Nowy sejm so schadźuje

Montag, 09. November 2015 geschrieben von:

Waršawa (dpa/SN). Nowowuzwoleny pólski parlament zeńdźe so štwórtk, 12. nowembra, k swojemu konstituowacemu posedźenju. Tole je rěčnica kenclije pólskeho statneho prezidenta Andrzeja Dudy we Waršawje zdźěliła. Hišće w zastojnstwje rěčnika knježerstwa skutkowacy Cezary Tomczyk je termin mjeztym jako „jara njezbožowny“ kritizował. Tón dźeń kónči so wurjadne wjerškowe zetkanje wo ćěkancach na kupje Malta. Dokelž­ je na konstituowanju sejma tež pušćenje dotalneho knježerstwa přez prezidenta předwidźane, njemóžetej ani dotalna ministerska prezidentka Ewa Kopacz ani nowa ministerska prezidentka Beata Szydło Pólsku na wjerškowym zetkanju reprezentować.

Narodnokonserwatiwna strona Prawo a sprawnosć bě wólby parlamenta 25. oktobra jasnje dobyła a smě nětko jako prěnja strona po lěće 1989 z absolutnej wjetšinu w parlamenće knježić. Kaž kenclija noweje premierki Szydło zdźěla, je ju zwjazkowa kanclerka Angela Merkel (CDU) mjeztym do Berlina přeprosyła.

ANO nawjeduje

Montag, 09. November 2015 geschrieben von:

Praha (ČŽ/K). Z wulkim předskokom by hibanje ANO dobyło, bychu-li nětko wólby čěskeho parlamenta byli. Za nje by so mjenujcy 28 procentow wolerjow wuprajiło, wuchadźa z woprašowanja, přewjedźeneho wot zwěsćowarnje měnjenjow TNS Aisa za Čěsku telewiziju. Wotstawk k druhemu, ČSSD, wučinja mjeztym dwanaće dypkow, dokelž nazběrachu socialdemokraća jeničce hišće 16 procentow a tak znowa tři procenty mjenje hač naposledk. Do delnjeje komory bychu dale zaćahnyli KSČM z 12,5 procentami, TOP 09 z 9,5 proc., ODS z wosom a KDU-ČSL z 5,5 procentami. Zwonka njeje wostali bychu mjez druhimi Piraća (2,5 proc.), Úsvit (2) kaž tohorunja Zeleni (1).

Agentura TNS Aisa je so tež za akceptancu knježerstwa z ČSSD, ANO a KDU-ČSL wobhonjała. Wuslědk wupokazuje, „zo dowěrja kabinetej premiera Bohuslava Sobotki jenož hišće 38 procentow, mjeztym zo je ličba jemu njedowěrjacych na 61 proc. zrostła. Bjezdwěla to zjaw, kiž móhł zadźiwać hladajo na trajacy róst čěskeho hospodarstwa. Za hłownu přičinu maja eksperća postupowanje knježerstwa w migraciskej krizy.

Wobnowja partnerstwo

Freitag, 06. November 2015 geschrieben von:
Praha (ČŽ/K). Stolica Čěskeje wotmysli partnerstwo z Moskwu a Pětrohrodom wobnowić. Wotpowědny namjet primatorki Adriany Krnáčoveje (ANO) je přisłušny wuběrk měšćanskeho parlamenta tele dny schwalił, kaž dźenik Lidove novíny wozjewja. Partnerstwo z najwažnišimaj ruskimaj wulkoměstomaj bě Praha loni w septembru konfliktneho połoženja na wuchodnej Ukrainje a anektowanja połkupy Krim dla přez Rusku wupowědźiła. Swój čas bě tehdyši primator Prahi Tomáš Hudeček dalše čěske města namołwił kročel stolicy sćěhować, rezonancy pak njenašoł. Kaž wuběrk měni, su přičiny wotbyte, kotrež běchu k přetorhnjenju zwiskow wjedli. Primatorka pokaza ze swojeje strony na dopis wonkowneho ministerstwa, wobsahowacy próstwu na Prahu, swoju dotalnu poziciju přehódnoćić. Partnerstwo mjez Prahu a Moskwu bu lěta 2000 ze zrěčenjom wo přećelskich­ poćahach a zhromadnym dźěle skowane. Opozicionelna strona w Praskim měšćanskim sejmje TOP 09 rozsud kritizuje.

