To a tamne (12.07.23)

Mittwoch, 12. Juli 2023 geschrieben von:

Wusnjeneho šulerja w busu zabyli su po rjadowaniskim wulěće we Wulkej Britaniskej. Dźěći běchu wječor po koncerće po puću do hotela na kromje Londona. „Bohužel je dźěćo, kiž bě sej na dompuću w busu wusnyło, w zamknjenym busu wostało“, nošer šule w jendźelskim Poole zdźěla. Šuler chce po dorěči ze staršimaj z wulětom pokročować. Pad chcedźa přepytować, zo njeby so wospjetował.

Z gumijowej palmu pod pažu je muž w Nižozemskej policiji napadnył. Při kontroli 34lětneho so spěšnje wukopa, zo bě muž dekoracisku palmu na bičwolejbulowym turněrje pokradnył. Po tym zo běchu palmu zarjadowarjam turněra wróćili, zastojnicy personalije muža přepruwowachu. Woni zwěsćichu, zo dyrbi paduch w Belgiskej hišće 18 lět jastwa wotsedźeć, dokelž bě někoho morił. Na to dowjezechu do Belgiskeje do jastwa.

To a tamne (11.07.23)

Dienstag, 11. Juli 2023 geschrieben von:

Sta piwowych kašćikow zhubiło je nakładne awto na dróze w hornjej Frankskej. Po informacijach policije sta so njezbožo wčera rano w Neudrossenfeldźe w Kulmbachskim wokrjesu. W křiwicy přełama něhdźe 200 piwowych kašćikow pobóčnu sćěnu awta a padny na dróhu. Rumowanje traješe wjacore hodźiny. 62lětny šofer dyrbi z chłostanjom ličić, dokelž njebě kašćiki porjadnje přiwjazał.

Z gumijowym čołmom bjezmała do dowoloweje łódźe na rěce Mosel prasnyła je skupina ludźi w Porynsko-Pfalcy. Swědcy běchu policiju informowali, dokelž čołm ze swojim wašnjom jězdźenja wobchad łódźow na rěce pola Bern­kastel-Kues wohrožowaše. Jako policija čołm kontrolowaše, jedyn z muži do rěki skoči. Wšitkich štyrjoch wočakuje chłostanje wohrožowanja wobchada dla.

To a tamne (10.07.23)

Montag, 10. Juli 2023 geschrieben von:

W stilu policajskeho awta je 25lětna žona w Hannoveru swoje awto pomolować dała. Jenož reflektowace folije njeje wona wužiwać směła. Tež wopon a módra swěca běchu tabu, wona zdźěla. Na motorowej hawbje steji wotnětka „Police“ a nic „Polizei“. To je wažny rozdźěl, dokelž njeje design prawnisce škitany. Byrnjež 25lětna wšitke předpisy dodźeržała, je ju policija mjeztym wospjet zadźeržała.

Wosom huškow wuchowała je wohnjowa wobora z dešćikoweje roły w delnjofrankskim Aschaffenburgu. Młodźata ­běchu so na třěše historiskeho hrodu 22 metrow hłuboko do roły sunyli a njemóžachu so hižo sami wuswobodźić. Sobudźěłaćerka hrodu bě žałosćenje huškow słyšała a wohnjowu woboru zawołała. Wobornicy młodźata z ruku wućahnychu. Starka akciju wobkedźbowaše a so po wuchowanju z huškami zminy.

To a tamne (07.07.23)

Freitag, 07. Juli 2023 geschrieben von:

Mylnje 40 milionow eurow přepoka­zała je Delnjosakska krajna banka na dospołnje wopačny konto. Sumu chcychu poprawom na wjacore konta banki rozdźělić, na kóncu pak dóńdźechu pjenjezy na konto jednotliweho kupca. Pjenjezy su mjeztym wróćo přepokazali. Prawdźepodobnje je system IBAN z wopačnym kontom zwjazał. Zmylk njemóže so po słowach banki takle wjace wospjetować.

Eksponaty Drježdźanskeje wustajeńcy „Swět NDR“ jutře přesadźuja. Šěsć lět ­po wotewrjenju přehladki muzej zawru, zdźěli předewzaćel Peter Simmel. „Młodźi ludźo so za stawizny NDR njeza­jimuja, starši přińdu zwjetša jenož jónu“, Simmel zwěsća. Ličba wopytowarjow je wot spočatnje 80 000 na jenož hišće 15 000 wob lěto woteběrała. Zajim je najebać to wulki: 870 ludźi chce so na internetnym přesadźowanju wobdźělić.

To a tamne (06.07.23)

Donnerstag, 06. Juli 2023 geschrieben von:

Při dotal najwjetšim zasadźenju přećiwo ilegalnym plantažam canabisa we Wulkej Britaniskej je policija nimale 200 000 rostlinow sćazała a wjace hač tysac ludźi zajała. Nimo toho su wulke mnóstwa bróni a něhdźe 760 000 eurow našli, policija zdźěla. Racija bě „bjez ­runjeća“. Při operaciji su w Jendźelskej, Walesu a Šotiskej 11 000 policistow ­zasadźili. Plantaže běchu we wulkich industrijnych zawodach, ale tež w prózdnje stejacych twarjenjach zaměstnjene.

Z blešu wina za runje dźesać eurow za šulsku tombolu w swojim wólbnym wokrjesu je britiski premierminister ­Rishi Sunak rozhorjenje zbudźił. „Smy šokowani“, zdźěli šulske spěchowanske towarstwo nowinarjam. Jedna so wo tunje wino, kotrež w wobchodach poski­ćuja, 43lětny Sunak je najbohatši premier w britiskich stawiznach.

