Berlin (dpa/K/SN). Zwjazkowy justicny minister Heiko Maas (SPD) je přiznał, zo su přisłušne městna ze Syričanom, kiž bě na Berlinske hodowne wiki atentat skućił, wopak wobchadźeli a zo zdźěła wón wotpowědnu rozprawu. „Po tym štož je so stało a štož je so mjeztym wukopało, njemóže nichtó rjec, zo njejsu žane zmylki byli“, rjekny Maas wčera wječor w telewiziji ZDF. K tomu wón zwurazni, zo budźe přepytowane, čehodla njeběchu njeskutkej zadźěwać móhli, byrnjež Anis Amri instancam hač k Centrumej za wotwobaranje terora znaty był. Zwjazkowy nutřkowny minister Thomas de Maizière (CDU) je hižo někotre dny po njeskutku tajku rozprawu připowědźił.

Wojerske jednotki USA su, po puću do wuchodneje Europy, wčera a zawčerawšim tež we Łužicy byli. Wone přisłušeja kontingentej 4 000 wojakow NATO, kotřiž maja pječa Baltikum a Pólsku před Ruskej škitać. Tež Łužičenjo so starosća. Kemšerjo budu njedźelu w Slepom wo tym w prědowanju a próstwach słyšeć.

Jackpot při parkowanskim awtomaće dobył je 48lětny muž w bayerskim Memmingenje. Jako chcyše muž z pjećeurowskej bankowku parkowanski lisćik zapłaćić, wróći jemu defektny awtomat hromadu drobnych pjenjez – dokładnje 201,50 eurow. Sprawny muž wšak woteda pje­njezy na policajskej straži. Awtomat pak je mjeztym zwuporjedźany.

Móšeń z lódzymneje rěki wućahnył je wuchowanski płuwar w Hornjej Pfalcy a je tak žonje z wuskosćow pomhał. 30lětnej bě móšeń z pjenjezami, wupokazom a pjenježnej kartu w Ambergu do rěki Vils padnyła. Jeje synk bě do toho spytał swoju čapku do rěki ćisnyć. Mać drje móžeše tomu zadźěwać, při tym pak jeje móšeń do wody padny. Žona zawoła policija a ta towaršnosć za wuchowanje žiwjenja. Płuwar zalěze do rěki a móžeše 30lětnej móšeń skónčnje přepodać.

Mainz (dpa/K/SN). Městopředsydka CDU Julia Klöckner pomina, ćěkancow efektiwnišo kontrolować. „Dyrbimy wědźeć, štó w našim kraju je. Tohodla njesmě być žanych wjacekrótnych registrowanjow a ilegalnych dwójnych identitow“, rjekny předsydka porynsko-pfalcskeje CDU. „Je lědma wěrjomne, zo je Berlinski aten­tatnik 14 identitow měł, a nichtó toho­dla skutkownje njezakroči.“ Načolnistwo CDU wotměje wot jutřišeho klawsuru w posaarskim Perlu.

Žurnalisća kritizuja Trumpa

Berlin (dpa/SN). Nowinarska konferenca Donalda Trumpa w New Yorku po měnjenju Zwjazka žurnalistow Němskeje (DJV) dopokazuje, zo njeje wón rólu medijow zrozumił. Wočiwidnje je jako přećiwnikow wobhladuje a njerozumi, zo su medije a žurnalisća njeparujomni, zo by demokratija fungowała, praji rěčnik DJV Hendrik Zörner powěsćerni dpa. Trump bě wčera internetnu nowinu BuzzFeed „hromadu njerjada“ mjenował a reporterej CNN ze słowami „ty sy fake-news“ znjemóžnił so jeho něšto prašeć.

Nochcedźa na wójnsku łódź