Dalše wobmjezowanja zjawneho žiwjenja koronawirusa dla w Pólskej

Waršawa. Najebać wšitke škitne naprawy a wobmjezowanja swobodneho pohibowanja so koronawirus w Pólskej dale a bóle rozpřestrěwa a je wčera ličbu 27 000 infekcijow wob dźeń překročił. Tak su w běhu 24 hodźin 27 086 nowych padow zličili, najwjace z nich we Wulkopólskej na zapadźe kraja. Samsny čas je 445 ludźi w zwisku z wirusom zemrěło. Dotalny rekord běchu srjedu ze 24 692 padami registrowali. Hladajo na drastiske wuwiće je ministerski prezident Mateusz Morawiecki warnował, zo je kraj „jenož hišće kročałku“ wot dospołneho lockdowna zdaleny. Móžny je potom tež dospołny zakaz, dom wopušćić. Wot jutřišeho płaća dalše wobmjezowanja zjawneho žiwjenja. Kina, dźiwadła, muzeje a hotele cyle zawru, runje tak kaž wobchody w nakupowanskich centrumach. Wuwzate su předawarnje žiwidłow, apoteki a drogerije. Wšitke šule dyrbja šulerjow ­internetnje wuwučować.