Washington (dpa/SN). Wójsko USA swoju prezencu w karibiskej kónčinje łaćonskeje Ameriki masiwnje zwyši. Wčera je lětadłonošak „USS Gerald R. Ford“ do regiona dojěł. Po oficialnych informacijach chce Washington po tutym puću přećiwo mjezynarodnym drogowym cwólbam postupować, kotrež pječa USA z drogami „zapławjeja“. Minjeny čas běchu USA stajnje zaso pozdatne čołmy drogowych kurěrow w mjezynarodnych kónčinach morja nadběhowali a při tym dźesatki ludźi morili.

Aktiwity USA měrja so wosebje přećiwo Venezueli. Njedawno bě prezident USA Donald Trump tajnej słužbje CIA přikazał, akcije přećiwo drogowym kartelam tež we Venezueli přewjesć.

Tam maja najnowše aktiwity USA za jasne znamjo, zo přihotuja USA direktny wojerski nadpad na kraj. Mjeztym su tam manewer wójska zahajili, z kotrymž zwučuja zakitowanje přećiwo nadpadej cuzeho wójska.

Lětadłonošak „Gerald Ford“ je najwjetša wójnska łódź swěta.

Berlinske sudnistwo wuradźuje wo skóržbje přećiwo praksy Němskeje

Berlin (dpa/SN). Wjacori Palestinjenjo w Gazy chcedźa z pomocu sudnistwa přesadźić, zo Němska hižo žane brónje do Israela njeeksportuje. Berlinske zarjadniske sudnistwo je dźensa wo dwěmaj skóržbomaj přećiwo dodawanju brónjow wuradźowało. Wusud přisłušneje 4. komory wočakowachu po informacijach rěčnicy w běhu dnja. Sudnistwo je za jednanje přisłušne, dokelž ma zwjazkowe knježerstwo swoje sydło w Berlinje.

Skoržiłoj běštaj w jednym padźe wyši lěkar, kotryž dlěje hač 20 lět w Berlinje bydli a je wot lěta 2014 staćan Němskeje, kaž tež jeho w Gazaskim pasmje bydlacy nan. Zaměr je, zo sudnistwo Němskeje zakaza, dalše brónje do Israela pósłać, doniž njejsu wojowanja w Gazy skónčene. Praksa němskeho knježerstwa, eksport brónjow do Israela stajnje zaso dowoleć, rani z jeju wida ludoprawniske winowatosće Němskeje. Skóržbnikaj běštaj hižo we wjacorych nuznych jednanjach podarmo spytałoj, eksport wójnskich brónjow zastajić.

Konflikt w Budyskej radnicy budźi kedźbnosć po cyłej Sakskej, kaž reakcija dźěłarnistwa ver.di pokazuje: Dźe wo to, hač historiska stolica Hornjeje Łužicy z dobrym přikładom kubłanja dźěći w měšćanskich pěstowarnjach wostanje abo hač so dotalny standard na kóšty dźěći rozbije. Za prěnju poziciju steji financny měšćanosta dr. Robert Böhmer, za druhu wyši měšćanosta Karsten Vogt. Nětko ma měšćanska rada rozsudźić, do kotreho směra chcedźa kročić – nic jenož při kubłanju małych dźěći. Zo Vogt swojeho naměstnika w interviewje zjawnje nadběhuje, tón so pak tomu zjawnje wobarać njesmě, dokelž je naležnosć formalnje hišće njezjawna, njezaběra jenož prawniski dohlad krajnoradneho zarjada. K demokratiji słuša transparentna debata wo bytostnych temach. Potom móhła zjawnosć pohódnoćić, hač njejsu Vogtowe argumenty tola lěpše. Ver.di jemu poskića, zhromadnje wo dosć komunalnych pjenjez wojować – tež za saněrowanje šulow. Marcel Brauman

Podstupim (dpa/SN). Hladajo na wčerawše zahajenje póstniskeje sezony a z tym zwjazanych swjedźenjow je prezident Berlinsko-Braniborskeho karnewaloweho zwjazka Fred Witschel, wuznam tak mjenowaneho pjateho počasa wu­zběhnył: „Karnewal woznamjenja w tutych časach, cyle wědomje wokomiki wjesela a lochkosće dožiwjeć. Swjedźenje su dobra składnosć so schadźować, so kreatiwnje pokazać a žiwjenje woswjećić – runje potom, hdyž su wuměnjenja wužadowace.“

Póstnicarjow zaběra tež diskusija wo kulturnym přiswojenju, inkluziji a respektnym mjezsobnym wobchadźenju. „W času, w kotrymž dožiwja tójšto ludźi začuće wosamoćenosće a towaršnostneho pačenja, dobywa karnewal jako zhromadny podawk přiběrajcy wuznam“, tak Witschel. „Zhromadnje swjećić, spěwać a rejować spěchuje zhromadnosć a twori zwjazowace wokomiki, kotrež wšědny dźeń přemało dožiwjamy.“ Byrnjež póstnicy w Berlinje a Braniborskej cyle tak pisane njebyli kaž w Porynskej abo na juhu Němskeje, „su tola wuznam regionalneje wosebitosće a jónkrótneho dožiwjenja“.