To a tamne (18.03.16)
Štyri metry dołheho pytona su na parkowanišću w šwabskim Lorchu namakali. Dokelž ludźo njewědźachu, hač je reptil mortwy abo hač so zymy dla njehiba, wołachu skótneho lěkarja. Tón móžeše jenož hišće smjerć hada zwěsćić. Kak je pyton, kotryž swoje wopory zadusy, na parkowanišćo přišoł, nichtó njewě.
We wjacorych domach runočasnje swěcu hasnył je šofer awta w Hagenje. Chětro wopity a přespěšnje jěducy njezamó 25lětny srjedu wječor w křiwicy awto dodźeržeć. Prasny do parkowaceho awta a do milinoweho kašćika, na čož we wokolinje milina wupadny. Wobydlerjo runje hišće widźachu, kak muž do druheho awta skoči a wotjědźe. Swoje je stejo wostajił. Něšto pozdźišo wšak steješe policija před jeho durjemi. Jeho, na kóncu tola njewuspěšnej ćěkańcy dopomhał je znaty, kiž je winika sobu wzał.
To a tamne (17.03.16)
Zadwělowana mać je w Landshuće policiju wołała, dokelž nochcyše jeje sydomlětna dźowka do łoža hić. Wonej běštej so wadźiłoj, při čimž holca mać ranješe a wěcy na nju mjetaše. Hakle zastojnicy 28lětnu mać a dźowku změrowachu. Policistk je holcu skónčnje pod „hamtskim dohladom“ do łoža přewodźała.
100 000 dolarow dóstanje bjezdomny w USA jako myto za pomoc při přesćěhanju złóstnika. 55lětny Matthew Hay-Chapman bě policiji w San Franciscu rozsudny pokiw dał. Srjedź januara bě wuwołany złóstnik w južnej Kaliforniskej z jastwa ćeknył. Chapman jeho na parkowanišću spózna, po tym zo běchu foto złóstnika w telewiziji pokazali.
To a tamne (16.03.16)
Kóčka w Žitawje je so wo zasadźenje policije a wohnjoweje wobory postarała, dokelž bě najskerje prochsrěbak zapinyła. Wotnarjerjo bydlenjow we wjaceposchodowym domje běchu so minjenu póndźelu hóršili, słyšo z bydlenja cyły dźeń haru. Přenajer zawoła tuž policiju a wobornikow. Skónčnje so wukopa, zo je cyły dźeń prochsrěbak běžał. Najskerje bě kóčka rano na njón skočiła.
Najrjeńšu a najwukonliwišu kruwu su dźensa w mecklenburgsko-předpomorskim Karowje wuzwolili. Něhdźe sto kruwow bě so wo titul „Miss Karow 2016“ wubědźowało. Při tym je jury twar ćěła, nohi a wumjo we wšelkich starobnych klasach hódnoćiła. Tež kruwy z Braniborskeje so wobdźělichu. Hač do redakciskeho kónca dobyćerka hišće jasna njebě. Wólby su wjeršk lětušeje přehladki „Rind aktuell“ plahowanskeho zwjazka howjadow.
To a tamne (15.03.16)
Tak mjenowany geocache, schowany objekt w přirodźe, je w Hessenskej zasadźenje policije zawinił. Swědcy běchu skupinu ludźi při štomje wobkedźbowali, kotřiž so napadnje spěšnje wotsalichu. Při štomje wuhladachu na to z grotom zwjazanej role z plasty. Přiwołana policija skaza wosebitu jednotku, zo by podhladny objekt rozbuchnyła. Z pomocu röntgenoweho nastroja pak geocache jako tajki identifikowachu. Geocaching je hra, při kotrejž dyrbiš w přirodźe schowany předmjet z pomocu GPS-nastroja namakać.
Nowu „kralownu kćenjow“ pyta krajny zwjazk Sakski sad. Kralownu chcedźa, mjeztym 20. króć, 7. meje w Röhrsdorfje we wokrjesu Sakska Šwica-wuchodne Rudne horiny krónować. Přizjewić móža so zajimče wot 18 lět. Kralowna budźe so potom na wšelakich wikach a wustajeńcach prezentować.
To a tamne (14.03.16)
To a tamne (11.03.16)
Z prawej „dalokodiagnozu“ je słucharka rozhłosowemu moderatorej z nuzy pomhała. Rozhłosownik Christian Stübinger bě wutoru rano w sćelaku Radio Energy Hamburg skoržił, zo ma wulke brjušebolenje a jara wysoki puls. Tole słyšawši hladarka chorych w sćelaku zazwoni, mějo podhlad, zo ma „Stübi“ slepe črjewo zahorjene. Wón wusyłanje hnydom přetorhny, poda so k lěkarjej a bu hišće samsny dźeń operowany.
