Rom (dpa/SN). Bamž Leo XIV. je dźensa prěnju jězbu do wukraja nastupił, po tym zo běchu jeho před dobrym poł lětom za nawodu katolskeje cyrkwje wu­zwolili. Wón wopyta najprjedy Turkowsku, njedźelu pojědźe dale do Libanona. Cyłkownje šěsć dnjow přebywa pontifeks w muslimskimaj krajomaj, w kotrymajž su křesćenjo w mjeńšinje.

W Ankarje wočakowaše bamža turkowski prezident Recep Tayyip Erdoğan. Po tym poleći Leo XIV. do Istanbula, hdźež planuje při wopyće Módreje mo­šeje zetkanje z grjeksko-prawosławnym patriarchom Bartholomaisom. W Libanonje chce nawoda katolikow „měrowe poselstwo w Bliskim wuchodźe“ wozjewjeć a so za wujednanje zasadźić.

Lipsk/Drježdźany (dpa/SN). Wobě sakskej lětanišći stej loni najwjetši minus w swojich stawiznach nadźěłałoj. Kaž zhromadna třěšna towaršnosć Lipšćanskeho a Drježdźanskeho lětanišća powěsćerni dpa wobkrući, je předewzaće cyłkowny deficit 53,5 milionow eurow nakopiło.

Dobytki z wobrotow su wo 2,9 procentow na 186,2 milionaj eurow woteběrali. Cyłkowny wuslědk koncerna wučinješe bjez dawkow a danje minus 39,3 milionow eurow. Lońše lěto steješe pod sylnym wliwom „trěbnych wudawkow za ponowjenje“, rjekny nawoda před­sydstwa Götz Ahmelmann nowinarjam při předstajenju bilancy. Minus běchu w tymle wobłuku wočakowali. Wón njeje „wuraz zhubjeneje kontrole“, tak Ahmelmann. Zahajeny puć saněrowanja za­winuje přidatne wudawki za posudki, poradźowanje a prěnje naprawy.

Lětanišći w Lipsku a Drježdźanach słušatej Sakskej a Saksko-Anhaltskej. Loni dyrbještej krajej 145 milionow eurow připłaćić. Saksko-Anhaltska je připowědźiła, zo wot lěta 2027 ničo wjace njepłaći.

Koaliciski wuběrk CDU/CSU a SPD wuradźuje wo wažnych prašenjach

Berlin (dpa/SN). Wodźacy zastupnicy CDU/CSU a SPD pytaja dźensa wječor w koaliciskim wuběrku mjez druhim za rozrisanjom w prašenju renty. Dalše temy su za lěto 2035 planowany kónc bencinowych motorow, tepjenski zakoń a lutowanske naprawy za chorobne kasy. ­Jelizo so wobdźělnicy dojednaja, chcedźa zjawnosć jutře wo tym informować.

Koaliciski wuběrk je centralny planowanski gremij zwjazka CDU, CSU a SPD. Nimo zwjazkoweho kanclera Friedricha Merza (CDU) a wicekanclera Larsa Klingbeila (SPD) přisłuša jemu wosom muži a jedna žona – ministerka za dźěło a předsydka SPD Bärbel Bas.

Najwažniša tema wuradźowanjow je zwada wo rentowy pakćik, přećiwo kotremuž skupina 18 młodych zapósłancow unije rokoći. Woni niwow renty 48 procentow hač do lěta 2031 akceptuja. ­Wočakowanych kóštow sta miliardow eurow dla pak wotpokazuja, zo niwow renty po tym dale stupa. Jeli młoda unija při swojim měnjenju wostanje, je swójska wjetšina koalicije w zwjazkowym ­sejmje při wothłosowanju wo za­konju wohrožena.

Z wozjewjenjom wo konflikće na čole ­Budyskeho měšćanskeho zarjadnistwa a z tym zwisowacych faktach dokoławokoło personalneho wuhotowanja pěstowarnjow su Serbske Nowiny „tyzu Pandory“ wočinili, praji wyši měšćanosta Vogt wčera na zjawnym posedźenju měšćanskeje rady. Tam je swój interview w Sakskich Nowinach z wuprajenjemi wo nje­zjawnym wuradźowanju gremija z tym wopodstatnił, zo běchu wěcy hižo „po­wšitkownje znate“ – wozjewjenja w serbskim wječorniku dla. Zo staj wčera wočiwidnje tež radźićelej z kruha frakcijow, kotrež jeho oficielnje podpěruja, přećiwo njemu hłosowałoj, na to pokazuje, zo je dawno sam ze zwadnym wašnjom nawjedowanja města za kulisami wonu zahubnu tyzu wočinił. Nadawk swobodnych medijow je, z transparencu debatu zmóžnjeć. Tak funguje demokratija. Po mytosu Pandory tči w tyzy pak tež nadźija, ze zahubu wobchadźeć. To płaći tež za brachi w politice. Marcel Brauman