Marek Krawc rozprawja wo aktualnje rozjimanych temach w Čěskej
Praha. Pućowanske agentury wočakuja tež lětsa zaso jara dobru sezonu. Po hubjenych lětach koronoweje krizy dla chce dźeń a wjace Čechow swój dowol we wukraju w hotelach ze štyrjomi abo samo pjeć hwěžkami dožiwić. Jiřina Ekrt Jirušková, dźěłaćerka internetoweho poskićerja pućowanjow Invia, zdźěli, zo je zajim za dowol we wukraju wo dźesać procentow rozrostł. Předań krótkodobnych pućowanjow budźe lětsa samo hišće wuspěšniša hač loni. Zastupjerjo pućowanskeho běrowa Alexandria zwěsćeja tuchwilu samo rozrost wo 15 procentow. Tón ma za marketingoweho direktora tutoho běrowa Petra Šatneho dwě přičinje. Sprěnja njemóže ludźom nichtó dožiwjenja z dowola wzać a zdruha zhubjeja pjenjezy swoju hódnotu. Lětsa płaći dowol za swójbu z dźěsćomaj w Grjekskej, Turkowskej abo Egyptowskej mjez 63 750 (2 500 eurow) a 76 500 (3 100 eurow) krónami. To rěka, zo njejsu so płaćizny porno lětu 2024 wuraznje změnili. Cyle nawopak samo wjace Čechow je zwólniwych, swoje pjenjezy do drohotnišeho dowola z přidatnymi słužbami inwestować.
