BSW na wuchod wusměrić
Podstupim (dpa/SN). Braniborski zastupowacy ministerski prezident a financny minister Robert Crumbach nosy so z myslu, kandidować za zastojnstwo zwjazkoweho předsydy abo městopředsydy Zwjazka Sahry Wagenknecht. Tole rjekny wón powěsćerni dpa. Tak chcył Crumbach stronu bóle hač dotal na wuchodnu Němsku wusměrić.
Na cyłoněmskim zjězdźe strony kónc tydźenja w Magdeburgu wuzwola nowe zwjazkowe nawodnistwo. Załožerka strony Sahra Wagenknecht bě připowědźiła, zo nochce hižo dlěje předsydka strony być. Wona chcyła na wodźacym městnje komisiju zakładnych hódnotow strony natwarić a nawjedować. Předsydstwo strony namjetuje, zo měłoj dotalna sobupředsydka Amira Mohamed Ali a zapósłanc Europskeho parlamenta Fabio De Masi stronu jako dwójka nawjedować.
„Sylnosć našeje strony leži na wuchodźe Němskeje. Tole dyrbi so w jeje nawodnistwje wotbłyšćować“, rjekny Crumbach. „Ze stronskim nawodnistwom jeno ze zapada njezmějemy na wuchodźe žane dobre karty. Trjebamy wo wjele wjace wuchodnych Němcow.“
To a tamne (03.12.25)
Po wšěm swěće jědźa dźěći dale a wjace sylnje předźěłane žiwidła ze strašnymi sćěhami za strowotu, wuwiće a duchowne derjeměće. Tole je wuslědk přepytowanja Unicef. Nastork bě rozprawa lěkarskeho fachoweho časopisa The Lancet, kotraž strowotniske strachi industrielnje předźěłanych žiwidłow za młodostnych naliči. Měnjene su słódke napoje, chipsy, fast food, pizza a słódkosće.
Na jednoreho wobydlerja degraděrowany bywši britiski princ Andrew njedóstanje wotškódnjenje, dokelž dyrbješe swoje luksusowe bydlenje w hrodźe Windsor wopušćić. Tole su fachowcy za imobilije zwěsćili. Kral Charles III. bě wukazał, zo dyrbi Andrew z hroda wućahnyć, dokelž je do afery wokoło seksualneho złóstnika Jeffreyja Epsteina zapřijaty. Nimo toho dyrbješe wšitke titule a priwilegije wotedać.
Brigadu po planje natwarja
Vilnius (dpa/SN). Komander brigady zwjazkoweje wobory w Litawskej ma zaměstnjenje němskeje bojoweje jednotki w baltiskim čłonskim kraju NATO za dobry puć. „Natwar brigady wotběži po planje“, rjekny general Christoph Huber powěsćerni dpa w litawskej stolicy Vilniusu. Ličba němskich wojakow je mjeztym na 500 rozrostła a ma 2026 dale stupać. Zwjazkowa wobora zarjaduje tam tankowu brigadu, zo by wuchodnu flanku NATO zesylniła a před Ruskej škitała.
Satirikar AfD dyrbi hić
Berlin (dpa/SN). Předsyda AfD Tino Chrupalla je přeswědčeny, zo njeje rěčnik młodźinskeho kongresa AfD, kotryž je Adolfa Hitlera napodobnić chcył, hižo dlěje čłon strony. „Akcija bě špatna satira“, rjekny Chrupalla w sćelaku ntv wo wustupje Alexandera Eichwalda. To wšak je runje to, štož móžeš wot politiskeho přećiwnika wočakować, tak Chrupalla. „Widźimy, što so hišće wukopa. Na žadyn pad pak njewostanje wón čłon strony.“
Hegseth we wuskosćach
Pomocnicy chowaja na kupje Sumatra w Indoneziskej wobydlerja, kiž bě ...
CDU/CSU hižo raz wothłosuje
Bamž: Libanonje, stań zaso!
Beirut (dpa/SN). Před něhdźe 150 000 wěriwymi je bamž Leo XIV. wobydlerjow wot krizow ćežko střaseneho Libanona namołwjał, namakać nowu towaršnostnu zhromadnosć „Libanonje, stań zaso. Budź dom sprawnosće a bratrowstwa. Budź posoł měra za wšu kónčinu!“, rjekny nawoda katolskeje cyrkwje na wulke Božej mši w Beiruće.
Z Božej mšu zakónči bamž Leo prěnju wukrajnu jězbu po swojim wuzwolenju do zastojnstwa před dobrym poł lětom. Do toho bě wón Turkowsku wopytał. Popołdnju wotleća zaso do Roma. Dźensa rano wopyta swjaty wótc městno zahubneje detonacije w Beirutskim přistawje před pjeć lětami. Tam so zhromadnje z přiwuznymi 200 woporow modleše.
Wurjadny pósłanc USA w Krjemlu
Moskwa (dpa/SN). Wurjadny pósłanc USA Steve Witkoff je wčera do ruskeje stolicy Moskwy dolećał. Tam wočakowaše jeho dźensa prezident Wladimir Putin k rozmołwam wo skónčenju wójny w Ukrainje. Zetkanje wobeju bě popołdnju planowane, nowiny rozprawjeja.
Předwčerawšim, njedźelu, bě so ukrainska delegacija ze zastupjerjemi USA w Floridźe zetkała. Při tym so pokaza, zo wostanje tójšto prašenjow njerozrisanych. Hłowna tema je 28 dypkow wopřijacy měrowy plan USA, kiž ma nimale štyri lěta trajacu wójnu w Ukrainje skónčić. Zapadni politikarjo běchu plan jako „lisćinu ruskich přećow“ kritizowali. Wosebje bolostnje začuwa Ukraina žadanja Ruskeje za dospołnej kontrolu štyrjoch ukrainskich prowincow.
Ruske wójsko wozjewja, zo je strategisce wažne ukrainske město Pokrowsk w kónčinje Donjecka po lěto trajacych wojowanjach zdobyło. Wobkedźbowarjo widźa powěsć w zwisku ze zetkanjom Putina a Witkoffa: Krjeml chce pokazać, zo ma wojersku iniciatiwu a wuspěch.
Tusk: Chwatajće, čas ćěka!
Na němsko-pólskich konsultacijach wo wotškódnjenju woporow rěčeli
Berlin (dpa/SN). Pólska je Němsku namołwjała, nastupajo wotškódnjenje hišće žiwych woporow němskeje okupacije za čas Druheje swětoweje wójny spěšnje jednać. „Chwatajće, jeli chceće tole woprawdźe činić. Čas ćěka“, rjekny ministerski prezident Pólskeje Donald Tusk po němsko-pólskich knježerstwowych konsultacijach w Berlinje na nowinarskej konferency ze zwjazkowym kanclerom Friedrichom Merzom (CDU).
Pólski ministerski prezident na to pokaza, zo ličba hišće žiwych woporow němskeho nacionalsocialistiskeho terora spochi woteběra. Jako bywši kancler Olaf Scholz w juliju 2024 tajku podpěru přilubi, bě w Pólskej po informacijach Załožby za němsko-pólske wujednanje hišće 60 000 woporow žiwych, mjeztym je jich hišće 50 000. „Jeli so naležnosć bórze njerozrisa, rozsudźu klětu, zo Pólska tute prašenje ze swójskimi srědkami zrjaduje“, Tusk rjekny.
