Marek Krawc rozprawja wo aktualnje rozjimanych temach w Čěskej

Praha. W pjatym měšćanskim dźěle čěskeje stolicy nosy małe naměsto mjez dróhami U Mrázovky, U Blaženky a Nad Bertramkou bórze mjeno njeboh Karela Gotta. Jeho wudowa, Ivana Gottová, bě namjet za přemjenowanje zapodała. Ideja lubi so tež zastupjerjam měšćanskeje rady Prahi 5. Wot 1974 hač do swojeje smjerće bydleše znaty spěwar w jednej z wilow njedaloko naměsta. Nimo toho ma swój row na bliskim pohrjebnišću Malvazinky. „Podpěrujemy próstwu Ivany Gottoveje a tohodla smy namjet komisiji za topografiske podaća Praskeho magistrata předpołožili“, zdźěli Lukáš Herold, měšćanosta Prahi 5. „Karel Gott słuša k najwuznamnišim wosobam kulturnych stawiznow našeho kraja a bydleše wjace hač 40 lět w našim měšćanskim dźělu. Zo změje małe naměsto blisko jeho wile mjeno ‚złoteho hłosa z Prahi’ mam za samozrozumliwe. Chcemy po tutym puću jeho dopomnjeće dostojnje pěstować“, podšmórny Herold.