Washington/Lucca (dpa/K/SN). Prezident USA Donald Trump hlada swojeho dwělomneho přikaza dla k bombardowanju zepěranišća syriskeho lětarstwa jako reakciju na pozdatne zasadźenje jědoj­teho płuna přećiwo ludnosći mjezyna­rodnych podpěraćelow. Prawosć swojeho postupowanja je sej wobkrućić dał wot němskeje kanclerki Angele Merkel (CDU) a britiskeje premierki Theresy May. Běły dom nimo toho zdźěla, zo su sej wšitcy třo wo tym přezjedni byli, sćahnyć syriskeho prezidenta Bashara al-Assada k zamołwitosći. Rěčnik zwjazkoweho knježerstwa Steffen Seibert praji, zo wustupi Merkel tež za politiske rozrisanje kon­flikta pod třěchu UNO bjez Assada. Wonkowni ministrojo G7 pytaja na swojich dźensnišich wuradźowanjach w italskim měsće Lucca za zhromadnej poziciju napřećo Ruskej. Němski wonkowny minister Sigmar Gabriel (SPD) namołwja, wšo za to činić, zo dóstanu Rusku z kruha podpěrarjow Assadoweho režima.

Chětro smjerdźatu překwapjenku staj w Bayerskej šofer kabrioleja a jeho sobujěduca dožiwiłoj. 53lětny bě ze 14lětnej dźowku w Altomünsteru z wočinjenej třěchu po puću, jako jimaj traktor z připowěsnjenym juchowym sudom napřećo přijědźe. Tón dyrbješe so parkowacemu awtu wuwinyć. Při tym pak so jucha do kabrioleja a na w nim sedźaceju wuliny, dokelž njebě wěko suda porjadnje začinjene. Nan a dźowka so njezraništaj, „awto pak móžetaj preč ćisnyć“, kaž rěkaše.

Rubježnik nohajcow je wot najnowšeho w Heidelbergu aktiwny. Wčera bě wón 21lětnu kolesowarku zadźeržał a sej žadał, zo sej črij zuje a jemu nohajcu přepoda. Na to ćekny na kolesu. Hižo do toho bě sej z nožom w ruce wot 19lětneje kolesowarki nohajcu žadał. Młoda žona pak móžeše ćeknyć. Hač so wo samsneho muža jedna, dotal njewědźa.

Berlin (dpa/K/SN). Němske wonkowne ministerstwo skedźbnja po atentatach w dwěmaj koptiskimaj cyrkwjomaj na rizika w Egyptowskej přez terorowe akcije. Strach zawlečenja tohorunja hrozy. Pućowacym do Egyptowskeje radźi wone tuž k najwjetšej skedźbliwosći, štož płaći tež za dowolnišća při Čerwjenym morju. Wčera bě po najsylnišich terorowych nadpadach minjenych lět na křesćansku mjeńšinu w Egyptowskej 40 ludźi zahinyło a 110 zranjenja poćerpjeło.

China: Zdźeržliwi wostać

Peking (dpa/SN). Po najnowšim přiwótřenju napjatosćow mjez USA a Sewjernej Koreju namołwja China wšitkich wobdźělenych k zdźeržliwosći a sebjewobknježenju. China połoženje na korejskej połkupje dokładnje wobkedźbuje, zdźěli rěčnica wonkowneho mininisterstwa w Pekingu. „Wšitke strony dyrbjeli so wobknježić a połoženje dale njepřiwótřić.“ Hladajo na dale trajace testy sewjerokorejskeho mócnarstwa z nowymi raketami běchu USA kónc tydźenja lěta­dłonošak „USS Carl Vinson“a dalše łódźe do směra na Koreju pósłali.

Protesty přećiwo zawrjenju

Washington (dpa/K/SN). Po agresiwnym wojerskim zasahu USA na zepěranišćo syriskeho lětarstwa njeje spóznać, kajki kurs knježerstwo Donalda Trumpa nastupajo Syrisku poprawom ma. Wonkowny minister Rex Tillerson hnydom we wjacorych interviewach rjekny, zo ma bój přećiwo teroristiskej milicy Islamski stat dale prioritu. Wo wosudźe prezidenta Bashara al-Assada ma syriski lud sam rozsudźić. Porno tomu wulkopósłanča USA pola UNO Nikki Haley zwurazni, zo z nim USA nimaja žane politiske rozrisanje za móžne. Nětko je tež Ruska nuznje za to, na městnje wuswětlić, što bě so tydźenja w měsće Chan Sheichun woprawdźe stało. Po słowach němskeho wonkowneho ministra Sigmara Gabriela (SPD) je jemu to jeho ruski kolega Sergej Lawrow telefonisce wuraznje wobkrućił. Ruski poskitk měł so přiwzać.