Pola Jednoty Kamjenc zaso trenuja
Předstajenje hrajerjow ST Marijineje hwězdy
Čas bjez lokalneho sporta je sportowa redakcija Serbskich Nowin hižo dosć derje za přinoški wužiwała, za kotrež njeby hewak městna było. Tak je w zašłych tydźenjach hižo koparjow Sportoweje jednotki Chrósćicy, Sportoweho towarstwa Marijina hwězda kaž tež Sokoła Ralbicy/Hórki předstajiła. Dźensa předstaja Nowosličan David Matik škitarjow Ronalda Cyža, Jakuba Zelnaka a Richarda Hawša. Woni su hrajerjo wokrjesneho wyšeho koparskeho ligista w Pančicach-Kukowje.
Ronald Cyž
Kopicu šansow njewužiwali
Bayreuth Tigers –
Łužiske liški Běła Woda 3:2 po podlěšenju (1:1, 0:1, 1:0, 1:0)
Po dwěmaj dobyćomaj je krótka wuspěšna serija, směš-li to docyła seriju mjenować, Łužiskich lodohokejowych liškow hižo zaso přetorhnjena. W bayerskim Bayreuthu podležachu módro-žołći po podlěšenju 2:3. „Móžemy wo zbožu rěčeć, zo steješe po prěnjej třećinje jenož 1:1“, zjimaše kotrenar Andre Mücke prěnje 20 mjeńšin z wida hosći. Tigry nawjedowachu mjenujcy hižo po dźewjeć sekundach 1:0, jako puk z neutralneje cony cyle spěšnje na wrota Mac Carrutha prasnychu a přetworichu. W slědowacych mjeńšinach běše domjacy cyłk tež optisce lěpši, njezamó pak wuslědk zwyšić. W powerplayju Běłowodźenjo přez Nicholasa Rossa wurunachu, jako trjechi wón do krótkeho kuta. Běše to jedna z jenož mało prawych šansow hosći, čehoždla njebě wurunanje w tym wokomiku runjewon zasłužene.
Znowa z jednymi wrotami rozdźěla podleželi
Łužiske liški Běła Woda – Ravensburg Towerstars 1:2 (0:0, 0:2, 1:0)
Běłowodźanskim lodohokejistam pobrachuje w nětčišej hrajnej dobje tajki prawy dobyćerski gen. W minjenych hrach podležachu kontrahentej cyle husto z jeničkimi wrotami rozdźěla. Tež hdyž tónraz lěpši njeběchu, bychu partiju minjenu sobotu dobyć móhli. Tak pak podachu so hrajerjo z Ravensburga z třomi dypkami na dompuć.
W prěnich 20 mjeńšinach so wobě mustwje wobčuchaštej a tak dźěše najebać dobre šansy na woběmaj bokomaj z 0:0 do prěnjeje přestawki.
W druhej třećinje stejachu hosćo w defensiwje jara disciplinowani a njedachu Hornjołužičanam žane městno před wrotami. 59 sekundow po znowazahwizdanju Ravensburg nawjedowaše. Koncentrujo so hłownje na defensiwu zwyši hósć po 30 mjeńšinach samo na 0:2, jako daše so Brad Ross po konteru přelochko wuhrać. Tak njeměješe hrajer přećiwnika žanu nuzu, puk do wrotow domjacych prasnyć.
