Łužiski center tři njedźele z hosćićelom „Łužiskeho swěta bajow“
Wojerecy (KD/SN). Łužiski center we Wojerecach je pod hesłom „Sagenwelt Lausitz – Łužiski swět bajow“ swjedźenske dny składnostnje 400. narodnin Janka Šajatovića zahajił. Chorwatski połkownik, kotremuž pozdźišo Johann von Schadowitz rěkachu, je z historiskej předłohu do dźensnišeho popularneje powěšće kołowokoło „dobreho kuzłarja Krabata“.
„Wysoko kubłany Šajatović, kiž nimo swojeje maćeršćiny tež madźaršćinu, němčinu a serbšćinu wobknježeše, wukonješe wot lěta 1660 wojersku słužbu za sakskich kurwjerchow. Johann Georg III dari jemu wudwór we Wulkich Zdźarach, hdźež buram zawjedši nowe ratarske metody žiwjenje wolóži. Wulce česćeny zemrě 1704 a bu w Kulowje pochowany. Dźensa je jako dźěl łužiskeje mytologije identifikaciska figura za region a z wažnym pósłancom Łužicy“, podšmórny genealoga a biograf Šajatovića Hans-Jürgen Schröter.
Budyšin (SN/MiP). „Na wulki zjězd chórow“ běchu organizatorojo rjadu póndźelnišich zarjadowanjow „Happy Monday – wjesoła póndźela“ zajimowanych na wčerawše wudaće prosyli. Hačrunjež pochmurjene wjedro a temperatura ze 16 stopjenkami přewšo přićahliwej njebyłoj – něhdźe 300 ludźi běše najebać to na wosme, předposlednje zarjadowanje na Žitne wiki přichwatało.„Chceš-li zhromadnje spěwać, dyrbiš druheho słyšeć a wědomje wobkedźbować, zo by spěw derje zaklinčał. Kajki to překrasny přikład za zhromadne žiwjenje w našim měsće, w našej towaršnosći“. Z tymle słowami powita Christian Tiede, farar Budyskeje ewangelskeje wosady swj. Pětra, zajimcow a přeprosy jich na zhromadne spěwanje z chórami. Za to běše spěwanska brošurka wupołožena abo digitalnje z pomocu z QR-koda na šmóratku přistupna. W serbskej rěči postrowi publikum w mjenje Rěčneho centruma WITAJ (RCW) kaž tež Domowiny Beata Brězanowa, wjednica RCW. ...
Suwereny dobyćer wokrjesneje klasy Budyšin stafla sewjer, druhe wolejbulowe mustwo muži Viktorije Worklecy, je tež wulke finale wokrjesneho mišterstwa dobyło, a to zašły tydźeń štwórtk w swójskej hali we Worklecach. W połfinalu přesadźichu so młodźi Worklečenjo přećiwo cyłkej ST Marijineje hwězdy z 2:1 (24:26, 25:22, 15:13) a w finalu přećiwo hosćom OSSV Kamjenc z 2:0 (25:20, 25:19). Mustwo Viktorije chce móžnosć postupa wužić a w nowej hrajnej dobje na wobwodnej runinje hrać. Foto: Mia-Katarina Hrjehorjec
Rěčka Wieslauf je w badensko-württembergskim Klaffenbachu wulku škodu zawostajiła, po tym zo bě so wona wulkeje wody dla na torhacu rěku wuwiła. Dotal su pjeć smjertnych woporow zličili. Wčera bě so žona ze swojim awtom ze zapławjenje dróhi do přirowa sunyła a so w awće zatepiła. Za zhubjenym wohnjowym wobornikom hišće pytaja. Foto: dpa/Marijan Murat
Rakečanska bjesada je minjeny pjatk zhromadnje z Domowinskej skupinu Komorow-Trupin-Rakecy na druhi spěwny wječor do Komorowskeho towarstwoweho domu „Hutowa“ přeprosyła. Něhdźe 60 hosći dožiwi wjesoły, zabawny wječor ze serbskej spěwnej skupinu Přezpólni a Rakečanskim žónskim chórom. Z sepju zwjetša njeznatych serbskich spěwow Přezpolni do wječora startowachu a z mnohimi anekdotami publikum zahorichu. Tež žónski chór je pisany program z němskimi a serbskimi spěwami přihotował. A tak njetraješe dołho, zo přihladowarjo zahoriće sobu spěwachu. Wo ćělne derjeměće postara so młodźinski klub. Tón běše sej tež hišće serbskich młodostnych z wokolnych wsow sobu přeprosył. Foto: Raphaela Wićazowa