HZ 1922 Radwor młodźina A
– HZ Niska/Zhorjelc 1:5 (0:3)
Zestawa domjacych: K. Noacka – Jo. Jatzwauk, Puppe, Bolzmann (46. Jendrewski) Hübner, Hantschick (46. Schoele), Glücklich (46. Flaton), Spindler (46. D. Noack), Rudolph, Ritscher, Ja. Jatzwauk
W prěnim kole krajneho koparskeho pokala běše hósć młodźiny A Hrajneho zjednoćenstwa (HZ) Radwor/Wulka Dubrawa dwě klasy wyše hrajace HZ Niska/Zhorjelc. Tež hdyž poćerpjechu domjacy jasnu poražku, njetrjebaja so chowancy trenarja Inga Adama hańbować. Hižo w 6. min. padny 0:1, z kotrehož wuwi so hač do přestawki 0:3. Hosćićel njeměješe w prěnim połčasu ani jednu móžnosć a móžeše so wrotarjej Noackej dźakować, zo njebě mjezywuslědk hišće wyši.
Po přestawce čerpachu domjacy po wrotach Christopha Puppy nadźiju. Mjeńšinu pozdźišo pak postara so Luca D. Pluta wo stary wotstawk. W poslednjej mjeńšinje poradźichu so jemu dalše wrota ke kónčnemu 5:1.Heinz Noack
Póst Germania Budyšin II
– ST 1922 Radwor 2:0 (1:0)
Zestawa hosći: Wróbl – Šěrak, Buša, Henke, Karwin, Nuk, Zähr (60. Handrik), Winar, Bauer (46. Wjeńka), Kral, Schulze
Koparjo ST Radworja chcychu so za poražku w zašłej hrajnej dobje pola Germanije rewanšować. Za to žadaše sej trenar Pětr Bejmak spěšne, niske a direktne přihrawki. Bohužel wšak so to jeho chowancam njezešlachći. Domjacy mudrje zakitowachu a startowachu z dołhimi třělwami strašne nadběhi. Hižo w 5. min. njezamó Radworski škit prawje zakitować. Z volleyjowym kopom Budyšin nadobo z 1:0 nawjedowaše. Hosćo drje mějachu wjace hrajnych podźělow, jasne móžnosće njezamóchu sej nadźěłać. Jednu přiwšěm mějachu: Po róžku trjechi Karwin žerdź. Přećiwniski škit pak běše přeco mysličku a tak krok dale.
Wokrjesna koparska liga, stafla I
1. Wjazońca 2 5 : 3 6
2. Wóspork 2 2 : 0 6
3. ST Budyšin 1 5 : 0 3
4. Hnašecy II 2 6 : 4 3
5. Malešecy 2 3 : 1 3
6. Póst G. Budyšin II 2 4 : 3 3
6. Wulka Dubrawa/Min. 2 4 : 3 3
8. Mały Wjelkow 2 6 : 7 3
9. Porchow 2 5 : 6 3
10. Radwor 2 1 : 2 3
11. HZ Budestecy 2 4 : 6 3
wokrjesna liga, stafla II
1. N. Hrabowka 2 5 : 1 6
2. Hory II 2 10 : 3 4
3. Wojerecy 1919 2 5 : 4 4
4. Rakecy II 2 3 : 2 4
5. Hórnikecy 2 6 : 3 3
6. Wětnica/Hola 2 7 : 6 3
7. Lubuš 1 3 : 2 3
8. FC Łužica 2 3 : 3 3
9. Nowe Město II 2 4 : 7 3
10. Šćeńca 2 3 : 9 3
11. Ćisk II 2 7 : 9 1
12. HZ Łaz 1 1 : 2 0
13. LSV Bluń 74 1 0 : 1 0
14. Njeswačidło 1 2 : 4 0
15. Ralbicy/Hórki II 2 2 : 5 0
Nadrózna Hrabowka – Sokoł Ralbicy/Hórki II 2:0 (1:0)
Zestawa hosći: J. Matka – Mě. Matka, Bernard (68. Mět), Zynda, Mi. Matka (55. Šnajder), Kobalc, Materna, Šěn (68. Šołta), Rawš, Šmit, Kurjat
Robustnje wustupujo spytachu koparjo Nadrózneje Hrabowki swojeho třělca wrotow Wendta z dołhimi třělwami posłužić, kiž je spěšny. Sokoljo derje sobu hrajachu a mějachu tež móžnosće. Tak Šmit w 35. min. bul do přećiwniskich wrotow kopny. Pobóčny sudnik pak spózna nimohru. Pjeć mjeńšin do połčasa docpě Wendt nawjedowanje.
Tež po přestawce nochcychu so Sokołej wrota zešlachćić, byrnjež ze zaměnjenym Šołtu a Mětom ofensiwniši byli. W podlěšenju trjechichu domjacy 2:0.
