Koparski turněr přewjedli
Sobotu přewjedźechu w Jaseńcy turněr wólnočasnych koparskich mustwow. Wuhotowali běchu jón koparjo Viktorije Worklecy zhromadnej z Jasčanami. Dohromady wosom zastupnistwow móžachu na idyliskim sportnišću witać – mjez nimi tež jedne ryzy žónske z mjenom Micki. Samo z Kamjenicy bě mustwo přijěło. Styki běchu Worklečenjo z nimi před tydźenjemi na podobnym zarjadowanju w Kamjencu nawjazali.
Hry wotměchu so po ligowym systemje, potajkim po modusu kóždy přećiwo kóždemu. Dobyło je mustwo No Name, su to koparjo z Pančic a wokoliny. Tež najlěpši třělc wrotow bě z dobyćerskeho mustwa. Jakob Pakoßnick bě cyłkownje 17 króć wuspěšny.
Clemens Šmit
Kónčna tabulka:
1. No Name z Pančic
2. Holzbein Kiel z Njeswačidła
3. Viktoria Worklecy
4. Nepl z Kamjenicy
5. Granit Hórki
6. Swěrni z Biskopic
7. Micki
8. Viktoria Worklecy II
Wuslědki testowych hrow
Přihotuja so na sezonu
SJ Chrósćicy
– FV Großenhain 1:2 (1:1)
Za domjacych zasadźeni: Králíček – Pöpel, Kunze, Schulze, Šafář, Zahrodnik, Šiman, Dehn, Žur, Šmit, Runt, Sentivan, Špitank, Młynk, Henčl, Bogusz, Věchet, Budar
Prěnje koparske mustwo Sportoweje jednotki Chrósćicy, je so sobotu, měsac do zazběha hrajneje doby, na nju přihotować započało. Nic pak kaž lěta do toho z treningom, ale hnydom z testowej hru. Přeprosyli běchu sej Chróšćenjo koparjow FV Großenhaina. Sylny cyłk (štwórte městno minjenu sezonu), kotrež hraje tohorunja w krajnej klasy, ale w srjedźnej stafli.
Widźał, słyšał, napisał (18.07.16)
„Hory módre, ja was znaju, ja sym zaso w serbskim kraju ....“. To drje je witanski spěw wšitkich dowolnikow, hdyž so zaso domoj nawróćeja. Haj, lubi čitarjo, mamy połčas! Połčas prózdnin a snano tež połčas wažnych sportowych podawkow. Nimo su Europeada 2016, europske koparske mišterstwa kaž tež europske mišterstwa lochkoatletiki. Wšitke tele wjerški wotměchu so měrnje, bjez někajkich njeskutkow. Hačrunjež njebu fairnosć wšudźe dodźeržana, jako jara fairnu gestu mějach reakciju Francozow na přěhrate finale w kopańcy. Nic w barbach Francoskeje, ale w barbach dobyćerskeje Portugalskeje swěćeše so Eiffelowa wěža. Kompliment! Hač drje bychu to w druhich krajach tež tak činili? Mój přećel Jurij by nětko prajił: „Ně, dokelž nimaja w tamnych krajach Eiffelowu wěžu ...!“
Sport (15.07.16)
Simsony so wubědźuja
Jutře, sobotu, wot 12 hodź. wubědźuja so na skłoninje Lejnjanskeho jězora dźesaty raz ze Simsonami. Młodźinski klub Lejno, kotryž woblubowany motorsportowy podawk zarjaduje a wuhotuje, liči z rekordnym wobdźělenjom 150 starterow. Mjez nimi budźe tež tójšto serbskich z Kulowa, Róžanta, Ralbic, Nuknicy a Chrósćic.
Za kulowatej kožu honić
Jutře přewjedu wólnočasni koparjo Viktorije Worklecy swój prěni turněr za hobbyjowe mustwa w Jaseńcy. Wot 11 hodź. wojuja tam teamy w sylnosći 1:4 potom stajnje dźesać mjeńšin přećiwo sebi. Startowy pjenjez na mustwo płaći 20 eurow. Zajimcy njech so hišće e-mailnje přizjewja, a to pod richardkm-richard@web.de abo tobias-heidusch.
