Čěska zawěra pólnu chorownju
Praha (dpa/SN). Za čas druheje žołmy koronawirusa loni nazymu bě čěske wójsko na terenje Praskich wikow wulku pólnu chorownju z 500 łožemi natwariło. Nětko wšitko zaso wottwarja, bjez toho zo su ju hdy wužiwali. To je čěski minister za strowotnistwo Jan Blatný w Praze připowědźił. Wot wšeho spočatka njebě jasne, zwotkel měli personal brać, zo móhli pacientow zastarać. Kritikarjo na to skedźbnichu, zo bychu ludźo na druhich městnach pobrachowali. Jeničce za podruž je čěski stat dotal něhdźe dwaj milionaj eurow wobsedźerjej wikoweho areala płaćił. Podobnu nuzowu chorownju w druhim najwjetšim měsće Brnje chcedźa přichodnje jako šćěpjenski centrum wužiwać.
Protesty přećiwo wobmjezowanjam koronawirusa dla mjeztym přiběraja. Před sydłom knježerstwa w Praze je so minjeny kónc tydźenja něhdźe połsta ludźi z transparentami kaž „Dźěći wróćo do šule“, zhromadźiło, powěsćernja ČTK rozprawja. Na historiskim Karlowym mosće, hdźež njesmědźa awta poprawom jězdźić, stejachu wjacore jězdźidła z pokiwami na internetne protestne strony.
Za klimowy fonds
Wobmjezowanja zběhnyć abo nic?
Drježdźany/Berlin (dpa/SN). Sakska wo tym rozmysluje, wobmjezowanja koronawirusa dla po 15. februaru krok po kroku zběhnyć. Při tym dźe wo to, šule a pěstowarnje runje tak kaž frizerske salony poněčim zaso wotewrěć, rjekny zastupowacy ministerski prezident Martin Dulig (SPD) po posedźenju krajneho knježerstwa w Drježdźanach.
Zwjazkowa kanclerka Angela Merkel (CDU) porno tomu wolóženja aktualnych wobmjezowanjow swobodneho pohibowanja wotpokazuje. Wona wšitkich ludźi prosy „hišće chwilu přetrać“, kaž rjekny wčera wječor w telewiziji ARD. Wuwiće ličby infekcijow je drje pozitiwne, z cyłoněmskej incidencu snadnje pod sto pak nimaja strowotniske zarjady přeco hišće dospołnu kontrolu nad wirusom. Na tym měli dale dźěłać, kanclerka podšmórny.
To a tamne (03.02.21)
Swoju škitnu funkciju dopokazał je nahubnik – byrnjež hinak hač myslene. 63lětna šafnerka bě w ćahu w Hessenskej pućowaceho kontrolowała. Muž jej jězbny lisćik skrótka pokaza, nochcyše pak jón jej dać. Jako sej žona lisćik hrabny, jej pasažěr do ruki kusny. Bě pak zabył, zo ma nahubnik před hubu. To šafnerku před zranjenjemi škitaše. Na dwórnišću muž twochny.
Z parodistiskim přizjewjenjom jako móžny organizator Olympiskich lětnich hrow 2032 je finska gmejna Salla na samym sewjeru kraja kedźbnosć zbudźiła. „Hač do toho budźetej sněh a lód zhubjenej a wubědźowanja kaž płuwanje, nurjenje a bičwolejbul budu móžne“, w ironiskim wideju rěka. Zamołwići gmejny, kotraž słuša k najzymnišim blečkam kraja, chcedźa po tymle puću na přiběracu změnu klimy skedźbnić.
Winowatosć nahubnikow w USA
Washington (dpa/SN). W boju přećiwo rozpřestrěću koronawirusa dyrbja ludźo w USA wot dźensnišeho po cyłym kraju w zjawnych wobchadnych srědkach nahubniki wužiwać. Wotpowědny wukaz bě nowy ameriski prezident Joe Biden krótko po zapokazanju do zastojnstwa 20. januara podpisał. Biden bě bój přećiwo pandemiji za jedyn ze swojich najwažnišich nutřkopolitiskich zaměrow deklarował. USA su wosebje potrjechene.
Awstriska naprawy zběhnje
Wien (dpa/SN). Pod ćišćom hospodarstwa a tójšto wobydlerjow chce Awstriska po šěsć tydźenjach kruteho lockdowna koronapandemije dla wot 8. februara zaso wšitke wobchody wotewrěć, ale pod přiwótřenymi předpisami. Tak dyrbja ludźo nahubniki typa FFP2 wužiwać. Nimo toho ličbu kupcow wobmjezuja. Tež frizerojo smědźa zaso dźěłać. Ludźo pak dyrbja negatiwny test korony předpołožić. Šule budu tohorunja zaso wotewrjene a wučba w změnach podawana.
