Astronawt Sławosz Uznański-Wiśniewski zbudźa zajim za staciju ISS
Waršawa. Jara hordźi su Polacy na swojeho noweho astronawta w swětnišću. Sławosz Uznański-Wiśniewski je minjeny tydźeń z třomi dalšimi astronawtami na Mjezynarodnu swětnišćowu staciju (ISS) dolećał. Jemu poboku su nawodnica skupiny Peggy Whitson z USA, Indičan Shubhanshu Shukla a Madźar Tibor Kapu. Skupina wužiwaše raketu typa Falcon 9 předewzaća SpaceX Elona Muska a startowaše na swětnišćowym dwórnišću Cape Canaveral w zwjazkowym staće USA Floridźe. Skupina misije „Ax-4“ přebywa dwaj tydźenjej na staciji a ma so po planje srjedź přichodneho tydźenja na zemju wróćić. Za Pólsku je to mjeztym druhi zastupnik w swětnišću: Prěni bě 1978 kosmonawt Mirosław Hermaszewski w sowjetskej rakeće Sojuz. Pólska misiju swojeho astronawta z nimale 70 milionami dolarow financuje.
