Wotpokazuja test seniorow
Berlin (dpa/SN). Rada za wobchadnu wěstotu Němskeje móžne winowatostne přepruwowanje jězbneje kmanosće seniorow wotpokazuje. Tole by nadměrne zasahnjenje do prawow ludźi było, rjekny rada powěsćerni dpa. „Sam z awtom jěć, woznamjenjatej najwjace ludźom njewotwisnosć a fleksibilita. Runje staršim ludźom je swójske awto wažny wobstatk wšědneho dnja“, gremij zdźěla.
Pozadk je tuchwilna debata wo planach komisije EU. Brüsselski zarjad bě je hižo spočatk měrca předstajił. Jedyn ze zaměrow je, dróhi EU wěsćiše činić. K tomu planuja tež nowe prawidła za seniorow. Při tym dźe po planach komisije wo to, zo ludźo nad 70 lětami po pjeć lětach sami posudźuja, hač su jězdźenja kmani abo du k lěkarskemu přepytowanju. Nimo toho chcedźa přesadźić, zo płaća wšitke jězbne dowolnosće, kotrež su po 19. januara 2013 přizwolene, jenož hišće 15 lět, komisija EU piše. Wot 70. žiwjenskeho lěta dyrbjeli šoferojo jězbnu dowolnosć po pjeć lětach podlěšić dać. Europski parlament a staty EU dyrbja so k tomu wuprajić a zhromadny kompromis namakać. Změny su hišće móžne.
To a tamne (26.04.23)
„Zakaz čakanja“ na wšelakich městnach sewjeroitalskeho kupanišća Portofino zbudźa diskusije. Wjesnjanosta bě we wsy, kotraž přićahuje kóžde lěto syły turistow, „čerwjene pasma“ postajił. Tam njeje dowolene, stejo wostać. Potrjechene su městna, z kotrychž maš wosebje krasny wuhlad na zaliw. Wukaz měri so přećiwo turistam, kotřiž přijědu z wulkimi łódźemi. Woni wuliwaja so do městačka, zatykaja hasy a zawostajeja swoje wotpadki.
Awstriski listonoš je w Salzburgskim kraju něhdźe 4 000 listow składował, město toho, zo by je rozdźělił. Listy ležachu w jeho awće, doma abo w kamorje předrasćernje w póstowym centrumje Seekirchen, awstriscy nowinarjo rozprawjeja. Póst je muža mjeztym pušćił, rěčnik zdźěli. Wón bě dlěje hač dźesać lět słužbu wukonjał. Čehodla je swoje dźěło nětko zanjechał, chcedźa pruwować.
Biden znowa kandiduje
Washington (dpa/SN). Prezident USA Joe Biden je připowědźił, zo chcył při wólbach prezidenta 2024 znowa za stronu Demokratow nastupić. Tole je wón dźensa, runje štyri lěta po zahajenju swojeje prěnjeje wólbneje bojoweje kampanje, we Washingtonje připowědźił. Biden je mjeztym 80 lět stary a hižo nětko najstarši hdy amtěrowacy prezident w stawiznach USA. Mjeztym dale a wjace ludźi dwěluje, zo je wón nadawkam zrosćeny.
Cłownicy na twarnišćach byli
Drježdźany (dpa/SN). We wobłuku cyłoněmskeje kontrole su cłownicy dźensa tež twarnišća w Sakskej kontrolowali. „Financna kontrola čornodźěła je dźensa njepřizjewjene kontrole přewjedła“, rjekny rěčnica hłowneho cłowneho zarjada w Drježdźanach nowinarjam. Při tym dźěše wo płaćenje mzdy a popłatkow kaž tež wo status přebywanja rjemjeslnikow w Němskej. Za to bě w Sakskej wjace hač sto zastojnikow zasadźenych.
Zhorjelske biskopstwo w nuzy
Tysacy zastupnikow indigenych ludow z wjacorych kónčin Brazilskeje ...
Lawrow zakituje nadpad
Dale a wjace ćěkancow
400 němskich staćanow wuchowali
„Stres, strach a njewěstosć“
Woprašowanje kolesowarjow pokazuje dalše pohubjeńšenje wěstoty
Drježdźany (dpa/SN). Tři štwórćiny wšěch kolesowarjow Sakskeje čuja so w nadróžnym wobchadźe wohroženi. Kaž Powšitkowny kolesowarski klub Němskeje ADFC zdźěla, je so začuće wěstoty kolesowarjow w nimale wšitkich městach Sakskeje wot lěta 2012 spochi pohubjeńšiło. Tole su wčera při wozjewjenju najnowšeho přepytowanja tak mjenowaneje kolesowarskeje klimy zdźělili. „Ludźo chcedźa dale a časćišo koleso wužiwać, wokomiknje pak nječinja jim to runjewon lochko“, rjekny jednaćel kolesowarskeho kluba Konrad Krause. „Na dróhach Sakskeje knježa stres, strach a njewěstosć“, wón rjekny.
Realita Miłoraza
Hač je trěbne, po 2030 hišće wjesku wudobywanja brunicy dla wotbagrować, ludźo kontrowersnje diskutuja. Miłoraz pak so jako symbol energijopolitiskeje debaty njehodźi. Nimale cyłe wobydlerstwo je so po lětdźesatkach ćerpjenja pod bliskej jamu a čuwy rubjacych rozestajenjow – haj abo ně k přesydlenju – za zhromadny přećah do bliskeho Slepoho rozsudźiło. Kotru rólu Serbstwo w přichodźe hraje, so w starym Miłorazu hižo njerozsudźi. Wosebje młoda generacija je dawno na Nowy Miłoraz wusměrjena.
So wě, zo wostanje moraliska dilema, wšako je hišće starych Serbow, kotřiž so wotbagrowanju „serbskeje zemje“, starodostojneje domizny, wobaraja. Jeli LEAG jich na kóncu njepřeswědči a jeli dyrbja so potom 90lětni poslednim bagram brunicoweje doby wuwinyć, dóstanje kónc tuteje epochi wobrazy tragiskeje groteski. Při tym njejsmy na to zabyli: 1 500 ludźi chcychu za „Wochozy II“ přesydlić, štož bu cofnjene. Bohudźak. Marcel Brauman
To a tamne (25.04.23)
Wjacore zasadźenja w zwisku ze zwěrjatami su kónc tydźenja policiju zaběrali. Sobotu rano bě kruwa z rězarnje w Zemicach-Tumicach ćeknyła. Zwěrjo běhaše po kolijach a haćeše železniski wobchad. Tohorunja sobotu reagowaše alarmowa připrawa w Ćichońcy. Pozdatny paduch pak bě jenož wowca, kotraž bě so přez płót předrěła. Njedźelu čampaše kača swójba po dróze w Žitawje. Policisća kačku z młodźatami k hatej přewodźachu.
Raketu z časa Druheje swětoweje wójny su dźěći při zběranju wotpadkow w lěsu w braniborskim Oranienburgu namakali. Fachowcy policije su eksploziwnu namakanku mjeztym zrumowali. Dźěći běchu při nalětnim rjedźenju w lěsu ležacy předmjet wuhladali a na kromu dróhi donjesli. Jednaše so wo amerisku raketu M-8. Policija před tym warnuje, so namakaneje municije dótkać.
