Što ludźi w Pólskej aktualnje zaběra? Naš kónctydźenski přehlad Was informuje.

Waršawa (dpa/SN/MG). Pólska chce wot noweho šulskeho lěta šmóratka we wšěch zakładnych šulach kraja zakazać. Knježerstwo we Waršawje je wotpowědny naćisk zakonja schwaliło. Tutón chcedźa přichodnje parlamentej dale dać. Zakazać chcedźa šmóratka wot 1. septembra. Zakładna šula traje w Pólskej do wosmeho lětnika. Planowany zakoń zakazuje wužiwanje mobilnych telefonow a druhich nastrojow, z kotrymiž móža dźěći zwuk a wobrazy natočić, za čas wučby a w přestawkach. Zakoń ma za statne kaž tež priwatne šule płaćić, kaž kubłanske ministerstwo zdźěla. Wuwzaće: šmóratko je we wučbje trěbne. Nimo toho stej wěstota a strowota móžnej přičinje za wosebite rjadowanja. Kubłanska ministerka Barbara Nowacka rjekny, zo reaguje jeje ministerstwo z namjetom na próstwy wučerkow a wučerjow. Nimo toho je połojca pólskich šulow tajke rjadowanje hižo dobrowólnje zawjedła.