Koparske testowe hry
16.07. 15:00 Kulow – Lubuš
16.07. 15:00 Chrósćicy – Großenhain
16.07. 18:00 International Lipsk – Budissa
23.07. 14:00 Budissa – Rudolstadt
23.07. 15:00 Chrósćicy – ST Ćisk
23.07. 15:00 Běła Woda – Kulow
27.07. 18:30 Kamjenc – Biskopicy
29.07. 18:30 Wulka Dubrawa – Ralbicy
Beachtura Radija Satkule
Pokalne hry wulosowane
Zamołwići Sakskeho koparskeho zwjazka (SFV) su hry prěnjeho a druheho koła sakskeho pokalneho wubědźowanja wulosowali. Lońši dobyćer FC Rudne horiny Aue swój titul hižo zakitować njemóže, dokelž njesmě so jako postupnik do druheje zwjazkoweje ligi na wubědźowanju wobdźělić. Wo titul wojować smědźa tuž jenož mustwa třećeje, regionalneje a wyšeje ligi kaž tež krajneje ligi a krajneje klasy. Dale za wobdźělenje woprawnjeni su dobyćerjo 13 wokrjesnych pokalow.
Zajimawe je, zo nastupitej přichodnu hrajnu dobu w tymle wubědźowanju nimo FC International Lipsk, Budissa Budyšin abo Jednota Kamjenc, tež serbskej mustwje. Koparjo Sokoła Ralbicy/Hórki nastupja jako dobyćer wokrjesneho pokala w prěnim kole. Na nich čaka mustwo ST Horni kraj-Sprjewja. Tež Chróšćenjo su jako nowi čłonojo krajneje klasy w pokalu zastupjeni. Woni startuja hakle w druhim kole přećiwo cyłkej SV Hainsberg.
Sudnicy WFV na němskich mišterstwach wuspěšni
16. njeoficialne němske mišterstwa koparskich sudnikow wotměchu so w Beelitzu pola Podstupima. Tam přewjeduja kóžde lěto najwjetši turněr koparskich sudnikow. Hižo wječor do wubědźowanja poda so 13 wosobow Zapadołužiskeho koparskeho zwjazka (WFV) na puć do Braniborskeje, zo bychu so na nje přihotowali. Turněr zahajili su nazajtra z prominentnymi hosćimi, kaž na přikład zwjazkowym wonkownym ministrom Frankom-Walterom Steinmeierom (SPD).
W předkole měješe kóžde mustwo štyri hry. Wubranka WFV wudoby sej sydom dypkow a wrotowy poměr 5:3. Tak wobsadźi wona w swojej skupinje 2. městno a steješe w štwórćfinalu. Tam čakaše na nju lońši wicemišter. Tež tu pak sakski cyłk doby a zaćahny do połfinala. Přećiwo pozdźišemu dobyćerjej wšak třělenje z 9 metrow ze 4:5 přěhra. W małym finalu běchu sudnicy WFV zaso wuspěšni a zawěsćichu sej bronzowe městno. To bě wulkotny wukon, hladajo na lońše 7. městno a hakle druhe wobdźělenje na tajkim turněrje.
Beachvolleyball wabjacy
Jězdźa rady na koparske turněry
Hobbyjowi koparjo Viktorije Worklecy wobdźělichu so w minjenymaj měsacomaj hnydom na třoch turněrach. W meji podachu so na fanowy do Choćebuza. Dokelž maja w swojich rjadach mnohich přiwisnikow FC Energije, je za Worklečanow hižo z tradiciju, zo su na Choćebuskim wurisanju pódla. Po dwěmaj dobyćomaj a jednym remisu steješe Viktoria tam w štwórćfinalu. W třělenju z dźewjeć metrow pak 2:3 podleža. Na kóncu dosahaše serbskim koparjam z dwěmaj dalšimaj wuspěchomaj za 5. městno, z kotrymž běchu jara spokojom.
