Zhromadnje w EU
Brüssel (dpa/SN). Do dźensnišeho widejoweho wjerška Europskeje unije je sej politikar Zelenych Sven Giegold „synchronu koronapolitiku w Europje“ žadał. Runje noweje wulce natykliweje warianty koronawirusa dla je zhromadne postupowanje ćim wažniše, rjekny Giegold powěsćerni dpa. Zwjazkowa kanclerka Angela Merkel (CDU) chcyše dźens wječor ze swojimi kolegami w EU wo naležnosći wuradźować. Jedna z temow je móžne zawjedźenje europskeho wupokaza za tych, kotřiž su pře koronu šćěpjeni, a z nim zwjazane swobody, kaž pućowanje abo wopyt hosćencow.
Europska politikarka FDP Nicola Beer je sej dźensa žadała, za šćěpjenych wobmjezowanja koronawirusa dla spěšnje zběhnyć, zo móhli so do normalneho žiwjenje bjez statnych zasahow wróćić.
Wolóženi po zapokazanju Bidena
Washington (dpa/SN). Prezident USA Joe Biden je hodźiny po zapokazanju nawrót Zjednoćenych statow Ameriki k Pariskemu klimowemu zrěčenju zahajił. Tak je 78lětny, kaž bě připowědźił, dwělomny rozsud swojeho předchadnika Donalda Trumpa skorigował. Biden podpisa wčera wotpowědny spis Zjednoćenym narodam. Krótko na to je generalny sekretar UNO António Guterres čłonske staty informował, zo su USA wot 19. februara zaso dźěl zrěčenja a zo so na posedźenjach wotnětka zaso wobdźěleja.
Politikarjo w Němskej reaguja wolóženi na noweho prezidenta USA. „Wjeselu so na nowy kapitl němsko-ameriskeho přećelstwa a zhromadneho dźěła“, zdźěli zwjazkowa kanclerka Angela Merkel (CDU) po słowach jeje rěčnika Steffena Seiberta. Zapokazanje Bidena a wiceprezidentki Kamale Harris bě „swjedźeń ameriskeje demokratije“. Zwjazkowy prezident Frank-Walter Steinmeier rjekny: „Wjeselimy so, zo mamy USA jako njeparujomneho zwjazkarja we wažnych mjezynarodnych prašenjach zaso poboku.“
To a tamne (21.01.21)
Drjewjana postawa wirologi Christiana Drostena jako rudnohórski kurjak ma hižo bórze městno w muzeju dóstać. Bonnski Dom stawiznow je tajki eksemplar skazał, kaž wottam rěka. Figura z nahubnikom znazornja, kak je wědomostnik Berlinskeje Charitéje za čas koronapandemije na popularnosći přibył. W Seiffenskim zawodźe maja kurjaka dla tójšto skazankow: Tydźensce rozposyłaja 500 eksemplarow – tež do wukraja.
Chorobne awto zadźeržał je helikopter w sewjerorynsko-westfalskim Velberće. Do toho bě so strowotniski staw pacienta w helikopteru pohubjeńšił. Pytajo za móžnosću přizemjenja wuhlada pilot jěduce chorobne awto, w kotrymž maja lěpše móžnosće lěkowanja. Helikopter tuž awto nisko lećo přesćahny a před nim přizemi. Tak móžachu pacienta stabilizować a z nim na to dale lećeć.
Zjawny list Ursuli von der Leyen
Flensburg/Brüssel (SN/JaW). Ze zjawnym listom su so dohromady 67 zapósłancow Europskeho parlamenta a třo nawodni zastupnicy europskeje wobydlerskeje iniciatiwy Minority Safepack na prezidentku Europskeje komisije Ursulu von der Leyen a jeje zastupnicu Veru Jourovu wobroćili. W spisu, kotryž redakciji Serbskich Nowin předleži, kritizuja zapósłancy – mjez nimi tež prezident Federalistiskeje unije europskich narodnych mjeńšin Loránt Vincze – spjećowanje komisije EU, škit narodnych a rěčnych mjeńšin lěpje rjadować.
Spisarjo lista maja rozsud komisije za „wopačne poselstwo milionam Europjanow, byrnjež wjetšina Europskeho parlamenta iniciatiwu wuraznje podpěrała“. Rozsud komisije „škodźi demokratiskemu žiwjenju w našim zhromadźenstwje, dowěrje narodnych mjeńšin do našich institucijow a nic naposledk nutřkownej a mjezynarodnej wěrjomnosći EU“, zapósłancy komisiji EU w spisu wumjetuja. Zdobom zwuraznjeja nadźiju, zo komisija „tónle zmylk skoriguje a narodnym mjeńšinam Europy kedźbnosć wěnuje, kotruž sej zasłužeja“.
Za přidatne šulske lěto
Berlin (dpa/SN). Prezident Zwjazka wučerjow Němskeje Heinz-Peter Meidinger so nadźija, zo budu šule wotsrjedź februara w dalokej měrje zaso wotewrjene. To rjekny wón Augsburgskim nowinarjam. Rozsud Zwjazka a krajow, kubłanišća hač do 14. februara zawrjene wostajić, zwjazk podpěruje. „Šule su dźěl infekciskich žórłow. Tohodla měli wotpowědnje reagować.“ Meidinger namjetuje dobrowólne přidatne šulske lěto, zo móhli wuknjacy maćiznu nachwatać.