Prezident knježerstwo kritizował

Donnerstag, 05. November 2015 geschrieben von:

Kriza ćěkancow dla tež Słowaksku zaběra, byrnjež so kraj spjećował, přiwzać kwotowanu ličbu ćěkancow. Tole je jedna z temow měsačneje kolumny Petera Čačka z Bratislavy za SN:

Starosća so wo Karela Gotta

Mittwoch, 04. November 2015 geschrieben von:

Praha (dpa/SN). Fanojo a přećeljo starosća so wo sławneho čěskeho šlagroweho spěwarja Karela Gotta, po tym zo bu znate, zo je wón na raka schorjeł. Sta ludźi z Čěskeje a Němskeje přeja jemu w socialnych internetnych syćach wjele mocy a bórzomne wustrowjenje, kaž mandźelska Gotta Ivana medijam zdźěli. Wčera wona zjawnosć wo tym informowaše, zo běchu lěkarjo při operaciji 76lětneho rak lymfow zwěsćili. Nětko je Gott w Praskim centrumje za lěkowanje raka „w najlěpšich rukach“, kaž Ivana Gottová zdźěli. Kak dołho móhło lěkowanje trać, njeje wotwidźomne, chorownja z dowolnosću Gotta zdźěli. Dalše informacije njewozjewichu. Kaž šeflěkar zdźěli, so skupina fachowcow z najmodernišimi metodami wo sławneho pacienta stara.

Karel Gott bě hižo tydźenja wšitke planowane koncerty wotprajił. Tež při spožčenju čěskeho publikumoweho myta „Sołobik“ kónc nowembra wón přitomny njebudźe. Při tym ma dobre šansy, zo jemu myto najwoblubowanišeho interpreta mjeztym 40. króć spožča.

Pólska planuje dawk za wulkokupnicy

Dienstag, 03. November 2015 geschrieben von:
Waršawa (dpa/SN). Pólscy narodnokonserwatiwni, kotřiž běchu z wólbow parlamenta 25. oktobra jako najsylniša strona wušli, planuja wosebity dawk za wulkokupnicy žiwidłow. Na te wašnje chcedźa małe wobchody w konkurencnym boju skrućić. Wotpowědny naćisk zakonja spočatk přichodneho lěta parlamentej předpołoža. Tole je zapósłanc narodnokonserwatiwneje strony Prawo a sprawnosć (PiS) Henry Kowalczyk powěsćerni PAP rjekł. Superwiki z płoninu wjace hač 250 kwadratnych metrow maja přichodnje dwaj procentaj dawka płaćić. Stat chcył tak něhdźe 840 milionow eurow wuzbytkować. Superwiki su zwjetša w němskich a francoskich rukach.

Nowe pišćele za katedralu

Montag, 02. November 2015 geschrieben von:

PIŠĆELETWARCY z cyłeje Europy chcyli katedralu swj. Wita na Praskich Hradčanach z nowymi pišćelemi wuhotować. 14 tajkich firmow, najwjace z nich z Němskeje, je so na wotpowědne wupisanje přizjewiło. „Z wothłosa producentow sćěhujemy, zo jedna so wo jedyn z najwuznamnišich, jeli nic najwuznamniši europski projekt“, rjekny zamołwity ze stron Praskeje arcydiecezy Štěpán Svoboda nowinje Mladá fronta dnes. Nowy wulkotny instrument změje wjace hač 6 000 pišćelowych pišćałkow, z čimž budźe najwjetši po cyłej republice. Nimo renomeja pišćeletwarcow bjezdwěla tež financna stronka wabi, kalkuluje dźě so z płaćiznu 50 do 100 milionow krónow (1,85 do 3,7 milionow eurow). Wulki dźěl pjenjez přinošuje katolska cyrkej, nadawkidawar pak nadźija so zdobom wjele šćedriwych sponsorow. „Jednotliwcy móža za pišćałki pjenjezy darić“, zwurazni Praski arcybiskop kardinal Dominik Duka. Prěni raz zaklinčeć měli nowe pišćele lěta 2018 składnostnje 100. róčnicy załoženja Čěskosłowakskeje.

