To a tamne (07.02.20)

Freitag, 07. Februar 2020 geschrieben von:

Drogi w hódnoće cyłeho miliona eurow wučušlili su wosebje kubłane psy cłownikow na Frankfurtskim lětanišću. Wopojny jěd bě w jědźi za ćěšenki schowany. Prěni kurěr z Južneje Ameriki měješe dwanaće kilogramow w kófrje, tamny samo pjatnaće. Kokain bě we wjacorych tyzach schowany. Zastojnicy dźiwachu so hoberskeho mnóstwa dla. Telko drogow namakaja hewak jenož we wulkich „posyłkach“. Wobeju kurěrow su zajeli.

Z chorobnej sotru stać chcyła je so first lady Němskeje Elke Büdenbender jako młodostna. To je wona nowinarjam přeradźiła. Za přikład brała bě sej dźensniša mandźelska zwjazkoweho prezidenta Franka-Waltera Steinmeiera swój čas kmótru, kotraž w tym powołanju dźěłaše. Hižo zahe bě wona přeswědčena, zo tež holcy dobre wukubłanje trjebaja. Stała pak je so Büdenbender ze sudnicu.

To a tamne (06.02.20)

Donnerstag, 06. Februar 2020 geschrieben von:

Wobličo Friedricha Engelsa, sobuawtora Komunistiskeho manifesta, pyši wotnětka dźesać wotpadkowych awtow Wuppertalskich měšćanskich zawodow. Město chce Engelsa tak k 200. narodninam počesćić. Wón bě Wuppertal hižo jako młody muž wo­pušćił. Zhromadnje z Karlom Marxom sta so z wodźacym teoretikarjom socializma. Wuppertal planuje lětsa za swojeho wuznamneho syna wjace hač sto zarjadowanjow.

Wosebje chrobłeho wobšudnistwa dla steja wjacori mužojo w Francoskej před sudnistwom. Wobskorženym wumjetuja, zo su so před pjeć lětami jako francoski zakitowanski minister Jean-Yves Le Drian wudawali a sej z wopačnymi přilubje­njemi pola předewzaćelow a druhich miliony eurow spakosćili. Za to běchu formulary ministerstwa falšowali a samo masku z mjezwočom ministra wužiwali.

To a tamne (05.02.20)

Mittwoch, 05. Februar 2020 geschrieben von:

Na njewšědne wašnje je 32lětny z Essenskeho policajskeho prezidija twochnył, hdźež sedźeše w celi za wustrózbjenje. Jemu bě so poradźiło předrěć so přez małe woknješko, přez kotrež jatym jědź dawaja. Mylnje jemu zastojnicy hišće wěstotne durje wotewrěchu. Skónčnje móžeše wón prezidij wopušćić. Konsekwency zadźerženje muža žane njezměje: Ćeknyć njeje chłostajomne, nimo toho chcychu jeho tak a tak pušćić.

Ze špatneho sona wotućiwši je 90lětna w allgäuskim Bad Wörishofenje policiju zazwoniła a wo ilegalnym wubědźowanju awtow z wjacorymi zranjenymi w hewak měrnym městačku rozprawjała. Zastojnicy na to wosrjedź nocy přijědźechu, njemóžachu pak ničo njewšědne zwěsćić. W rozmołwje ze starušku so wukopa, zo bě sej wona před telewizorom wusnyła a wo podawkach jeno soniła.

To a tamne (04.02.20)

Dienstag, 04. Februar 2020 geschrieben von:

Akcija k wuchowanju krokodila w Indoneskej je wotprajena. Dotal njeje so nichtó­ zwólniwy wuprajił krokodilej wobruč­ motorskeho ze šije sćahnyć, z kotrejž so tón hižo tři lěta bědźi. Zwěrinoškitarjo so boja, zo móhł so krokodil prjedy abo pozdźišo zadusyć. Tuž su samo pjenježne myto přilubili, bjez wu­spěcha. Dotal běchu wšitke pospyty zwrěšćili, zwěrjeću pomhać.

Strach před nowym corona-wirusom wohroža nětko tež swětosławny sněhowy festiwal w japanskim měsće Sapporo. K wotewrjenju spektakla na najsewjernišej japanskej kupje Hokkaido organizatorojo wopytowarjow we wjacorych rěčach namołwjachu, maski nosyć. Nimo toho nastajichu bleše z desinfekciskim srědkom. Loni bě sej 2,7 milionow ludźi impozantne skulptury ze sněha a lodu wobhladało. Lětsa liča z jasnje mjenje zajimcami. Tójšto šulow je připowědźiło, zo na festiwal njepřińdu.

To a tamne (03.02.20)

Montag, 03. Februar 2020 geschrieben von:
Najwjetši sněhowy muž swěta steji w awstriskej Steiermarce. Kaž tamniša powěsćernja APA rozprawja, su fachowcy Guinnessoweje knihi rekordow sobotu wysokosć běłeho hobra 38 metrow naměrili. Statiskich přičin dla nima sněhowy muž, kaž je to w Awstriskej poprawom z wašnjom, žadyn tołsty brjuch. „Čim wyši wón je, ćim wuša je jeho postawa“, turistiski zwjazk sněhakowarskeje kónčiny Riesneralm zdźěla. Přiwšěm je jemu ze sněhom pjelnjeny cylinder hižo dwójce z hłowy padnył.