70 procentow do lěća šćěpić
Ruska žadanja wotpokazuje
Moskwa (dpa/SN). Ruska je sej w prěnjej reakciji po nawróće a zajeću kritikarja Krjemla Alekseja Nawalneho nutřměšenje wukraja do swojich nutřkownych naležnosćow zakazała. Rěčnik Krjemla wotpokaza w tym zwisku tež žadanja zwjazkoweje kanclerki Angele Merkel (CDU), Europskeje unije a dalšich krajow, Nawalneho hnydom pušćić. Jeho běchu wčera k 30 dnjam jastwa zasudźili.
W Ruskej su tele dny z masowymi šćěpjenjemi přećiwo koronawirusej ...
Tež Sakska naprawy podlěša – kritika industrije
Drježdźany (dpa/SN). Po wčerawšich wuradźowanjach Zwjazka a krajow chcyše sakske krajne knježerstwo dźensa nowe prawidła koronakrizy dla předstajić. Ministerscy prezidenća zwjazkowych krajow běchu so wčera ze zwjazkowej kanclerku Angelu Merkel (CDU) wo dalšim postupowanju koronawirusa dla dorozumili. Po dlěšej diskusiji běchu sej přezjedni, wobstejace razne wobmjezowanja zjawneho žiwjenja hač dosrjedź februara podlěšić. Nimo toho maja w busach, železnicach a wobchodach wótriše předpisy nahubnika dla płaćić. Po tym dyrbja ludźo tam přichodnje škit za hubu a nós z wyšim standardom wužiwać, potajkim tak mjenowany nahubnik FFP2.
Trump Washington wopušćił
Washington (dpa/SN). Po tydźenje trajacej ćahańcy wólbneho wuslědka dla ma so dźensa ze zapokazanjom noweho prezidenta USA Joewa Bidena kontrowersna doba dotalneho prezidenta Donalda Trumpa we Washingtonje skónčić. Trump bě jako prěni prezident po Andrewje Johnsonu 1869 připowědźił, zo so na swjatočnym zapokazanju swojeho naslědnika před Kapitolom njewobdźěli. Po informacijach medijow je wón w rańšich hodźinach Washington wopušćił a do Floridy wotlećał. Porno tomu chce Trumpowy naměstnik Mike Pence na ceremoniji pódla być, runje tak kaž bywši ameriscy prezidenća Barack Obama, George W. Bush a Bill Clinton.
Po nadběhowanju Kapitola přez přiwisnikow Trumpa 6. januara knježa we Washingtonje razne wěstotne naprawy. Na wšě 25 000 wojakow narodneje gardy ma wěstotu zaručić. Wulke dźěle stolicy USA su zaraćene, zo bychu akcijam Trumpowych přiwisnikow zadźěwali.
To a tamne (20.01.21)
Za přebytk w jastwje dźakowała je so žona w kanadiskim Langfordźe. Na pohladnicy wobswědča wona policiji najlěpše wuměnjenja w jastwje a dźakowaše so dohladowarjam za „ćežke dźěło“, kotrež sej jeći častodosć njewaža. Podobnje kaž w hotelu je wotpósłarka pohladnicy jastwo ze štyrjomi hwězdami hódnoćiła. Čehodla dyrbješe žona wjacore dny w jastwje přebywać, policija z datoškitnych přičin njepřeradźi.
Chětro nimokuliła je so prezentacija noweho busa w Hornjej Frankskej. Zastupnik firmy chcyše kupcej demonstrować, kak derje so bus tež za zymske poměry hodźi. Jako so zajimc z busom w gmejnje Gutteberg na nahłu a hładku horu měrješe, so zadni dźěl jězdźidła wotsuny a je we wulkej hromadźe sněha na kromje puća tčacy wostał. Z pomocu zymskeje słužby bus skónčnje wućahnychu.
Zwoprawdźa dwě předewzaći
Serbske předewzaća w koaliciskim zrěčenju sakskeho knježerstwa měli so nětko dale a doslědnje zwoprawdźić. To je pozicija wjacorych serbskich čłonow koalicionarow CDU, Zwjazka 90/Zelenych a SPD.
Budyšin (SN). Krajne koło „Serbja“ sakskeje SPD a krajne dźěłowe zjednoćenstwo Zelenych „Serbske žiwjenje“ stej hromadźe ze serbskimaj čłonomaj frakcije CDU serbske předewzaća aktualneho koaliciskeho zrěčenja minjeny štwórtk we wobłuku widejoweje konferency rozjimałoj. Přidružiłoj běštej so zapósłanči Franziska Schubert a Sabine Friedel, fachowej rěčnicy w serbskich naležnosćach frakcijow Zwjazka 90 Zelenych a SPD. Wo tym dźěłowej gremijej SPD a Zelenych w nowinskej zdźělence rozprawjatej.