Biden hrozy nowym mócnarjam
Runje tak móže so tale łódź z kontejnerami pod Hohenzollerskim ...
Přichodnje mjeńše jězorypo brunicy
Podstupim (SN). Braniborski krajny sejm je minjeny kónc tydźenja naćisk nastupajo wobchadźenje ze sćěhami wudobywanja brunicy jednohłósnje schwalił. Přichodnje nimaja tuž w Braniborskej wjace žane hoberske jězory po brunicowych jamach nastać. „Při planowanju brunicy maja w hórnistwowym a wodoprawniskim nastupanju na to dźiwać, zo su nowe jězory po wulkosći, połoženju a formje tak zapołožene, zo so přichodnje tak mało wody kaž móžno wupari“, rěka wo wobzamknjenju. Tak je wjetšina parlamenta poručenju Zeleneje ligi wotpowědowała. Wobswětoškitna syć zastupuje tele žadanje hižo wot lěta 2015. W awgusće 2020 bě wona wotpowědny poziciski dokument ze žadanjemi na aktualne planowanske procesy we łužiskim brunicowym rewěrje předpołožiła.
Saksku AfD wotnětka wobkedźbuja
Drježdźany (dpa/SN). Krajny zarjad za wustawoškit Sakskeje wobhladuje AfD po informacijach powěsćernje dpa wotnětka jako „podhladny pad“. Tak je móžno stronu ze srědkami tajnych słužbow dohladować, na přikład telefonaty wotposkać abo tajnych wuskušowarjow zasadźić. Oficialne wobkrućenje informacije ze stron zarjada dotal nimaja.
Zwjazkowy předsyda AfD a zapósłanc Sakskeho krajneho sejma Tino Chrupalla rěči w tym zwisku wo „wólbnotaktiskim manewrje. Při tym dźe wustawoškitej a krajnemu knježerstwu jeničce wo to, najwjetšu opozicisku stronu w swobodnym staće w politiskim wubědźowanju wočornić.“ Ludźo w swobodnym staće pak su kmani to spóznać.
Městopředsyda sakskeje AfD Siegbert Droese mjenuje postupowanje wustawoškita „dotal njesłyšany politiski skandal“. Strona chce so tomu ze wšěmi juristiskimi srědkami wobarać. AfD ma w Sakskej něhdźe 2 600 čłonow. Wona je po wólbach krajneho sejma 2019 ze 27,5 procentami druha najsylniša móc.
„Tableta změrowanja ludźi“
Wuradźowanje wo šćěpjenju ludźi přećiwo koronawirusej žněje kritiku
Berlin (dpa/SN). Wčerawši tak mjenowany „šćěpjenski wjeršk“ zwjazkoweje kanclerki Angele Merkel (CDU) z ministerskimi prezidentami a dalšimi zastupnikami zbudźa dosć rozdźělne reakcije. Předewšěm opozicija je njespokojom.
Frakciski předsyda Zelenych Anton Hofreiter rjekny nowinarjam: „Tónle wjeršk je misnjenja knježerstwa wotkrył.“ Wot zwjazkoweho knježerstwa a Europskeje komisije sej wón žada, zo matej při wobstaranju seruma zhromadnje postupować. Zwjazkowe knježerstwo dyrbjało nastawace přidatne inwesticije producentow k přerjadowanju produkcije „wulkomyslnje“ přewzać a firmam garantować, zo jim wšón serum wotewza.
Za 120 000 ludźi šćěpiwo skazali
Drježdźany (dpa/SN). Sakska wočakuje nětko w februaru šćěpiwo pře koronawirus za 120 000 ludźi. „Pola firmy Biontech smy 157 000 dozow, pola Astrazeneca 74 000 a pola Moderna 13 200 dozow skazali“, je sakske socialne ministerstwo wčera na naprašowanje medijow zdźěliło. Cyłkownje liči swobodny stat z 244 200 dozami seruma a tak z wjace hač poprawom připowědźene. Po staršim stawje planowanja bě dodawanje 136 000 dozow předwidźane.
Po informacijach ministerstwa je wot zahajenja šćěpjenja 27. decembra 88 576 ludźi w Sakskej prěnju sykawu dóstało a 16 322 mjeztym tež druhu. Socialne ministerstwo swobodneho stata potwjerdźi, zo njeje rozdawanje terminow tuchwilu dospołnje přetorhnjene. Njejsu-li mobilne šćěpjenske mustwa abo šćěpjenske centrumy serum w běhu dnja přetrjebali, přińdu hnydom nowe terminy do knihowanskeho systema. Dyrbjało-li hišće wjace šćěpiwa k dispoziciji być, móhli hnydom tež wjace terminow šćěpjenja rozdawać. Hłowne ćežišćo pak je přeco hišće zastaranje wobydlerjow starownjow a hladarnjow ze serumom.
