Někotre stawnistwa w Pólskej mandźelstwa homoseksualnych připóznawaja

Lětsa w měrcu je wyše zarjadniske sudnistwo we Waršawje w padźe dweju w Němskej zmandźeleneju muži rozsudźiło, zo měłoj tež pólske wěrowanske wopismo dóstać. Stawnistwje we Waršawje a Wrócławju stej hižo wjacore wukrajne mandźelske wopisma homoseksualnych partnerow do pólskeho registra přenjesłoj. ­Hinak hač w Němskej su procesy na pólskich stawnistwach přewažnje digitalizo­wane. Za zapisanje partnerow jenakeho splaha pak dotal žadyn digitalny formular nimaja. Tohodla je pólski minister za digitalizaciju Krzysztof Gawkowski wukazał, zo maja zarjady dotal wužiwane mustry wěrowanskeho wopisma za mandźelstwa heteroseksualnych wotpowědnje změnić.