Waršawa (JBR/SN). Pólski spisowaćel Jakub­ Żulczyk, kiž je prezidenta Andrzeja Dudu „debilneho“ mjenował, bu za to skřiwdźenja najwyšeho dostojnika stata dla wobskorženy. Waršaw­ske sudnistwo je wšak jeho nětko wuwiniło, měnjo: „Mjenować prezidenta debilneho, to je snadna socialna škoda.“ Tež prawiznik Żulczyka rjekny: „Prajić wo někim, zo je „debilny = njekompetentny“, njeje žana křiwda, ale jenož kritika.

Po prezidentskich wólbach w USA w nowembrje 2020 bě Żulczyk w socialnych medijach pólskeho prezidenta kri­tizował, dokelž njebě tón Joewej Bidenej k zastojnstwu prezidenta gratulował kaž wšitcy wulcy politikarjo swěta, ale jenož „k dobrej wólbnej kampani“. Nochcyjo do poražki Donalda Trumpa wěrić ča­kaše Duda hišće na poslednje hłosy. Jeho spodźiwnu reakciju je spisowaćel takle komentował: „Joe Biden je nowy prezident USA, a Andrzej Duda je debilny.“