To a tamne (07.12.21)
W kostimach rumpodicha běchu wčera w Porynsko-Pfalcy zaso motorscy po puću, zo bychu pjenjezy za dom ćežko chorych dźěći zběrali. Mužojo a žony jědźechu 125 kilometrow po južnej Pfalcy hač do Speyera a rozdźělachu wjace hač 2 000 darow w šulach a pěstowarnjach, zo bychu na darjensku akciju skedźbnili. Loni su z njej 78 000 eurow nazběrali.
Drje najstaršu listowu znamku swěta chcychu dźensa w Londonskim awkciskim domje Sotheby’s přesadźować. Za „Penny Black“ z lěta 1840 lubja sej tam hač do šěsć milionow britiskich puntow (sydom milionow eurow). Znamka je „najwuznamniši objekt filatelistiskich stawiznow“, kaž rěka. Wobsedźer znamki, britiski předewzaćel, bě ju před dźesać lětami za mjenje hač 60 000 eurow kupił.
To a tamne (06.12.21)
Swojimaj wočomaj wěrić nochcyše wobsedźer pensije w juhozapadopfalcskim Hinterweidenthalu: W jednym z jeho łožow ležeše jemu cuzy muž – a to hišće dospołnje nahi. 65lětny „njeprošeny hósć“ bě so wčera do pensije zadobył, so wuslěkał a so do łoža lehnył. Policija přepytuje nětko ranjenja domjaceho měra dla. Kóšty za přidatne rjedźenje wšak je muž hnydom zapłaćił, kaž rěkaše.
Z bombu hrozył je 16lětny powołanskej šuli w sewjerorynsko-westfalskim Hammje, zo móhła so 21lětna šulerka kubłanišća nachwatanskej klawsurje wuwinyć. Młoda žona bě w interneće wo tajki telefonat prosyła. 16lětny drje chcyše jej swoju zmužitosć dopokazać a je w šuli zazwonił. Pozdźišo so młodostny sam pola policije přizjewi a njeskutk přizna. Policija přepytuje nětko přećiwo woběmaj kaženja zjawneho měra a hroženja dla.
To a tamne (03.12.21)
Najebać kur w bydlenju je muž w sewjerorynsko-westfalskim měsće Soest před swojej hrajnej konsolu sedźo wostał. Ani wohnjowi wobornicy w bydlenju jeho njepohnuchu so kompjutera wzdać. Pěšcy běchu wohnjowu woboru wołali, dokelž z kuchinskim woknom kur stupaše. Tam so jědź w horncu smudźeše. Muž před konsolu njebě ani alarmowu připrawu ani kur ani wobornikow registrował. Woni pak su jeho z bydlenja přewodźeli.
Hamtski kołk za koronatest su njeznaći z testowanskeho centruma we Wernigerodźe pokradnyli. Kaž tamniša policija informuje, rozrězachu skućićeljo w nocy na štwórtk stanowu płachtu na zadnim boku prowizoriskeho centruma a so tak do njeho zadobychu. Po tuchwilnym stawje spakosćichu woni kołk, kotryž hamtski test na koronawirus wobswědča. Policija nětko swědkow pyta.
To a tamne (02.12.21)
Z motiwom Lipšćanskich adwentnych wikow wabja w podzemskej železnicy francoskeje stolicy Parisa za wopyt sakskeho wulkoměsta. Wiki pak dyrbjachu koronakrizy dla krótkodobnje wotprajić. Plakaty w Pariskej metro su dźěl kampanje, z kotrejž wabi Francoska za Lipsk a za nowy direktny lětanski zwisk do wulkoměsta, kotryž wot 2. nowembra wobsteji. Jako běchu akciju nazymu planowali, njebě hišće wotwidźomne, zo hodowne wiki tež lětsa zaso wupadnu. Motiw wikow bě zamołwitym kampanje najatraktiwniši.
Dwanaće tydźenjow do jastwa dyrbi muž w jendźelskim Norwichu, po tym zo bě zachod šćěpjenskeho centruma zalěpił. 53lětny bě w nocy klučikowu dźěrku ze spěšnolěpkom zatykał. Wjace hač 500 ludźi z wjetšim rizikom schorjenja njemóžeše tuž kaž planowane třeću sykawu přećiwo koronawirusej dóstać. Wuslědźili su skućićela z pomocu awtomatiskeje kamery. Sudnik spěšnje reagowaše a muža bjez wahanja zasudźi.
To a tamne (01.12.21)
Na žarowanskej swjatočnosći za dźiwadźelnika Volkera Lechtenbrinka chcedźa so nimo jeho wudowy tež štyri bywše žony wobdźělić. „To je sej wón přał a do swojeje smjerće tak postajił“, rjekny jeho wudowa Ural-Aytekin-Lechtenbrink. Volker Lechtenbrink bě tydźenja 77lětny po ćežkej chorosći zemrěł. Wón bě dohromady pjeć króć woženjeny.
Nimale 24 kilogramow drogow je policija w Barnimskim wokrjesu w Braniborskej dwěmaj wikowarjomaj drogow sćazała. Zastojnicy běchu bydlenja a přemysłowu kónčinu 34lětneho a 29lětneho přeslědźili, hdźež nańdźechu 23,9 kg hašiša a marihuany. Nimo toho sćazachu pistolu, prózdne šćěpjenske wupokazy, techniske nastroje a pjenjezy. Braniborska policija bě wobeju dlěje hač lěto wobkedźbowała. Zwěsćić hišće dyrbja, što staj sej mužej z dobytka drogow kupiłoj.