To a tamne (31.01.20)

Freitag, 31. Januar 2020 geschrieben von:

Cyły kilogram kokaina w małych titkach spóžrěł je pašowar drogow, kotrehož su cłownicy na Mnichowskim lětanišću lepili. 40lětny bě zastojnikam napadnył, dokelž bě chětro nerwozny. Test na drogi bě pozitiwny. Dokelž cłownicy žane drogi njenamakachu, muža w chorowni přeswětlichu: Podhlad zastojnikow so wobkrući. W běhu dnja pokaza so 97 titkow kokaina, kotrež běchu ćěło pašowarja po přirodnym puću wopušćili.

Na historisce niski staw spadnyła je přetrjeba piwa w Němskej. Z 9,22 miliardami litrami su piwarnje tak mało pře­dali kaž hišće ženje. Branša ćerpi pod demografiskim wuwićom a powšitkownym trendom k strowšemu zežiwjenju z mjenje alkoholom, rěčnik zwjazka piwarnjow zdźěli. Wot lěta 1993 je předań piwa wo nimale pjećinu (17,8%) spadnyła.

To a tamne (30.01.20)

Donnerstag, 30. Januar 2020 geschrieben von:

Na zapozdźeny kwasny dar smě so ně­hdźe 900 porikow wjeselić, kotrež su so minjeny čas na stawnistwje w šwicarskim Zürichu wěrować dali: Stawnistwo bě sej za to přewysoki popłatk žadało, kaž so nětko wukopa. Pjenjezy chce tuž wróćić. Dowolowa jězba wšak při tym žana njewuskoči: Jedna so wo 75 šwicarskich frankow, potajkim něhdźe 70 eurow.

Město toho zo by listy roznošował, je listonoš w USA posyłki składował. Pječa steješe pod wulkim ćišćom a njeměješe chwile, wulke mnóstwa póšty ludźom w měsće Chesapeake w zwjazkowym staće Virginia roznosyć, kaž wón před sudnistwom wuzna. Tak bě hižo w decembru 2018 započał listy a pakety skła­dować. W awgusće 2019 je za nje samo składowansku halu wotnajał. Policija namaka 5 000 posyłkow, mjez nimi dawkowe podłožki a kontowe wućahi.

To a tamne (29.01.20)

Mittwoch, 29. Januar 2020 geschrieben von:

Z oficialnym protestom je so italske knježerstwo pola němskeho knježerstwa hóršiło, dokelž dyrbješe ministerski prezident Giuseppe Conte na skupinskim wobrazu wobdźělnikow konferency wo Libyskej w Berlinje w druhim rynku stać. „To bě zmylk němskeho protokola“, rjekny Conte wčera w italskej telewiziji. We wideju je widźeć, kak italski premier za městnom w prědnim rynku pyta, skónčnje pak dyrbi do druheho.

Wosrjedź kuchnje stejo wostało je awto w Eifeli, po tym zo bě murju domskeho přerazyło. 64lětny bě na nahłej dróze po puću a chcyše naprawo wotbočić. Z dotal njeznateje přičiny pak jědźeše runje dale, přełama płót, zjědźe do murje, přerazy ju a wosta w kuchni stejo. 69lětny wobsedźer domu, kiž tam runje w kuchni kofej warješe, so na zbožo jenož­ na noze zrani.

To a tamne (28.01.20)

Dienstag, 28. Januar 2020 geschrieben von:

Po 55 lětach je 73lětna Američanka piwowy karan sławnemu Mnichowskemu hosćencej Hofbräuhaus wróćo pósłała, kotryž bě tam 1965 pokradnyła. W připołoženym lisće wona padustwo wuraznje wobžaruje. „Tehdy běch dźiwja, hruba a lochkomyslna“, Celeste ze zwjazkoweho stata Maryland rukopisnje rozłožuje. Što drje je ju nětko pohnuło karan wróćo pósłać, w Mnichowje njewědźa. Starušku chcedźa na darmotne piwo přeprosyć.

Zwada mjez jědnaćelětnymaj hólcom a holcu je w Duisburgu ma­sowu bijeńcu mjez dorosćenymi wuskutkowała. Přiwuzni dźěći běchu na dróhu chwatali, zo bychu zwadu rozrisali. Po werbalnych ranjenjach počachu so storkać a skónčnje do so bić. Samo retl a nóž su wužiwali, tak zo dyrbještaj dwaj mužej zranjenaj do chorownje. Wobsadki wosom policajskich awtow móžachu rozkoru skónčić.

To a tamne (27.01.20)

Montag, 27. Januar 2020 geschrieben von:

Z wosebitej kanonu su wčera hodowne štomy přez Kaselske Friedrichowe naměsto třěleli. Bě to dźěl wuměłskeje instalacije Leona de Bruijne. Nižozemski wuměłc wěnuje so we wustajeńcach stajnje zaso na žortne wašnje „zaničowanskemu potencialej“ swojich kinetiskich mašinow. „Kanona hodownych štomow“ so tuž wulkotnje do toho wobłuka hodźi, wón přeradźi. Kanona móže jědle a šmrěki hač do 60 metrow daloko třěleć.

Přemučny a přepjany bě šofer wosoboweho awta před hosćencom za spěšnojědźe w Geseke pola Paderborna: Jako chcyše sobudźěłaćer hosćenca skazanku při woknje přijimować, muž za wodźidłom awta spaše. Jako bě jědź krótko po tym spřihotowana, bě sej tón znowa wusnył. Přiwołana policija wšak zwěsći na to porjadnu alkoholowu „chorhojčku“ a je šoferej nablaku jězbnu dowolnosć sćazała.

Anzeige