Söder přećiwo prašenju dowěry
Berlin (dpa/SN). Namjet zwjazkoweho kanclera Friedricha Merza (CDU), stajić prašenje dowěry, zo by sej w zwadźe wo rentu jednotu koalicije wunuzował, ma předsyda bayerskeje CSU Markus Söder za wopačny puć. „To je dospołnje wopačne zhladowanje. Prašenje dowěry njeje žadyn element k sylnjenju dowěry, ale je zwjetša jenož prěnja kročel k pohubjeńšenju“, rjekny Söder w sćelaku ARD.
Koalicija CDU/CSU a SPD wadźi so wo nowym rentowym zakonju. Młodźi zapósłancy w CDU/CSU naćisk zakonja wysokich kóštow dla kritizuja a hroža, zo w zwjazkowym sejmje přećiwo njemu hłosuja. Bjez nich njeby koalicija žanu wjetšinu měła. Kritika měri so přećiwo tomu, zo wostanje niwow renty dale stabilny.
To a tamne (24.11.25)
Dwójce přez wjerch je so paduch do wupožčowarnje hrow w hessenskim Schönecku přełamał. 34lětny bě so we wobchodźe schował, jako sobudźěłaćerjo wječor durje zamknychu. W nocy pokradny wón pjenjezy z kasy a zminy so přez wjerch. Při tym pak so přełama. Na to zalěze znowa do mjezywjercha a so tam chowaše, doniž njebě policija padustwo doprotokolowała. Popołdnju so sobudźěłaćerjo njemało stróžichu, jako paduch znowa z wjercha do wobchoda padny. Tónkróć jeho policija zaja.
Pomjerznjeny dešćik je lětanišćo Köln/Bonn wčera popołdnju nachwilnje zlemił. Čara za wotlět a přizemjenje lětadłow bě zalodźena. Sobudźěłaćerjo dyrbjachu lód wotstronić, štož zawinowaše zapozdźenja. Tež na druhich lětanišćach mějachu ćeže, jako dešć na zmjerznjenu zemju padaše.
Zwjazkowa rada so schadźowała
Berlin (dpa/SN). Zwjazkowa rada je so dźensa z lutowanskimi naprawami zaběrała, kiž maja přinoški ludźi za zakońske chorobne kasy spočatk lěta po móžnosći stabilne dźeržeć. Zastupnistwo zwjazkowych krajow ma rozsudźić, hač wot zwjazkoweho sejma wobzamknjeny zakoń schwali abo hač ma so posrědkowanski wuběrk z tym zaběrać. Dalše temy běchu financowanje cyłoněmskeje jězdźenki, prawa policije při wotwobaranju trutow a tak mjenowana aktiwna renta.
Skućićela Němskej přepodadźa
Hamburg (dpa/SN). Pozdatneho hłowneho zamołwiteho za nadpad na płunowód Nord Stream w Baltiskim morju drje přichodny štwórtk z jastwa w Italskej do Němskeje přiwjezu. Jeho zaměstnja najprjedy raz w Hamburgskim jastwje. Po tym předstaja jeho sudnikej w Karlsruhe. Němska chce muža po němskich zakonjach zasudźić. Berlin z toho wuchadźa, zo je muž skupinu Ukrainjanow nawjedował, kiž su płunowód 2022 rozbuchnyli.
Adwentne wiki wotewrjene
Na ležownosći, hdźež wotměwa so tuchwilu swětowa klimowa ...
Žony lěpje před namocu škitać
Berlin (dpa/SN). Zwjazkowa justicna ministerka Stefanie Hubig přihotuje dalše naprawy, zo by žony lěpje přećiwo namocy ze stron partnera, bywšeho partnera abo cuzych škitała. „Ličby zwjazkoweho kriminalneho zarjada pokazuja hórku realitu w našim kraju: Namóc w domjacnosćach přiběra“, rjekny politikarka SPD powěsćerni dpa. Po jeje informacijach je ličba namócnych njeskutkow w domjacnosćach minjene pjeć lět wo 18 procentow stupała.
Zwjazkowy kriminalny zarjad je dźensa w Berlinje swoju rozprawu wo namocy w domjacnosći a wosebje přećiwo žonam předstajił. Po tym bě lěta 2024 cyłkownje 187 000 žonow doma wot namocy potrjechenych.
Wjeršk bjez wodźacych krajow
Berlin (dpa/SN). Zwjazkowy kancler Friedrich Merz (CDU) wotleći dźensa wječor na swoju prěnju wuprawu do Afriki. Najprjedy wobdźěli so wón na wjerškowym zetkanju hospodarsce najsylnišich krajow G20 w Johannesburgu w Južnej Africe a po tym na wjeršku EU a Afriki w Angoli.
Wočakowanja na wjeršk G20 mjeztym dale woteběraja. Po USA, Ruskej a Chinje staj nětko tež statnej šefaj Argentinskeje a Mexika swoje wobdźělenje wotprajiłoj. Chinski prezident Xi a ruski prezident Wladimir Putin staj hižo dlěje připowědźiłoj, zo do Johannesburga njepřijědźetaj, ale sćeletaj zastupnikow. USA z prezidentom Donaldom Trumpom na čole chcedźa zetkanje wodźacych industrijnych a prohowych krajow swěta kompletnje bojkotować.
