Peter Čačko rozprawja z Bratislavy za Serbske Nowiny
We wjacorych słowakskich městach njejsu tónkróć silwester wohnjostroje byli, z kotrymiž ludźo po zwučenym wašnju stare lěto praskajo a błyskotajo do stawiznow přewodźeja. Spektakla su so ze solidarnosće z Prešovom wzdali, hdźež bě krótko do hód pjeć ludźi žiwjenje přisadźiło, jako rozbuchny zemski płun w dwanaćeposchodowym platowym domskim. Powostanki twarjenja su mjeztym zrumowane, štož je specialna čěska firma wobstarała.
Apropos wohnjostroje – wo nje stara so hižo 27 lět tež předewzaće z Dubnicy nad Váhom, słušace skupinje profesionelnych fachowcow. A wone njezmóžnjeja praskotace atrakcije jenož w našim kraju, ale zawěrno po cyłym swěće. Jeho produkty a elektriske palidła njewužiwaja pak w mnohich metropolach jeničce za to, nowe lěto witać. Wone „wobrubjeja“ tohorunja swětowe mišterstwa a samo olympiske hry.