81lětny italski rentnar dyrbi do jastwa, dokelž bě lěta 2008 we wobchodźe DVD pokradnył. Tehdy bě sobudźěłaćer wobchoda starca při kradnjenju lepił. Wonaj so chětro rozestaještaj, při čimž so sobudźěłaćer zrani. Sudnistwo měješe to za ćežke rubježnistwo a zasudźi starca k dwěmaj lětomaj jastwa. Dokelž bě wón zapasł, sčasom wo wusadźenje chłostanja prosyć, su jeho nětko w měsće Pescara zajeli.
To a tamne (10.03.16)
Wosrjedź jězby městno měnjałoj a tak zražku zawiniłoj staj šofer nakładneho awta a jeho sobujěducy na awtodróze A 71 pola Erfurta. Při akciji zjězdźe Lkw na prawej stronje z jězdnje. Šofer storhny wodźidło nalěwo, na čož awto do za nim jěduceho Lkw-ja zrazy. Tež wosobowe awto njemóžeše so wuwinyć. Skónčnje hišće transporter do nich prasny. Cyłkowna škoda: 22 500 eurow.
Pobrachowaceho sakskeho dialekta dla je žona z wnučkowym trikom w delnjosakskim Braunschweigu pola 80lětneje zwrěšćiła. Pozdatna sotrowča bě ju telefonisce wo 45 000 eurow za nowe bydlenje prosyła. Staruška pak sej žadaše, zo měła wona wosobinsce přińć. Hakle po tym jej napadny, zo njebě přiwuzna sakski dialekt rěčała. Přiwuzni w Drježdźanach jej na to wobswědčichu, zo drje jedna so wo pospytane wobšudnistwo.
To a tamne (09.03.16)
Z cyłym kilogramom kokaina w nadrach su žonu na Frankfurtskim lětanišću lepili. Rěčnik cłownistwa je wotpowědne powěsće nowin dźensa wobkrućił. Žona bě z kolumbiskeje stolicy Bogotá do Frankfurta přilećała. Implantaty z kokainom su jej mjeztym we wjacore hodźiny trajacej operaciji z nadrow wotstronili. Kak běchu so žony dohladali, nochcyše rěčnik cła přeradźić.
Wopačna bankowka je w Annabergu-Buchholzu wikowarja drogow přeradźiła. 26lětny bě we wobchodźe z falšowanej 50eurowskej bankowku zapłaćił. Muž, kotrehož policija krótko na to zaja, měješe hišće dalše tři wopačne bankowki při sebi. Přepytujo jeho bydlenje nańdźechu zastojnicy drogi, 2 000 eurow, brónje a hišće wjac falšowanych bankowkow.
To a tamne (08.03.16)
Ze swojim awtom mylnje do Ryna zajěł bě muž w badensko-württembergskim Breisachu. Pěšk misnjenje wobkedźbowaše a informowaše policiju. Prjedy hač zastojnicy dojědźechu, běštaj so 22lětny šofer a runje tak stary sobujěducy z awta wuswobodźiłoj a w lódzymnej wodźe na přibrjóh płuwałoj. Šofer bě při wróćostorkanju na zelenišćo zajěł. Awto jědźeše po skłoninje runu smuhu k Rynej, a wodźer njeměješe je hižo pod kontrolu. Wóz zajědźe do wody a so podnuri.
Na dołhu jězbu do turkowskeje Antalyje je so skupina dźesać pinguinow z Lubnjowskeje Sprjewineje kupjele podała. Tam změja we wólnočasnej hotelowej připrawje nowu domiznu. Wulahnyli běchu so pinguiny w Lubnjowje, hdźež jich nětko hišće 17 maja. Dokelž so tam pilnje wo dorost staraja, dyrbja někotre stajnje zaso wućahnyć.
To a tamne (07.03.16)
Mysteriozna namakanka štyrjoch milionow eurow w zawostajenstwje zemrěteho abta šwabskeho klóštra benediktinow w Neresheimje zaběra dźensa Stuttgartske wyše krajne sudnistwo. Třo skóržbnicy žadaja sej dźěl pjenjez, kotrež běchu lěta 2013 po smjerći abta na dwěmaj kontomaj namakali. Dotal nichtó njewě, zwotkel pjenjezy pochadźeja. Mniša nochcedźa so jich dótkać, doniž njeje sudnistwo doskónčnje rozsudźiło.
Wobsedźerja kwětkoweho hornca pyta policija w Oberstdorfje. Muž z wjace hač třomi promilemi alkohola w kreji bě jón sobotu wječor na policajsku stražu přinjesł. Dokelž pak njemóžeše so hižo zwuraznić, tyknychu jeho do cele. Njedźelu pak wo horncu hižo ničo njewědźeše. Prawdźepodobnje bě wón dźesać litrow wulke sudobjo něhdźe spakosćił. Kwětce přiliwać wšak dyrbi nětko policija.
