W zmysle nana a dźěda Arnd Zoba w ewangelskej kónčinje za serbstwo skutkuje

Sylne hałzy jabłučiny su tak nachilene, zo maš na tymle ćopłym dnju w awgusće pod nimi spomóžny chłódk. Łopjena strowja će w strowej zelenej barbje, mjez nimi wuhladaš hižo wulke płody, byrnjež tam lětsa žane bohate žně njewočakowali. Móhła-li tale jabłučina­ na Zobic zahrodźe w Bukecach rěčeć, by wona zawěsće wjele rozprawjeć měła. Na přikład wo poměrje Bukečanow k serbstwu w powšitkownym a wo prócowanjach Zobic swójby za serbskosć w konkretnym zmysle.