su wjacore wobdźělene sćelaki ze Španiskeje, Irskeje a Nižozemskeje připowědźili, zo zarjadowanje bojkotuja. Španiski sćelak RTVE je sobu najwjetši pjenjezydawar zarjadowanja. Rozhłosownicy wumjetuja Israelej złóstnistwa přećiwo palestinskej ciwilnej ludnosći w Gazaskim pasmje. Zastupnicy EBU a awstriskeho ORF su podarmo spytali, bojkotej zadźěwać. Woni argumentowachu, zo jedna so wo ryzy hudźbne a nic politiske zarjadowanje.
Změnili su tež prawidła wothłosowanja na dobro jury, zo njemóhli sej wuměłcy, kaž israelska spěwarka Yuval Raphael lětsa w Baselu, ekstremnje wjele hłosow z publikuma organizować.
Putin chce dalše dźěle Ukrainy
Moskwa/New-Delhi (dpa/SN). Mjeztym zo USA a Ukraina dale wo zasadnych dypkach měroweho plana za Ukrainu wuradźuja, je ruski prezident Wladimir Putin z tym hrozył, dalše kónčiny na juhu Ukrainy wojersce zdobyć. Donbass padnje runje tak kaž regiony na juhu kraja „na kóždy pad do rukow Ruskeje“, rjekny Putin telewizijnemu sćelakej India Today na započatku swojeho dwaj dnjej trajaceho wopyta w Indiskej. Putin bě wčera wječor do New Delhija dolećał.
W rozmołwje z indiskimi nowinarjemi wupraji so Putin tež k rozmołwam z wurjadnym pósłancom USA Steve Witkoffom. Putin chwaleše prezidenta Donalda Trumpa: „Njeje lochko, zo so konfliktnej stronje dojednatej.“
Steinmeier wopory wójny počesćił
Coventry (dpa/SN). Zwjazkowy prezident Frank-Walter Steinmeier je dźensa w jendźelskim měsće Coventry wopory němskich bombowych nalětow za čas Druheje swětoweje wójny wopominał. Němske bombowcy běchu njedaloko Birminghama ležace industrijne město wjackróć bombardowali. Při tym sta ludźi morichu a wulke dźěle města zničichu.
Zhromadnje z Edwardom, wójwodu Kenta, je Steinmeier we wobłuku swojeho statneho wopyta w ruinje tehdy zničeneje katedrale města wěnc połožił. Edward, kuzenk zemrěteje kralowny Elizabeth, wobdźěli so wospjet na wopominanskich zarjadowanjach we wobłuku wujednanja mjez Wulkej Britaniskej a Němskej. Ze swojimi 90 lětami je wón mjeztym najstarši čłon kralowskeje swójby. Lěta 2015 běchu jemu za jeho angažement Drježdźanske měrowe myto spožčili. Dobry poměr mjez krajomaj je Steinmeier wčera w Londonskim parlamenće jako „wulki dar“ wosebje wuzběhnył.
Dohodowna atmosfera w Błótach
To a tamne (05.12.25)
Na wšěch 59 kuskow butry je policija we wačoku třoch paduchow w Podstupimje namakała. Trójka bě nimale 15 kilogramow butry do wačoka tyknyła a so z kupnicy zminyła. Kedźbliwy kupc bě tole wobkedźbował. Přiwołana policija skućićelow njedaloko kupnicy zaja. Mužojo su policiji druhich padustwow dla derje znaći. Nětko ma sudnik rozsudźić, hač dyrbja do jastwa. Što cwólba z telko butru chcyše, njeje znate.
Ćeknjenu kruwu su po wjacorych měsacach błudźenja na brjoze jězora w hornjej Bayerskej popadnyli. Arielle, kaž ju pomocnicy mjenuja, je mjeztym na statoku organizacije za škit zwěrjatow. Kruwa bě před poł lětom z pastwy ćeknyła a žiworješe na kromje jězora. Wšitke pospyty, skoćo popadnyć, běchu zwrěšćili. Tuž ju nětko z třělbu pohłušichu. Zamołwići so bojachu, zo wona zymu njepřetraje.
Nowy wulkopósłanc Němskeje Serbski seminar wopytał
Dr. Peter Reuss, kotryž je wot spočatka winowca wulkopósłanc Němskeje w Praze, je wčera Serbski seminar wopytał, zo by so wo stawiznach Serbow a jich stykach z Čechami informował.
„Dołhož Sakski kontaktny běrow w Praze eksistuje, je to prěni raz, zo je wulkopósłanc sam přeće a zajim jón wopytać zwuraznił“, rjekny nawodnica běrowa Josefina Ofner. Studowany stawiznar Reuss, kiž bě so 1964 w Freiburgu w Breisgauwje narodźił, bě dotal mjez druhim wulkopósłanc w Turkowskej a zastupowaše Němsku pola UNESCO w Parisu. Ofner rozprawja, zo je hnydom po nawjazanju kontakta a prěnjej rozmołwje wo termin w Hórnikowej knihowni prosył. Zastupjerka předsydy čěskeho towarstwa přećelow Serbow Společnost přátel Lužice (SPL) Eliška Oberhelová praji: „Zawěsće je hižo někotry wulkopósłanc Serbski seminar wopytał. Ale wón je najskerje prěni, kotryž je hnydom stawizny Serbow a jich zwisk z Čechami zrozumić chcył.“ Połdra hodźiny jeho předsyda SPL Lukáš Novosad po domje wodźeše.
