To a tamne (06.06.18)
Wulět z awtom maćerje je so za bratrow w starobje šěsć a wosom lět w Delnjofrankskej runje hišće někak zbožownje skónčił. Hólcaj z Rothfelsa běštaj so rano zahe skradźu z domu zminyłoj, jako mać hišće spaše. Z jeje awtom jědźeštaj cyłkownje dźewjeć kilometrow, mjez sobu so wotměnjejo. Skónčnje zrazyštaj do nabóčneho wobhrodźenja. Tam jeju policija wotewza. Wobaj wostaštaj njezranjenaj, awto maćerje pak dyrbjachu wotwlec dać, w policajskej rozprawje rěka.
Kofej z brokolijom, espreso z brokolijom a cappuccino z brokolijom poskićeja wot najnowšeho w scenowej kofejowni „Commonfolk Coffee“ w awstralskim Melbournje. Za to měšeja zeleninowy próšk do kofeja abo sypaja jón na ješć. Pječa ma łžička próška telko wutkow kaž cyła porcija zeleniny. Reakcije ludźi na nowu kreaciju wšak su tež chětro měšane.
Wuradźuja wo ćěkancach
Luxemburg (dpa/SN). Nutřkowni ministrojo čłonskich statow Europskeje unije su so dźensa w Luxemburgu zetkali, zo bychu wo wjele lět haćenej reformje azyloweje politiki EU wuradźowali. Dokelž njemóžachu so kraje dotal na rozdźělenje ćěkancow po krajach EU dojednać, steji reforma wot lěta 2016 faktisce na blaku. Předewšěm wuchodeuropske kraje kaž Madźarska a Pólska a naposledk tež Awstriska su přećiwo zawjazowacej kwoće. Je to poslednje zetkanje ministrow do wjerška EU kónc junija.
Smjertne wopory wulkana dla
Guatemala-City (dpa/SN). Ličba smjertnych woporow po wudyrjenju wohenjoweho wulkana w Guatemali je na 65 rozrostła. 46 wosobow so nimo toho zrani, kaž katastrofowy škit kraja zdźěla. Něhdźe 3 200 ludźi dyrbjachu ewakuować, po tym zo bě wulkan zawčerawšim, njedźelu, wudyrił. Při tym je znajmjeńša jednu wjes w dalokej měrje zničił. Prezident kraja Jimmy Morales wukaza mjeztym nuzowy staw. Wulkan bě dźensa dale aktiwny, byrnjež w słabšej formje.
SPD žada sej wuběrk
Steinmeier jedna w Pólskej
Putin: Trjebamy sylnu Europu
Schulz: Pósłanc USA měł hić
Berlin (dpa/SN). Bywši předsyda SPD Martin Schulz ma zadźerženje noweho wulkopósłanca USA w Němskej Richarda Grenella za njemóžne a so nadźija, zo jeho bórze wotwołaja. „Štož tón muž čini, je bjez runjeća w mjezynarodnej diplomatiji“, rjekny Schulz powěsćerni dpa. Město toho zo by w hóstnym kraju neutralny był, zadźerži so Grenell kaž zastupnik politiskeho hibanja. W rozmołwje z nowinarjemi bě wón namołwjał, konserwatiwne mocy w Europje zesylnić. Nimo toho je awstriskeho prawicarskopopulistiskeho kanclera Sebastiana Kurza do ameriskeho wulkopósłanstwa přeprosył, hdźež jeho 13. junija k jědźi wočakuje.
Wosebje zadźiwane je zwjazkowe knježerstwo na wuprajenje Grenella reagowało, zo měli konserwatiwne mocy w Europje sylnišo skutkować a so „politiskim klasam“ spjećować, kotrež postajeja, štó w kraju knježi a štó nic. Frakciska předsydka Lěwicy w zwjazkowm sejmje Sahra Wagenknecht žada sej jeho hnydomne wupokazanje, dokelž njeje jako diplomat dlěje akceptabelny.
To a tamne (05.06.18)
Zo móže čołm z betona spěšny być, su studenća Lipšćanskeje wysokeje šule za techniku dopokazali. Na wubědźowanju tajkich nastrojow w Nižozemskej běchu woni z třomi złotymi, třomi slěbornymi a dwěmaj brozowymaj medaljomaj najwuspěšniši wšěch nastupjenych 17 mustwow. Jich pjeć metrow dołhi čołm wažeše 42 kilogramow. Runje tak wulki plastowy čołm přińdźe na 25 do 30 kg.
