Marek Krawc rozprawja wo aktualnje rozjimanych temach w Čěskej
Praha. Wjes Zdechovice leži něhdźe 25 kilometrow zapadnje wobwodneho města Pardubice. W gmejnje bydli něhdźe 700 wobydlerjow. Někotři z nich pak zašłe nocy derje spali njejsu, woni starosća so mjenujcy wulkich podkopkow w susodstwje swojich domow dla. Tohodla su minjene dny podpisma za peticiju zběrali, z kotrejž protestuja přećiwo planowanym geologiskim přepytowanjam fachowcow. „Geologojo chcedźa z točenjemi mnóstwo mangana pod našej wjesku zwěsćić. Z peticiju pak chcemy hižo do zahajenja probowych točenjow wujasnić: Wobydlerjo Zdechovic su přećiwo wudobywanju mangana“, informuje Radomír Stříška, wjesnjanosta potrjecheneje wsy.
