Taiwan, kupowy stat w Chinskim morju, přewažny dźěl krajow swěta jako samostatny njepřipóznawa. Najebać to wón we woprawdźitosći jako njewotwisny hižo wot lěta 1949 skutkuje. Poćahi Taiwana z twjerdźinowej Chinu su jara komplikowane a politisce łoskoćiwe. Na njewočakowane wašnje je so do nich w minjenych lětdźesatkach tež eksistenca městnych mjeńšinowych ludow zapletła.

Nastupajo etnisku zestawu wjace hač 24 milionow wobydlerjow Taiwana su 97 procentow populacije Chinjenjo. Jenož mjenje hač tři procenty wobydlerjow kupy (600 000 ludźi) pak tworja „domoródne ludy“ awstroneziskeho pochada.

Taiwanscy „domoródni“ njejsu etnisce a rěčnje jednotni. Mjez nimi rozeznawaja 26 ludow – status oficialnje připóznateje etniskeje skupiny ma tuchwilu 16 z nich. Wone sydla předewšěm we wysokich horach srjedźneho Taiwana; w nowšim času su pak so tež we wulkich městach zadomili. Po ličbje jedna so wo skerje małe ludy (husto jeno z něšto tysacami přisłušnikow). Najwjetši je splah Amis (200 000 ludźi) na wuchodnym přibrjohu, dale su to hórske ludy Paiwan (95 000), Atayal (95 000) a Bunun (60 000).