Sernjany swjeća lětsa 600. róčnicu prěnjeho pisomneho naspomnjenja. Rodźeny Sernjančan a dobry znajer stawiznow delanskich wsow Pawoł Rota je někotre stawizniske zajimawostki wo wsy zestajał, kotrež čitarjam Serbskich Nowin we wjacorych dźělach spřistupnjamy:
Sernjanske nowe kehelnišćo
Něhdźe w lěće 1956 bě wjesna starša generacija tehdy aktiwnje dźěłacu młodźinu pospochi namołwjała, zo by tola wožiwiła staru wjesnu sportowu tradiciju – kehelekulenje. Tele nastajne borkanje a storkanje měješe wuspěch. Młodostni rozsudźichu pak so za masiwne kehelnišćo, kotrež wšitke wjedra a předewšěm kruty zmjerzk wudźerži.
