Merz: Kónc brunicy do 2038
To a tamne (26.08.21)
Znajmjeńša 56 króć je 56lětny wodźer Lkw-ja bjez jězbneje dowolnosće po puću był. Zastojnicy zadźeržachu muža tele dny z jeho dwanaće tonow ćežkim wozydłom při kontroli w sewjerorynsko-westfalskim Troisdorfje. Při tym zwěsćichu, zo běchu jemu hižo w měrcu jězbnu dowolnosć wzali. Na zakładźe elektroniskeje dokumentacije, kotraž při kóždej jězbje šofera registruje, móžachu dopokazać, zo bě wón najebać to dale jězdźił. Kajke chłostanje mužej nětko hrozy, njemóžeše policija najprjedy raz rjec.
Ze žumpadła wućahnyli su policisća 81lětneho na brjoze Běłeho Halštrowa w vogtlandskim Adorfje. Pobrjóžne łučiny běchu sylneho dešća dla chětro rozmokane, tak zo njemóžeše so rentnar ze swójskeje mocy sam z hłubokeho błóta wuswobodźić. Pěšcy słyšachu jeho wołać a informowachu policiju.
Merkel z deklaraciju w sejmje
Berlin (dpa/SN). Zwjazkowa kanclerka Angela Merkel (CDU) chcyše dźensa w zwjazkowym sejmje knježerstwowu deklaraciju k debaklej při cofnjenju Zwjazkoweje wobory a zapadnych zwjazkarjow z Afghanistana přednjesć. Parlament chcyše na to wotměwacu so ewakuaciju němskich staćanow a afghaniskich pomocnikow z mandatow potwjerdźić. Nic naposledk wočakowachu rozsud sejma k podlěšenju epidemiskeho połoženja narodneho rozměra koronawirusa dla.
Ćahi zaso jězdźa
Berlin/Lipsk (dpa/SN). Po skónčenju cyłoněmskeho stawka Dźěłarnistwa lokomotiwnikow Němskeje je železniski wobchad w Saksko-Anhaltskej, Sakskej a Durinskej zaso „w dalokej měrje normalny“. Přiwšěm su hišće tu a tam někotre haćenja, kaž rěčnik železnicy zdźěli. Lokomotiwnicy běchu stawk dźensa rano w 2 hodź. skónčili. Pućowacym radźa so na internetnej stronje železnicy informować, hač jězbny plan zaso płaći.
Charlie Watts zemrěł
Steinmeier tři dny w Čěskej
Bórze kónc lětow
To a tamne (25.08.21)
Ze syčenjom a pozdatnymi nadpadami je so zabłudźeny wuž (Ringelnatter) policistam spjećował, kotřiž chcychu jeho popadnyć. Za ludźi njestrašny had bě so na hóstny nuznik jednoswójbneho domu w delnjosakskim Bodenfelde zadobył. Jako pomoc při wlečenju słužeštej jemu kij při sćěnje domu a wotewrjene wokno. Skónčnje so policistej poradźi, hada z hóčku popadnyć a jeho do kisty tyknyć. W lěsu wusadźeny so tón spěšnje w kerčinje zminy.
Ze šotrowymi kamjenjemi na kolijach su dźěći na Rujanach jedyn z ćahow zadźerželi, kotrež za čas stawka lokomotiwnikow scyła hišće jězdźachu. Potrjecheny bě regionalny ćah mjez Stralsundom a Bergenom. Lokomotiwnik móžeše runje hišće borzdźić a zastać. Policija přepoda třoch hólcow w starobje wosom, dźewjeć a dźesać lět wustróžanym staršim.
Žona na čole New Yorka
New York (dpa/SN). Prěni króć w swojich stawiznach ma stat New York guwernerku. Po tym zo bě dotalny guwerner Andrew Cuomo po wumjetowanjach splažneho wobćežowanja dla wotstupił, steji nětko Kathy Hochul na čole zwjazkoweho stata USA. 62lětna přewza dźensa jako prěnja žona politiski nawod kónčiny na wuchodnym pobrjoze z nimale 20 milionami wobydlerjow, ke kotrejž tež město New York słuša. Dotal bě Hochul, kaž Cuomo čłonka demokratow, jeho zastupjerka.
Katastrofy nětko časćišo
Offenbach (dpa/SN). Změna klimy powjetša móžnosć ekstremnych zliwkow a z nimi zwjazanych katastrofow zapławjenja, kaž njedawno w Porynsko-Pfalcy a Sewjerorynsko-Westfalskej. To je wuslědk přepytowanja mjezynarodneho cyłka wědomostnikow, mjez druhim Němskeje wjedroweje słužby. Pod tuchwilnymi wobstejnosćemi wočakuja, zo regiony zapadneje Europy kóžde 400 lět tajku katastrofu dožiwja. Čim bóle so zemja woćopla, ćim časćišo so tajke ekstremne wjedro jewi.
Wojerske parady přewjedli