Wuslědki (09.03.21)
Němska lodohokejowa liga (DEL)
40. hrajny dźeń DEL2
Łužiske liški – LP Crimmitschau 3:1
Lawy Frankfurt – Tölzske lawy 1:4
EHC Freiburg – EC Bad Nauhein 5:4
EC Kassel Huskies – Bietigheim 2:3
Sokoły Heilbronn – LL Drježdźany 3:1
Ravensburg – ESV Kaufbeuren 3:5
Bayreuth Tigers – EV Landshut 3:2
1. EC Kassel Huskies 39 85
2. Bietigheim Steelers 40 74
3. EHC Freiburg 39 72
4. Tölzske lawy 39 70
5. Lawy Frankfurt 37 64
6. ESV Kaufbeuren 39 61
7. Ravensburg Towerstars 40 59
8. Lodowe piraty Crimmitschau 39 54
9. Bayreuth Tigers 40 49
10. Sokoły Heilbronner 38 47
11. Łužiske liški 40 47
12. Lodowe lawy Drježdźany 39 46
13. EV Landshut 38 45
14. EC Bad Nauheim 37 43
Słowa a zadźerženje trenarja wulku rólu hraja
Při kopańcy je trenar wažna wosobina, wšako wón wuspěch abo njewuspěch prěnjorjadnje zamołwja. Nimo praweje zestawy a taktiki měł trenar tež přeco prawe słowa namakać. To pak tak lochko njeje. Wšako ma kóždy hrajer swójski charakter. Tuž je jara wažne, kak ze swojimi chowancami komunikuješ, a to hižo na polu juniorow.
Młode koparske talenty přez wotměnjawy a na starobu wusměrjeny trening motiwować je po měnjenju Tadeja Cyža, nawody koparjow-juniorow Jednoty Kamjenc, jedyn z najwažnišich nadawkow trenarjow dorosta. Při tym měli sej nazwučowarjo tež přeco prawje přemyslić, kak ze swojimi chowancami rěča. Słowa kaž „Jeli dźensa troje wrota docpěješ, dóstanješ pjeć eurow!“ njejsu po jeho měnjenju jara wunošne za dźěći, znajmjeńša dołhodobnje nic. Koparki a koparjow w prawym wokomiku chwalić a při njewuspěchu zhromadnje za móžnosćemi polěpšenja pytać, to je dobry zakład wuspěcha a wjesela při kopańcy.
Widźał, słyšał, napisał (08.03.21)
Nichtó njeby sej myslił, zo pandemija tak dołho traje. Hižo měsacy tež amaterski sport pod njej chětro ćerpi. Jenož indiwidualny sport je dowoleny. Što je potajkim hišće móžne? Tak zwostawa najprjedy raz jenož wosobinska fitnes doma abo běhanje na čerstwym powětře. Prašenje wšak je, kotre sportowe družiny směmy hdy zaso přewjesć a pod kotrymi wuměnjenjemi?
Swobodny stat Sakska je hruby plan wozjewił, kak chce krute postajenja w sporće wolóžić. Hižo nětko je jasne, zo budźe to jenož móžno pod wěstej incidencnej hódnotu a po negatiwnym tesće. Wostanje-li hódnota incidency pjeć dnjow dołho pod 100, potom je sport po dwěmaj wosobomaj hromadźe dowoleny. Tež skupiny móža hromadźe sportować, ale jenož dźěći pod 15 lětami, a jich smě maksimalnje 20 być – wězo jenož wonka. To płaći wot dźensnišeho, tuž mamy hódnotu we wokrjesu wobkedźbować. Dalše wolóženja su wot 22. měrca móžne. Tež tu płaćitej mjenowanej směrnicy: incidencna hódnata a koronatest. Što to za towarstwa dokładnje rěka, přiwšěm jasne njeje.
Sport (05.03.21)
Zhromadnje so wothłosować
Wuběrk za dorost Zapadołužiskeho koparskeho zwjazka (WFV) přeproša na dwě digitalnej rěčnej hodźinje za dorostowe koparske mustwa. Zaměr je, zo so zamołwići na wšelake scenarije dojednaja, pod kotrymiž móhli po lockdownje zaso trenować a hrać. Wobdźělenje je dobrowólne. Daty za konferencu dóstanjeće, hdyž napisaće hač do 21. měrca na mejlku. W njej dyrbja mjeno, předmjeno, towarstwo a funkcija w towarstwje podate być.