To a tamne (05.07.23)

Mittwoch, 05. Juli 2023 geschrieben von:

Znowa dobył je 39lětny Joey Chestnut mjeztym 16. wubědźowanje w napřemojědźenju hotdogow składnostnje dnja njewotwisnosće USA w New Yorku. Chestnut je wčera w běhu dźesać mjeńšin na wšě 62 warjenych kołbaskow w całće spóžěrał. Muž je wubědźowanje we wólnočasnym parku Coney Island južnje New Yorku wot lěta 2016 stajnje dobył. Jeho wosobinski swětowy rekord: 76 hotdogow, nimale wosom za mjeńšinu.

Nimale sto tubow zubneje pasty pokradnyłoj staj njeznataj z wobchoda žiwidłow w durinskim Heldburgu. Njeznataj zastupištaj do wobchoda za čas wote­wrjenja a zhubištaj so ze zubnej pastu w hódnoće 450 eurow. Sobudźěłaćerka padustwo krótko po tym w drogerijowym wotrjedźe zwěsći. Skućićelej so zminyštaj. Awtomatiska kamera je njeskutk po słowach nawody wobchoda nahrawała.

To a tamne (04.07.23)

Dienstag, 04. Juli 2023 geschrieben von:

Fatalne misnjenje na Filipinach: We wabjenskim wideju je ministerstwo za turizm wo dowolnikow wabiło – z nahrawanjemi z druhich krajow. Zamołwitej agenturje za marketing su mjeztym wupowědźili. Archiwny material pochadźeše z Indoneziskeje, Thailandskeje, Šwicarskeje a arabskich krajow. Agentura je so zamołwiła a přiznała, zo je cuzy material za wabjenski widejo wužiwała.

Swoje koleso při policajskim awće přizamknył je pjany muž w Gubinje. ­45lětny bě koło njedźelu w Gubinje sewjerowuchodnje Choćebuza z dołhim rjećazowym zamkom při awće přiwjazał. Jako pozdźišo po koleso přińdźe, jeho policisća wuhladachu a narěčachu. Na to wućahny muž powětrowu klumpu z nachribjetnika, do zastojnikow biješe a jednoho z nich na ruce zrani. Test alkohola pola 45lětneho wunjese 4,62 promilow.

To a tamne (03.07.23)

Montag, 03. Juli 2023 geschrieben von:

Wjace hač 6 000 zajimcow je mjeztym 22. mjezynarodne zetkanje jězdźidłow wuchodneho bloka w technikowym muzeju w Pütnitzu we wokrjesu Předpomorska-Rujany wopytało. Widźeć bě tam 1 600 jězdźidłow, wot motorskich, přez awta hač k ćežkim nakładnym awtam. Towarstwo techniki eksistuje wot lěta 2001 a chce jězdźidła bywšeho wuchodneho bloka zachować, ponowić a ludźom zbližić. Wot lěta 2004 wužiwaja za to bywše wojerske lětanišćo Pütnitz.

Tykanc chorobneho personala zjědł je wopity muž w klinice w Hornjej Pfalcy. 61lětneho běchu w nocy na njedźelu chětro pjaneho do nuzoweje přijimarnje chorownje w bayerskim Weidenje přiwjezli. Tam dźěše wón do stwy přistajenych a da so do tykanca, kiž bě za nócnu změnu přihotowany. Hač dyrbi muž ze skóržbu ličić, ma statne rěčnistwo pruwować.

To a tamne (30.06.23)

Freitag, 30. Juni 2023 geschrieben von:

Hodźiny dołho je kołp wčera nowu a chětro drohu čaru podzemskeje železnicy w Londonje blokował. Zadźěwka dla dochadźeše na „Elizabeth Line“ k masiwnym zapozdźenjam, zdźěli wobhospodar na swojej internetnej stronje. Runočasnje pasažěrojo w socialnych medijach skoržachu, zo su we wagonach bjez toaletow zamknjeni. „Kak ćežko prošu jara je, zwěrjo z kolijow wućěrić“, so ludźo prašachu. Čaru běchu hakle loni w septembru na česć kralowny Elizabeth II. wotewrěli. Twar płaćeše 22 miliardow eurow.

Tójšto mjasa a kołbasy pokradnyli su paduši ze superwikow we Wildenfelsu w Zwickauskim wokrjesu a su při tym tež hišće chłódźenje přetorhnyli. Tuž dyrbjachu wšo zničić, štož bě we chłódźerni składowane. Paduši běchu durje chłódźernje wočinjene wostajili. Cyłkowna škoda wučinja wjace hač 10 000 eurow.

To a tamne (29.06.23)

Donnerstag, 29. Juni 2023 geschrieben von:

Z hłowu we wobłoženju mosta tčacy wostał je wopity muž w Sandersdorfje-Brehna w Halle. Wohnjowa wobora ­móžeše 39lětneho wuswobodźić. Test alkohola wunjese 1,26 promilow. Do nje­lubozneho połoženja bě muž w měšćanskim dźělu Petersroda přišoł, jako za ­runje zhubjenymi wěcami pytaše.

Swojemu nanej žiwjenje wuchował je dwanaćelětny hólc w Baltiskim morju. Pachoł bě hłowu 36lětneho do womory padnjeneho muža w Großenbrode w Mecklenburgskim zaliwje nad wodu dźeržał a wótře wo pomoc wołał, policija zdźěla. Pomocnicy towaršnosće za wuchowanje žiwjenje muža na pobrjóh donjesechu, hdźež hižo helikopter na njeho čakaše. Dowolnika ze Sauerlandskeje dowjezechu do chorownje. Muž bě prawdźepodobnje předschorjenja dla we wodźe do womory padnył.

Serbska debata

Neuheiten LND