SJ Chrósćicy – LSV Hory 2:2 (1:0)
Zestawa domjacych: Králíček – Pöpel, Runt, Šafář, Šiman, F. Zahrodnik, Domaška, M. Zahrodnik, Młynk (72. Šmit), Žur (90. Budar), Věchet
Nadpismo móhło tež rěkać: ,,W poslednjej sekundźe dobyće z ruki dali.“ Štóž pak je hru widźał, tón zawěsće praji, zo móža Chróšćanscy koparjo z remisom spokojom być. Wosebje w prěnim połčasu woni chětro strachoćiwje wustupowachu. Přećiwnik z Horow móžeše swoju hru woměrje natwarjeć a sej bul derje přisuwać. Domjacy jeho hrajerjow dosć njemylachu. A dobre wudobyte bule běchu njekoncentracije a lochkomyslnosće dla hnydom zaso zhubjene. Kaž z ničeho pak padny za SJ Chrósćicy nawjedowanje. Wysoka diagonala Pöpela bu hišće wotpopadnjena, Młynk pak dósta druhi bul a pósła Věcheta hnydom do běha. Zymnokrejnje wuhra wón wrotarja, da hišće škitarjej do prózdneho běžeć a suny kulowatu kožu k 1:0 do praweho kuta (38.). Z přichodnym nadběhom potorhny Feliks Zahrodnik Horjanskeho nadběhowarja w šěsnatce, a sudnik postaji jědnatku. Králíček pak ju wotwobara.
Zapadołužiski koparski zwjazk (WFV) je mjez druhim tež za to zamołwity, zo žada sej kóžda winowatostna kaž tež přihotowanska hra wukubłaneho koparskeho sudnika a dweju asistentow. Loni je sudnistwo WFV mjez druhim Chróšćanskej SJ šěsć dypkow a ST 1922 Radworjej tři dypki wotćahnyło, dokelž njejstej sportowej jednotce trěbnu ličbu sudnikow stajiłoj. Sudnicy na łužiskich kopanišćach su nuznje trěbni! Wukubłanje koparskeho sudnika poskići WFV lětsa wot 12. septembra w PančicachKukowje. Kilian Hrjehor, 13lětny sudnik Sokoła Ralbicy/ Hórki, je loni pruwowanje wuspěšnje wobstał a za wšitkich zajimcow najwažniše dypki zestajał, kotrež su we wobłuku wukubłanja a pozdźišo trěbne.
Prašej so najlěpje zamołwiteho za sudnikow w sportowym zjednoćenstwje. Na internetnych stronach WFV móžeš so tohorunja wobhonić.
Budissa Budyšin
– Germania Halberstadt 3:0 (2:0)
Zestawa Budissy: J. Jakubov – Kolan, Klippel, Pfanne, Kral, Rosendo, Hoßmang, Čermák (83. Heppner), Reher, A. Jakubov (68. Hansch), Salewski (88. Walther)
Na planje steješe hižo 5. hrajny dźeń. Wobaj cyłkaj pak njeměještej přeco hišće dobyće na swojim dypkowym konće. Budissa kaž Germania Halberstadt chcyštej to nětko wězo změnić.
Bohužel bě jeno 475 přihladowarjow na Budysku Młynkec łuku přichwatało. Prěnju šansu měješe Germania, Jakub Jakubov pak steješe prawje (2.). Na tamnym boku wotwobara přećiwniski wrotar třělwu Rosenda na liniji z nohu (3.). Z dalšej paradu škitaše wrotar domjacych před wrotami přećiwnika. Róžk Rosenda w 15. min. wuži Alexander Jakubov k nawjedowanju. Wosom mjeńšin po tym poradźi so jemu samo 2:0. Hosćo derje wustupowachu, Budissa pak jim wjele njedowoli. Šansu Teixeiry znješkódni Jakub Jakubov (35.). Hoßmang (37.) a Reher (42.) móhłoj wuslědk k połčasej hišće zwyšić.
K poslednjemu wubědźowanju lětušeje triatlonoweje sezony wobdźělichu so serbscy sportowcy na 27. knappenManje we Łazu. Hižo wjacore lěta přewjeduja jón we a wokoło tamnišeho Třižonjanskeho jězora. Sobotu startowachu, při horcych temperaturach, atleća na dlěšich distancach. Po nimale dźewjeć hodźinach doběža Christian Schröter z Bamberga jako prěni „železny muž“ do cila (3,8 km płuwać – 180 km kolesować – 42,2 km běžeć/40 muži a štyri žony běchu startowali). Poslednjeho w cilu witachu přihladowarjo něhdźe sěsć hodźin pozdźišo. Tež za poł distancy (1,9 km płuwać – 90 km kolesować – 21 km běžeć) knježeše wulki zajim. Organizatorojo zwěsćichu rekordnu ličbu wobdźělnikow (27 žonow a 237 muži). Zwjeselace zdobom běše, zo bě tež při čarach lětsa wočiwidnje wjace přihladowarjow.