Paris (dpa/SN). Při masiwnych protestach po wšěm kraju z něhdźe 200 000 wobdźělnikami su w Francoskej po informacijach nutřkowneho ministerstwa 540 ludźi zajeli. Jeničce w Parisu zličichu wčera wječor wjace hač 200 zajatych. Cyłkownje 23 policistow so při rozestajenjach zrani. Nutřkowne ministerstwo ­rěči wo stach wohenjach na zjawnych dróhach a wo „kaženju zjawneho porjada“. Demonstracije su w běhu dnja rozrostli, tójšto radikalnych aktiwistow so na nich wobdźěli. Wosebje napjata bě situacija w stolicy Parisu, w městomaj Nantes na zapadźe a Rennes na sewjerozapadźe kraja, hdźež běchu demonstranća wěstotne mocy masiwnje nadběhowali.

Na widejach běchu rozestajenja widźeć. Demonstranća atakowachu poli­cistow, powalichu policajske awta a je ­zapalichu. W Parisu su nakupowanski centrum z wěstotnych přičin zawrěli.

Protesty pod hesłom „Blokujmy wšitko“ měrja so wosebje přećiwo hižo dlěši čas připowědźenym lutowanskim planam knježerstwa w Parisu.

Pólska prosy zwjazkarjow NATO wo wuradźowanja

Waršawa/Berlin (dpa/SN). Pólska pyta zhromadnje ze swojimi zwjazkarjemi za wojerskej wotmołwu na masiwne zadobywanje ruskich trutow do teritorija ­NATO. We Waršawje je nowy prezident Karol Nawrocki dźensa pólsku radu za narodnu wěstotu zwołał. Jej přisłušeja tež ministerski prezident, ministraj za nutřkowne a wonkowne naležnosće, wěstotne słužby a nawodnistwo parlamenta.

W europskich stolicach je eskalacija mjez Ruskej a NATO wulke starosće zbudźiła. Prěni króć w mjeztym dlěje hač tři lěta trajacej wójnje Ruskeje přećiwo Ukrainje su w nocy na srjedu wjetšu ličbu ruskich trutow w powětrowym rumje Pólskeje zwěsćili. Po informacijach ministerskeho prezidenta Donalda Tuska jednaše so wo znajmjeńša 19 lětacych objektow. Pólske wojerske lětadła su truty zhromadnje z mocami NATO wottřělili. Hač do srjedy wječora su zbytki 16 trutow namakali, kiž běchu w zdalenosći sta kilometrow wot wuchodneje mjezy rozbrojene.

A nětko hišće truty nad Pólskej – što to woznamjenja, běše w nadpismach powěsćow hižo wčera jasne. Dźens rano z erta něhdyšeho generala zwjazkoweje wobory na info-sćelaku MDR to hinak klinčeše: Je lědma jasne, što je so dokładnje stało. Ale to móže so chětře změnić, snadź budźe po redakciskim kóncu našeho wječornika tola wšo jasne. To jeničke, štož wěm: Sym dźakowny, zo njeje za čas zymneje wójny, hdyž stej so wuchod a zapad z atomowymi raketami wohrožowałoj, tajka komunikaciska hysterija knježiła kaž dźensa, hewak by swět dawno w finalnej nuklearnej wójnje zašoł. Najebać komunistisku njeprawdu a inwaziju do Afghanistana su tež na zapadźe Němskeje swoje domjacnosće ze sowjetskim płunom tepili. A Israel a Palestinjenjo su so mjez sobu připóznawali a sčasami je tam měr knježił, hdyž su so načolni politikarjo Israela z nawodu terora přećiwo židowskej ludnosći Jassirom Arafatom dojednali. Takle strózby rozum skutkuje. Marcel Brauman

Bamberg (dpa/SN). Zastojnicy bayerskeje policije su z tójšto pomocnikami přećiwo cwólbje wikowarjow drogow postupowali. Při přepytowanjach w Sakskej a Sewjerorynsko-Westfalskej su šěsć podhladnych zajeli. Wjace hač 200 policistow, ­wosebite jednotki kaž tež policajske psy bě na akciji wobdźělenych, Bambergske generalne statne rěčnistwo zdźěla.

Mužojo su za wikowanje z drogami wjacore internetne strony kaž tež strony w darkneće – to je zakazny dźěl interneta – wužiwali. Po dotalnych přepytowanjach je skupina wjace hač 500 kilo­gramow cannabisa a kilogram kokaina předała. Drogi su w Lipsku zapakowali a w małych pakćikach do Sewjerorynsko-Westfalskeje pósłali. Wottam su je kupcam wozyli. Dotal móžeše policija dźewjeć muži w starobje mjez 26 a 32 lětami jako wobdźělenych zwěsćić.

Při přepytowanjach na dźewjeć městnach w Sakskej a Sewjerorynsko-Westfalskej su zastojnicy drogi kaž methamphetamin, heroin, kokain, ecstasy a wulke mnóstwa cannabisa sćazali. Nimo toho namakachu kompjutery, pjenjezy, brónje a cyłe plantaže marihuany.