Trump wopodstatni swój bojkot z trajacym přesćěhanjom a morjenjom běłych wulkoratarjow w Južnej Africe, bjez toho zo by tole dopokazać móhł.
Trump ilegalnje postupował
Washington (dpa/SN). Zwjazkowa sudnica je rozsudźiła, zo bě zasadźenje narodneje gardy w stolicy USA Washingtonje ilegalne. Zamołwići su swoje zakonske móžnosće překročili, piše sudnica Jia Cobb. Knježerstwo prezidenta USA Donalda Trumpa njeje jednotki bjez přikaza regionalnje zamołwitych aktiwizować směło. Cobb je wukazała, zasadźenje narodneje gardy skónčić. Wukaz płaći pak hakle za tři tydźenje. W tym času ma knježerstwo chwile, rewiziju zapodać.
Narodna garda je rezerwowa jednotka za nuzowe pady kaž přirodne katastrofy. Trump zasadźuje wojakow mjeztym we wjacorych městach, dokelž nimaja tam zamołwići po jeho měnjenju połoženje hižo pod kontrolu.
Zelenskyj měrowy plan dóstał
Kijew (dpa/SN). Ukrainski prezident Wolodymyr Zelenskyj je po informacijach swojeho běrowa plan měroweho rozrisanja wójny z Ruskej dóstał. Tutón bu oficialnje w USA zdźěłany. Zelenskyj bě so w Kijewje z delegaciju USA zetkał, medije rozprawjeja. „Smy so dojednali, na dypkach měroweho plana dale dźěłać, zo bychmy wójnu dostojnje skónčić móhli.“ Ukraina chcyła kóždy namjet podpěrać, kotryž je na dobro „woprawdźiteho měra“, Zelenskyj po zetkanju rjekny.
Po informacijach medijow je w měrowym planje zakótwjene, zo njestanje so Ukraina z čłonom NATO, zo swoje wójsko pomjeńši a zo wot Ruskeje wobsadźene kónčiny wotstupi. Plan wopřija cyłkownje 28 dypkow, kiž maja dołhodobny přiměr po tři lěta trajacej wójnje zaručić.
USA přinošuja ze swojeje strony „spušćomne wěstotne garantije“. Ruska so zawjazuje, zo sej dalše ukrainske kónčiny nježada a zo kóždežkuli agresiwne plany přećiwo Europje a Ukrainje spušći.
To a tamne (21.11.25)
Dźiwny smjerd wobydlerjow gmejny Karlstein nad Mohanom w delnjej Frankskej hižo dwě lěće zaběra, bjez toho zo bychu wuslědźili, wotkal wón přichadźa. Za někotrych smjerdźi za spalenym kablom, druzy tukaja na syrik. Někotři scyła ničo nječuja. Wohnjowa wobora ničo namakała njeje. Škódne maćizny w powětře tohorunja zwěsćili njejsu. Wjesnjanosta ludźi nětko prosy, smjerd protokolować a daty gmejnje přewostajić.
Tradicionalny nalěpk wignety za wužiwanje awstriskeje awtodróhi wotstronja. Wot 1. decembra 2026 změja tam jenož hišće digitalnu wignetu. Tole je narodna rada wobzamknyła. „Žadyn nalěpk, žane kóšty za rozesłanje, žadyn riziko falšowanja“, we Wienje zdźělichu. Wignetu kupić móža ludźo internetnje abo w tankownjach, kioskach a při mjezy. 2026 płaći wona mjez 9,60 a 106,80 eurow.
Strukturnu změnu pospěšić
Budyšin (SN/BŠe). Budyski zapósłanc Sakskeho krajneho sejma Marko Šiman (CDU) so dale zaměrnje za zajimy sprjewineho města a wokoliny zasadźuje. Jeho dźěławosć koncentruje so předewšěm na naprawy w zwisku ze změnu struktury. Wažne su jemu dźěłowe městna, kotrež maja w dosahacej měrje nastać, wón zawčerawšim w rozmołwje z našim wječornikom wobkrući. „Město Budyšin ma so z wažnym kubłanskim a slědźenskim srjedźišćom stać“, Marko Šiman wuzběhny. Zdobom skedźbni wón na docpěte wukony, kaž na přikład Budysku powołansku akademiju, kotraž je nětko wysoka šula. To je nimo Wysokeje šule policije dalše wažne kubłanske stejnišćo.
Zapósłanc sej přeje, zo změna strukturow spěšnišo postupuje. Zawody trjebaja wěstotu a dobru infrastrukturu, zo móhli w Hornjej Łužicy inwestować. Nanajspěšnišo měła so tuž železniska čara mjez Drježdźanami a Zhorjelcom elektrifikować. „Mjeztym bu mi přilubjene, zo ma so wotrězk mjez Zhorjelcom a Zemicami-Tumicami klětu planować započeć.“ Po wutwarje čary móža ćahi tam 160 kilometrow na hodźinu jěć.
