35 lět němsko-pólske zrěčenje wo přećelstwje a susodstwje

Berlin/Waršawa (dpa/SN). 35 lět po němsko-pólskim zrěčenju susodstwa stej so krajej na hišće wušu kooperaciju dojednałoj, wšako pohłubšitej zhromadne dźěło we wobłuku wójska. Problemow mjez krajomaj pak je nadal dosć. „Tragiskich stawiznow 20. lětstotka dla, kotrychž smy sej wšitcy wědomi, smy na wosebite wašnje za naš region zamołwići – jako zwjazkarjo w NATO a partnerojo w Europskej uniji“, zwurazništaj wonkownej ministraj Johann Wadephul (CDU) a Radosław Sikorski składnostnje němsko-pólskeho foruma w Berlinje. Na zarjadowanju z něhdźe 700 hosćimi spominachu­ na podpisanje bilateralneho zrěčenja wo přećelstwje a susodstwje před 35 lětami.

Paralelnje podpisaštaj zakitowanski minister Boris Pistorius (SPD) a jeho pólski kolega Władysław Kosiniak-Kamysz we Waršawje nowe wojerske dojednanje. Susodnej krajej přewozmjetej z tym zamołwitosć za swój přichod w Europje, rjekny Pistorius. Kosiniak Kamysz praji, zo je dojednanje šansa za nowu kooperaciju we wobłuku cyberwěstoty a wulce modernych technologijow.