„Radikalna změna doprawa“

Freitag, 30. Oktober 2015 geschrieben von:

Opoziciska strona PiS wólby parlamenta w Pólskej republice dobyła

Waršawa. Pólske medije tele dny wuslědk njedźelnych wólbow parlamenta dokładnje a wobšěrnje analyzuja. Fakt je, zo je so politiska karta kraja porno wólbam před štyrjomi lětami dospołnje změniła. Tehdy bě narodnokonserwatiwna strona Prawo a sprawnosć (PiS) Jarosława Kaczyńskeho jenož na wuchodźe Pólskeje wuspěšna. Srjedźne a zapadne kónčiny su swój čas liberalno-konserwatiwnu Wobydlersku platformu (PO) wolili. Minjenu njedźelu bě połoženje dospołnje hinaše: PO bě runje hišće w dwěmaj wojewódstwomaj na sewjeru kraja wuspěšna. Wšitke tamne kónčiny su bjez wuwzaća PiS wolili a so tak wo zasadnu politisku změnu postarali. Po oficialnym hamtskim wólbnym wuslědku je PiS 235 mandatow w sejmje zdobyła a móže tam přichodnje bjez koaliciskeho partnera sama­ knježić. Dotal knježaca PO ma 138 sydłow a dyrbi nětko do opozicije. Kedźbyhódny je tež wuspěch rockoweho hudźbnika Paweła Kukiza. Jeho strona Kukiz’15 změje 42 sydłow. W stronje hromadźa so předewšěm nacionalistiske a prawicarske mocy.

Strowotny staw Gotta stabilny

Donnerstag, 29. Oktober 2015 geschrieben von:
Praha (dpa/SN). Sławny čěski šlagrowy spěwar Karel Gott dyrbi problemow wutroby dla najprjedy raz w jednej z Praskich chorownjow wostać. 76lětneho běchu operowali. Jeho strowotny staw je stabilny, komplikacijow njeje, kaž jeho mandźelska Ivana Gottová wčera nowinarjam zdźěli. Do toho běchu fanojo hodźiny na powěsć čakali. Woblubowany interpret je mjeztym wšitke planowane koncerty wotprajił, kaž jeho rěčnica wobkrući. Gott bě so zawčerawšim, wutoru, njewočakowano zwjezł. Na to dowjezechu jeho do chorownje. Dale jeho rěčnica zdźěli, zo prosy Karel Gott medije w zwisku ze swojim schorjenjom wo „čłowjeskosć, zrozumjenje a přistojnosć“. Hakle w juliju bě Gott k swojim 76. narodninam rjekł: „Čuju so wulkotnje. Sym w absolutnej formje.“ W juliju 2003 bě jeho snadna forma Božeje ručki zajała. Spěwar pak móžeše so dospołnje wustrowić. Jako „złoty hłós z Prahi“ znaty wuměłc steji nimale 60 lět na jewišću a je po trochowanju fachowcow wjace hač 30 milionow zynkonošakow předał.

Mjeńšinowy zakoń blokował

Mittwoch, 28. Oktober 2015 geschrieben von:
Waršawa (dpa/SN). Dwaj dnjej po dobyću narodnokonserwatiwneje strony Prawo a sprawnosć při wólbach parlamenta je pólski statny prezident Andrzej Duda swój weto přećiwo planowanej změnje mjeńšinoweho zakonja zapołožił. Noworjadowanje měješe přisłušnikam narodnych mjeńšin zmóžnić, na wokrjesnych zarjadach swoju maćeršćinu jako pomocnu rěč wužiwać. Dotal je tole jeničce na gmejnskej runinje móžno. Při wšitkich druhich kontaktach ze zarjadami ma so pólšćina jako hamtska rěč nałožować. W Pólskej bydla mjez druhim Němcy, Ukrainjenjo, Litawčenjo a Romojo jako narodne a etniske mjeńšiny. Kaž kenclija prezidenta zdźěli, je Andrzej Duda swoje spřećiwjenje hłownje z financnych přičin zapodał. Wón so boji, zo je noworjadowanje zakonja z přidatnymi kóštami zwjazane. Narodnokonserwatiwny Duda bě po swojim wuzwolenju za prezidenta hižo raz weto zapołožił a tomu zadźěwał, zo móhli transseksualni swój splah we wupokazu a druhich dokumentach lóšo změnić dać.

Anzeige