Marek Krawc rozprawja wo aktualnje rozjimanych temach w Čěskej

Praha. Po zadobywanju ruskich trutow do teritorija NATO je Čěska jednotku helikopterow do Pólskeje pósłała. Wojacy jednotki maja wukubłanje za wosebite zasadźowanja, zdźěli zakitowanska ministerka Jana Černochová njedźelu rano w Čěskej telewiziji. Černochová liči z tym, zo podpěra 150 čěskich wojakow swojich pólskich kolegow tři měsacy dołho. Tak chcedźa Češa přećelam we wuchodnych krajach NATO pomhać. Generalny sekretar NATO Mark Rutte připowědźi minjeny pjatk nowu iniciatiwu sewjeroatlantiskeje aliancy, kotraž rěka Eastern Sentry. Tež čěski wonkowny minister Jan Lipavký šwikaše Rusku zašłu njedźelu na platformje X za prowokacije. Mjeztym bě so dalši ruski trut do rumunskeho teritorija zadobył. Lipavský njewěri, zo bě so Ruska nastupajo lětowu čaru swojich trutow „myliła“. Dale slubi, zo wostanje Čěska ­jako zwjazkarka Ruskej napřećo njedowěrliwa. Lipavský přeje sej krute konsekwency za ruske prowokacije a budźe dalše sankcije přećiwo najwjetšemu statej zemje podpěrować.