Z hońtwjerskim nožom wobrónjeny je muž w delnjosakskim Hitzackeru spytał tykanc kradnyć. Byrnjež jemu to zakazali, zastupi 54lětny do pjekarnje. Tam wućahny nóž a wotkra sej někotre skibki tykanca. Kupcaj staj muža přemóhłoj a jemu nóž wotewzałoj. Paduch so zminy – bjez noža a tykanca. Policija přepytuje nětko wobrónjeneho padustwa dla. Čehodla bě jemu zakazane do wobchoda zastupić, njeje znate.
Centrum za wosadu a swójby
Lipsk (B/SN). Pod třěchu noweho wosadneho swójbneho centra (GEZ) chcedźa zamołwići diakoniske skutkowanje Lipsk-Lindenau-Plagwitz zjednoćić a na potrjeby ludźi znowa wusměrić. Na to skedźbnja Ewangelska młodźina Sakskeje w swojim Newsletteru. Cyrkej ma zaso městnosć być, hdźež su zetkanja móžne. Axel Zimmermann koordinuje dźěło hłownohamtskich a čestnohamtskich kaž tež dźěło z druhimi iniciatiwami w měšćanskim dźělu a wuwiwa hromadźe z teamom GEZ nowe ideje a konkretne plany.
Mało měšniskich swjećiznow
Bonn (B/SN). Ličba měšniskich swjećiznow wostanje po naprašowanju katolskeje powěsćernje dale mała. Lětsa stanje so po cyłej Němskej 61 młodych muži z diecezanskim měšnikom. Loni bě jich 74, najmjenje měšniskich swjećiznow bě dotal w lěće 2015 z jenož 58 swjećiznami.
Rozmołwy połne respekta
Lětanišćo zaso dźěła
Hamburg (dpa/SN). Lětanišćo w Hamburgu započa dźensa rano zaso po planje dźěłać, po tym zo bě tam wupad miliny wčera wšón wobchad lemił. Kaž rěčnica zdźěli, móžeše wokoło 6.30 hodź. lětadło z turkowskeje Antalyje w Hamburgu-Fuhlsbüttelu přizemić. Fachowcy dyrbjachu wčera z wotmachom dźěłać, zo bychu přičinu krótkospjeća namakali. Zamołwići na to skedźbnjeja, zo je plan wotlětow a přizemjenjow najprjedy raz dospołnje přemjetany. Tak so połoženje hakle poněčim normalizuje.
Netanjahu pola Merkel
Berlin (dpa/SN). Israelski ministerski prezident Benjamin Netanjahu zetka so dźensa w Berlinje ze zwjazkowej kanclerku Angelu Merkel (CDU). Bě to zazběh jězby po Europje, kotraž powjedźe jeho tež do Parisa a Londona. W rozmołwach chce Netanjahu za razniše postupowanje přećiwo Iranej wabić. Tak sej wón žada, zo ma Iran wšitke aktiwity na nuklearnym polu přetorhnyć. Nimo toho chce israelski knježerstwowy šef wliw Teherana w Syriskej wobmjezować. Netanjahu Iranej wumjetuje, zo najebać mjezynarodne zrěčenje tajnje atomowu bombu twari.
Wuradźuja wo konsekwencach
Zwjazkowa kanclerka Angela Merkel (CDU) wopyta wčera zwučowanske ...
Znowa festiwal prawicarjow
Wostrowc (dpa/SN). Přećiwo planowanemu přichodnemu festiwalej neonacijow we Wostrowcu spočatk nowembra jewi so spjećowanje. „Chcemy znowa šěroki zwjazk ze srjedźišća towaršnosće skować, zo bychmy neonacijam znapřećiwili“, rjekny nawoda Mjezynarodneho zetkawanskeho centruma klóšter Marijny doł Michael Schlitt na naprašowanje nowinarjow. Město je mjeztym wobkrućiło, zo bě durinski krajny předsyda NPD Thorsten Heise zarjadowanje we Wostrowcu přizjewił.
Koncert na priwatnej ležownosći mjenuje so „Festiwal za měr a swobodu“. 20. apryla, na narodninach Adolfa Hitlera, bě něhdźe 1 200 prawicarskich ekstremistow ze wšeje Němskeje a z wukraja we Wostrowcu. Tam běchu tomu so spjećujo „Měrowy swjedźeń“ organizowali, zo bychu jasne znamjo přećiwo prawicarskemu ekstremizmej stajili. A něšto tysac ludźi je přišło.
