Berlin (dpa/SN). Generalny inspektor Zwjazkoweje wobory Carsten Breuer ma za trěbne, mustrować wšěch młodych muži, zo njeby Němska w padźe zakitowanja čas zhubiła. „Z wojerskeho wida je rozsudne, zo je cyły lětnik mustrowany. Jenož tak wěmy, štó je k dispoziciji a koho móžemy w padźe zakitowanja – čemuž chcemy zadźěwać – do wójska zwołać“, rjekny Breuer nowinarjam. Zakitowanski minister Boris Pistorius (SPD) bě so njedawno tohorunja za powšitkowne mustrowanje wuprajił.

Nowy zakoń woborneje słužby ma wot 1. januara 2026 płaćiwy być. Woborna słužba ma spočatnje dobrowólna być. Fachowi politikarjo CDU/CSU a SPD běchu namjetowali, młodych muži za mustrowanje za słužbu we wójsku wulosować. W nuzy móhli z losowanjom młodostnych tež do woborneje słužbje nuzować. To bě wulke diskusije zbudźiło.

Carsten Breuer so za to wupraja, sej wšitke móžnosće wobchować. Hač do kónca lětdźesatka chce Němska Zwjazkowu woboru na sylne wójsko wutwarić.

Diskusija wo nawrót syriskich ćěkancow do domizny znowa wudyriła

Berlin (dpa/SN). Po swojim posudku nastupajo dobrowólny nawrót syriskich ćěkancow do jich domizny žněje wonkowny minister Johann Wadephul (CDU) w rjadach swojeje strony kritiku. Zastupowacy předsyda frakcije CDU/CSU Günter Krings rjekny nowinarjam: „Spontane wuprajenja zwjazkoweho wonkowneho ministra su wočiwidnje z konteksta wzali, wšako dźe wo trěbny nawrót ludźi do Syriskeje.“ Wobydlerska wójna w Syriskej je nimo a wulke dźěle kraja móžeš ćěkancam za nawrót bjeze wšeho přicpěwać, je sej Krings wěsty. Zničenja kraja so jako argument přećiwo dobrowólnemu nawrótej ćěkancow scyła njehodźa, Krings argumentuje. „Štó dyrbi roztřělany kraj zaso natwarić, hdyž to swójscy staćenjo sami nječinja?“

Zo Birkenstock twornju předewzaća Maja w Brěžkach pola Kulowa přewozmje, je přewšo dobra powěsć. Jako bu zawod před lětomaj zawrjeny, drje sej mnozy my­slachu, zo budźe ležownosć wopušćena a twarska ruina. Hladajo na tuchwilne wuwiće hospodarstwa je přewzaće twornje wulka překwapjenka. Město Kulow a wsy dokoławokoło, hdźež su mnozy wobydlerjo z twornju zwjazani, su wolóžene. Wšako skića so ze znatym předewzaćom Birkenstock mnohe šansy na nowe dźěłowe městna. Črije a sandale koncerna su swětoznate a mjeztym luksusowe wudźěłki z wulkim potencialom na wikach. Hinak bě tole pole zawoda Maja, kotryž je meble za IKEA zhotowił. Tole dźě bě přičina, ­čehoždla je zawod w Brěžkach zwrěšćił. IKEA je sej prosće tuńšeho producenta ­na wuchodźe Europy wuzwolił. Koncern Birkenstock je šěroko nastajeny a je so k drohotnej marce wuwił. Wuměnjenja su cyle hinaše a lubja dobry přichod. Tuž ­witajće k nam! Bianka Šeferowa

Z wjerćatym rěblom je wohnjowa wobora ćeknjeneho papagaja z třěchi domu w sewjerorynsko-westfalskim Bocholće wuchowała. Wobydlerjo běchu pisaneho ptačka wuhladali a wohnjowu woboru informowali. Runočasnje prošeše swójba w interneće wo pomoc při pytanju za zhubjenym ptačkom. Wohnjowa wobora so pola swójby přizjewi. Zhromadnje z pomocnikami so skónčnje poradźi, papagaja z mjenom Zazu z dźewjeć metrow wysokeje třěchi wuchować.

Njewšědny nuzowy telefonat je policiju w Erfurće zaběrał. Wobydler domu je so sam z ručnymi putami při tepjenju přiwjazał – njeměješe pak žadyn klučik wjace. Zastojnicy jeho wuswobodźichu, po tym zo bě jim muž kluče z woknom ćisnył. Policisća zwěsćichu, zo njebě to prěni pad tajkeho razu pola wobydlerja a ručne puta z jeho dowolnosću sćazachu.