Wopyt pólskeho prezidenta Nawrockeho w Berlinje wočakowanja njespjelnił
Waršawa. Wopyt noweho pólskeho prezidenta Karola Nawrockeho w Berlinje spočatk tydźenja žněje wulki wothłós w medijach kraja. Tole so ćim bóle stawa, dokelž bě wopyt hižo zwoprědka z njesměrnymi wočakowanjemi zwjazany. W srjedźišću steješe prašenje reparacijow, kotrež sej Pólska wot Němskeje za wot nacionalsocialistow načinjene škody za čas Druheje swětoweje wójny žada. Nawrocki bě připowědźił, zo chcył łoskoćiwu temu w Berlinje direktnje a raznje narěčeć. Do jeho wopyta Němska trochu nerwoznje na to pokaza, zo je tele prašenje z mjezynarodnymi powójnskimi zrěčenjemi wotbyte a zo nima wotpohlad, wo wotškódnjenju znowa rěčeć.
