W serialu „Na serbskich slědach po Praze“­ wjedźe bywši Pražan Marek Krawc čitarjow na městnosće w čěskej stolicy, kotrež maja tež za nas Serbow wulki wuznam­. Dźensa: Narodny muzej

Kóždy wopytowar čěskeje stolicy znaje impozantne twarjenje na čole jednoho z najwažnišich naměstow města – Narodny muzej na Wjacławskim naměsće, najwuznamniša to institucija swojeho razu w susodnym kraju. Hižo dlěje hač 200 lět zaběraja so tam z wjacorymi wědomostnymi zběraćelskimi wobłukami – najwažnišej stej přirodowěda a historija. Swoje eksponaty njewustaja institucija jenož w swojim historiskim twarjenju, ale tež druhdźe w Praze. A po cyłej Čěskej maja zajimowani składnosć, sej je wobhladać.