24.03. 18:00 hodź. młodźinje D a E
25.03. 18:00 hodź. młodźiny A, B a C
Nimo runje mjenowaneju steja w protyčce WFV hišće štyri dalše terminy, a to posedźenjow jeho prezidija: 8., 15., 23. a 29. měrca
Trójce za sobu w liščej jamje
Łužiske lodohokejowe liški hraja jutře, póndźelu a dźens za tydźeń hnydom trójce za sobu doma. Jutře přijědu Ravensburg Towerstars do Běłeje Wody, na 40. hrajnym dnju Lodowe piraty Crimmitschau a dźens za tydźeń EV Landshut. Wšitke hry 2. němskeje lodohokejoweje ligi pokaza internetowy sćelak sprade.tv.
06.03. 17:00 Łužiske liški –
Ravensburg Towerstars
08.03. 19:30 Łužiske liški –
LP Crimmitschau
12.03. 19:30 Łužiske liški –
EV Landshut
Tři dypki po wulkim třepotanju
EC Bad Nauheim – Łužiske liški Běła Woda 2:3 (1:0, 0:3, 1:0)
Dwaj dnjej po wulkotnym domjacym dobyću 4:3 přećiwo Lawam z Frankfurta nad Mohanom podachu so Běłowodźanscy lodohokejisća do Hessenskeho Bad Nauheima. Tónkróć steješe youngster Tobias Ančička we wrotach Łužičanow a je swój nadawk jara derje zmištrował.
Zaso jónu pak Łužiske Liški chětro špatnje startowachu. Po njeradźenej přihrawce Stephane Döringa steješe hižo po 74 sekundach 1:0 za hosćićela. Dalše wrota w prěnjej třećinje padnyć nochcychu, tež hdyž bě na woběmaj bokomaj dosć šansow.
W srjedźnej třećinje trjebachu hosćo najebać wjacore składnosće wosom mjeńšin, zo bychu skónčnje wurunali. Brad Ross posłuži Rylana Schwartza, a tón trjechi k 1:1. Hornjołužičenjo wukonjachu dale wulki ćišć, a jenož 50 sekundow po jich prěnich wrotach klinkaše druhi raz we wrotach Bad Nauheima. Tónraz bě Luis Rentsch třělc. Hnydom na to dóstachu domjacy penalty bića z kijom dla. Wurjadny wrotar Ančička pak jón parěrowaše. Wšitko wupadaše za snadnym předskokom k druhej přestawce, ale 0,8 (!) sekundow do sireny zwyši Andrew Clark na 1:3.
Tomaš Langa šěsćdźesatnik
Kónc małeho róžka swjećeše Konječan Tomaš Langa šěsćdźesaćiny. Delanske Sokołki a delanscy Sokoljo su drje jemu hižo na narodninskim dnju gratulowali, tule na sportowej stronje Serbskich Nowin pak chcedźa to tež hišće raz činić.
Jednaćel Sokoła Ralbicy/Hórki Tomaš Langa stara so hižo wjele lět w Ralbicach wo sportowy areal a trawnik, kotryž wužiwaja nimo koparkow a koparjow Sokoła tež wuknjacy tamnišeje zakładneje a wyšeje šule. Dale Langa wopytowarjow pohosća, a to we wobłuku domjacych hrow wokrjesneho wyšeho ligista. Hdyžkuli ma něšto organizowane być, sej Langa radu wě a wěcku njekomplikowanje z posměwkom rjaduje.
Wulce spokojom z jeho dźěłom su tež wšitcy ći, kotřiž sportowu halu w běhu lěta wužiwaja. Wona słuša mjenujcy šulskemu nošerjej gmejnje Ralbicy-Róžant. Langa je stajnje na městnje, hdyž wo to dźe halu wotamkać a zamkać, hdyž dźe wo wužiwanje sportownje, wo stólcy a blida za zhromadnu bjesadu po sportowanju abo wo rjedźenje po tym.
