Doha (dpa/SN). Statni a knježerstwowi šefojo nimale 60 arabskich a islamskich krajow su so dźensa na wurjadny wjeršk w Kataru zešli, zo bychu za zhromadnej wotmołwu na powětrowy nadpad Israela na emirat w Persiskim zaliwje pytali. „Wažimy sej nastajenje arabskich a islamskich krajow a jich solidaritu hla­dajo na israelsku agresiju“, rjekny ministerski prezident Katara Mohammed bin Abdulrahman Al Thani w stolicy Doha.

Israelske wojerske lětadła běchu minjenu wutoru spytali, nawodnistwo islamistiskeje organizacije Hamas w Kataru morić. Po informacijach Hamas pak je nadpad zwrěšćił. Nadpad běchu mjezynarodnje raznje zasudźili. Katar rěčeše wo „statnym terorizmje ze stron Israela“.

Medije wočakowachu, zo dojednaja so nawodźa arabskich a islamskich statow na zhromadnu deklaraciju z jasnymi słowami. Ministerski prezident Al Thani sej žadaše, zo dyrbjeli słowam skónčnje tež skutki slědować. Zdobom chcedźa diplomatiske prócowanja k skónčenju Gazaskeje wójny dale wjesć a zesylnić.

Komunalne wólby w Sewjerorynsko-Westfalskej tež test za Berlin byli

Düsseldorf (dpa/SN). CDU je w komunalnych wólbach w Sewjerorynsko-Westfalskej (NRW) najebać snadne straty dale najsylniša politiska móc. K dobyćerjam wólbow w na wobydlerjach najbohatšim zwjazkowym kraju Němskeje pak słuša tež AfD, kotraž je swój wuslědk potrojiła. Z tym zaběra wona třeće městno. Druha je SPD. Zeleni su přirunujo z komunalnymi wólbami 2020 kopicu wolerjow zhubili.

Wothłosowanje w NRW bě zdobom prěni test politiskeje nalady za nowe zwjazkowe knježerstwo CDU/CSU a SPD pod nawodom zwjazkoweho kanclera Friedricha Merza (CDU) po dočasnych wólbach zwjazkoweho sejma lětsa w februaru.

Po tuchwilnym kónčnym wuslědku je CDU w měšćanskich radach a wokrjesnych sejmikach 33,3 procenty (2020: 34,3 procenty) docpěła. SPD dósta 22,1 procent (2020: 24,3 procenty), zdźěli krajna nawodnica wólbow. AfD zdoby sej w Sewjerorynsko-Westfalskej 14,5 procentow (2020: 5,1 procent), Zelenych woleše 13,5 procentow (2020: 20,0 procent). W NRW bě AfD Zelenych hižo we wólbach zwjazkoweho sejma 23. februara přesćahnyła.

Dotal znajemy Gelsenkirchen předewšěm jako město legendarneho koparskeho kluba Schalke 04. Do stawiznow města słušachu 140 lět podkopki za wudobywanje kamjentneho wuhla. Porno Łužicy bě w Gelsenkirchenje kaž po cyłej Poruhrskej změna strukturow łahodna. Dwaceći lět su woby­dlerjo zapadneje Němskeje z „wuhlowym pjenježkom“ na kóždej zličbowance za milinu dźěłowe městna hórnikow subwencionowali. Wotnětka pak je AfD hromadźe z SPD najsylniša frakcija w Gelsenkirchenskej měšćanskej radźe, w třoch z pjeć zastupnistwow měšćanskich wobwodow steji módra strona na čole. To su sakske politiske poměry w Poruhrskej. Trójce tak wjele hłosow za AfD kaž před pjeć lětami w komunalnych wólbach zwjazkoweho kraja, hdźež je wjac ludźi žiwych hač po cyłym wuchodźe – to pokazuje, zo njeje AfD hižo zjaw wuchoda. Je najwjetši čas, strózbu analyzu přičinow toho nachwatać. Wšako su wšě apele „přećiwo prawicarjam“ wočiwidnje za stareho Frycu. Marcel Brauman

Lipsk/Drježdźany/Kamjenica. (dpa/SN) Do zahajenja noweho studijneho lěta su studentske internaty w sakskich uniwersitnych městach nimale dospołnje wu­ćežene. Mnozy studowacy čakaja na městno, kaž z naprašowanja dpa wuchadźa. Dohromady su studentam w Lipsku, Drježdźanach a Kamjenicy wjace hač 12 900 městnow w internatach přewostajili. Kopica zajimcow pak nima hišće bydlenje. Jeničce w Drježdźanach potrjechi to kóžde lěto něhdźe 1 000 młodostnych. W Lipsku steji něhdźe 200 studentow na čakanskej lisćinje, w Kamjenicy nimale 500.

Podruž je jara rozdźělna a saha wot něhdźe 170 eurow za jednoru stwu hač do 500 eurow za moderne saněrowane bydlenje. Zdźěla su tež płaćizny stupali. W Drježdźanach a w Lipsku drje maja so internaty w přichodźe saněrować abo nowe nastać, tola potrjeba za bydlenjemi tute planowanje njekryje. W Kamjenicy njejsu dotal nowotwary předwidźane.

Swobodny kraj Sakska chce studentske bydlenja w přichodźe přidatnje z pjeć ­milionami eurow lětnje podpěrać. Tak chcedźa financne njedostatki wurunać.