W Malešanskej pjekarni Trittmacher a Spytečanskim Rätzec młynje wěnuja so wosebitym wudźěłkam
We Łužicy je jenož horstka pjekarnjow, kotrež stare družiny žita předźěłuja. Pjekarnja Trittmacher w Malešecach je jedna z nich.
Wone rěkaja sibirska rožka, šampanska rožka, frankski krupnik – stare to družiny žita, kotrež ratarjo wot 1950tych lět wjace njeplahuja, dokelž njeběchu hižo wunošne. Po sydom lětdźesatkach pak so wone zaso na hornjołužiske pola wróćeja. Wšako su strowe zežiwjenje a regionalne wudźěłki ludźom dźeń a wažniše. Iniciator bě biosferowy rezerwat Hornjołužiska hola a haty. Institucija, přisłušaca statnemu zawodej Sachsenforst, je w lěće 2007 projekt za zachowanje starych žitnych družin regiona zahajiła. Nawodnica projekta Eva Lehmann je wulku prócu nałožiła, zo by ratarjow wo nich přeswědčiła.