To a tamne (30.11.21)
Po třoch dnjach w zasněženej korčmje na sewjeru Jendźelskeje je něhdźe 60 hosći swój nachwilny kwartěr zaso wopušćić móhło, po tym zo bě so sněhowy płuh k wotležanemu domej předrěł. Ludźo běchu po koncerće w pubje wostać dyrbjeli, dokelž bě dróha sněhoweho wichora dla zaraćena. Korčmarka zaměstni někotrych hosći w pensiji, druzy dyrbjachu na matracach abo na zemi přenocować. Najebać to bě nalada mjez wopytowarjemi dobra. Nastachu samo nowe přećelstwa.
Jako pastyrjo wowcow su policisća w Sewjerorynsko-Westfalskej zaskočili. Swědcy běchu zastojnikow wo tym informowali, zo steji stadło něhdźe 150 wowcow na polu bjez kóždeho płota. Policisća na to k polu dojědźechu a njedohladowane stadło stražowachu. Akcija z „njewšědnym nazhonjenjom“ so skónči, jako wobsedźer stadła dojědźe.
To a tamne (29.11.21)
Spěšnje hišće swojej přewodźerce domoj dowjezć chcyše 38lětny pjany šofer wosoboweho awta, po tym zo bě jeho policija w Hagenje zadźeržała. Muž rjekny, zo bě ze žonomaj na party a zo je jenož jedne piwo pił. Alkomat zastojnikow pak pokaza 1,67 promilow. Jako chcychu jeho sobu na stražu wzać, muž praji, zo wšak chcył žonje hišće domoj dowjezć. Z toho ničo njebu: Policisća wzachu jemu klučik.
Hižo třeću nóc za sobu w korčmje přenocować dyrbja wopytowarjo puba na sewjeru Jendźelskeje. Dotal njeje jasne, hdy budźe dróha k wotležanemu hosćencej w narodnym parku Yorkshire Dales zaso swobodna. Sylny sněhowy wichor bě něhdźe 60 hosći překwapił a wobchadny chaos zawinił. K jědźi maja hišće dosć, korčmarka měnješe. Hosćo zaběraja so ze wšelakimi hrami. Alkohol pak syda hakle popołdnju po třoch.
To a tamne (26.11.21)
List z jastwa dósta Bochumska policija, kotraž je z njeho chětro hnuta. W lisće so 31lětny zastojnikam dźakuje. Muž rysuje, kak je so w jastwje nakazał. Nětko chcył so na „čisty nowy započatk“ zwažić. Policisća běchu muža w lěću w Bochumje zajeli, dokelž mějachu wukaz zajeća přećiwo njemu jebanstwa dla, po tym zo bě wón swoje pjenjezy w kazinach přečinił. „Snano bě trjeba widźeć, kak w jastwje je, zo bych sej swobodu wažił“, wón pisa.
Zmužity wodźer wosoboweho awta zadźerža na awtodróze A14 pola Schwerina transporter, kotrehož šofer bě do womory padnył. 57lětny bě widźał, zo je šofer transportera bjez wědomja. Ze swojim wosobowym awtom jědźeše tuž pomału před transporterom a jón tak skónčnje zadźerža. Wobě jězdźidle so wobškodźištej. 48lětneho wodźerja transportera dowjezechu do chorownje.
To a tamne (25.11.21)
Najebać zawrjene adwentne wiki w Lipsku koronapandemije dla móža sej ludźo tež lětsa zaso woblubowane dźěćace šalki z motiwom pěskowčika kupić. Předawać chcedźa je, dołhož su na składźe, wot 1. decembra přez internetny portal abo w předawanišću na Lipšćanskim Hłownym torhošću. Nimo toho poskića tež normalne zelene winowe šalki. Lipšćanske hodowne wiki dyrbja runje tak kaž hižo loni korony dla wupadnyć.
Gitara Bruca Springsteena abo keyboard Eltona Johna: Za beneficnu akciju w Los Angelesu je tójšto sławnych hudźbnikow swoje instrumenty dariło. Přesadźować budu je 11. decembra, kaž awkciski dom zdźěli. Wunošk awkcije přewostaja organizaciji, kotraž hudźbne šule na juhu USA podpěruje, zo móhli tež chude dźěći na instrumentach hrać nawuknyć.
To a tamne (24.11.21)
Ekstremnaj krosnowarjej staj wčera po fasadźe wysokodomu w Frankfurće nad Mohanom horje lězłoj. Jako „spiderman“ znaty Alain Robert a Leo Urban, wobaj Francozaj, staj tam hač na třěchu 153metrowskeho „skypera“ w dwórnišćowej štwórći krosnowałoj. Njewužiwaštaj žane pomocne srědki. Na třěše pak čakaše policija a jeju nachwilnje zaja.
Wopačny „pater Don Romano“ dyrbi 30 měsacow do jastwa. To je sudnistwo w južnofrancoskim Saint-Raphaëlu wukazało. Pozdatny duchowny bě dobroćiwemu wěriwemu 2 500 eurow wulišćił, kotrež běchu pječa za dźěćacy dom w Africe postajene. Na mnicha předrasćeny wobšudnik je mjeztym dlěje hač dwaceći lět „aktiwny“ a sedźeše wospjet w jastwje. Najebać to je wěriwych a cyłe wosady jako pozdatny dušepastyr zas a zaso za nós wodźił.
