Berlin (dpa/SN). Nachwilna bilanca sonděrowanskich rozmołwow mjez CDU/CSU a SPD pokazuje, zo su wobdźělnicy zasadnje zwólniwi, koaliciske jednanja wjesć. Powěsćernja dpa je lisćinu temow zestajała, kotrež su přiwšěm dale wotewrjene.

Mjeztym zo maja k financowanju zwjazkoweje wobory zhromadny plan, so prašenje woborneje winowatosće abo słužbneho lěta na lisćinje njejewi. We wonkownej politice njeje jasne, hač dalšemu dodawanju brónjow Ukrainje za tři miliardy eurow přihłosuja. Tež rakety Taurus abo europska měrowa jednotka w Ukrainje tam naspomnjene njejsu.

Što budźe z wjele diskutowanym herbstwom amploweje koalicije – ze zakonjom za tepjenje? CDU bě kruće přilubiła, jón wotstronić. W sonděrowanskej ­papjerje wostanje to njenaspomnjene. Nastupajo renty běchu slubili, niwow wobchować. Njejasne je, na kajkej runinje. Tež dalše wobstaće atomowych milinarnjow, kiž chcyše CDU „pruwować“, so w zhromadnym dokumenće njejewi.

Bywši předsyda CSU wumjetuje uniji ranjenje přilubjenjow

Mnichow (dpa/SN). Bywši předsyda CSU a zwjazkowy minister za nutřkowne naležnosće Horst Seehofer wumjetuje uniji CDU/CSU hladajo na planowane přiwzaće nowych kreditow, zo přilubjenja njedodźerži. Plan njewotpowěduje „wot nas připowědźenej sprawnej změnje politiki“, rjekny Seehofer nowinje Bild. „To je runje to napřećiwne toho, štož smy do wólbow rjekli“, wón zwurazni a doda: „Wočiwidnje su SPD a Zeleni wólby přěhrać dyrbjeli, zo bychu na kóncu to dóstali, štož su měć chcyli.“

Z wida Seehofera je wulke zadołženje stajnje riziko, za hospodarsku stabilitu runje tak kaž za inflaciju. „Mali ludźo dyrbja to na kóncu płaćić. Zadołženje je njesocialne“, bywši bayerski ministerski prezident měni.

W lěće 2009 su mjezu zadołženja (Schuldenbremse) do wustawy zapisali. Nětko chcetej ju unija a SPD zběhnyć. „Hdyž njemóžemy swój přichod wjace z gigantiskich dawkowych dochodow financować, kotrež wšak mamy, potom něšto wopak běži.“

Tomaš Čornak běše na dokónčenju 2. wólbow Serbskeho sejma na zwučene wašnje perfektny hosćićel. Diskusije hódne pak je prašenje, čehodla je Serbski sejm swój zaměr – dwaj do štyri tysac wolerjow zdobyć – tak dramatisce misnył. Wo špakach Domowiny rěčmy. Fakt pak je: Serbski sejm je so wot cila, być demokratisce legitimowane zastupnistwo Serbow, dale wotsalił. To je škoda, wšako sej kubłanskopolitiski dezaster opoziciju jako sylny korektiw tych žada, kotřiž měnja: Chodźmy dalše lětdźesatki knježacym po prošenju, zo bychu nam porjadne serbske kubłanje zmóžnili. Kaž widźimy, hustodosć podarmo. Zo pak njejsu sejmarjo kandidaturje ludźi zadźěwali, kotřiž eksistencu stata prěja a zwonka wustawy agěruja, je ludźi wottrašiło wolić. Absurdny efekt: Serbski sejm, kiž wuraznje po principje konsensa jedna, dyrbi jón nětko z mužom prakti­kować, kotrehož móžeš „reichsbürgera“ mjenować. Za to „wjele zboža“ wupřeć, by ryzy cynizm był. Marcel Brauman

Budyšin (CS/SN). „Što stawa so w Americe?“ bě tema zańdźeneho zarjadowanja w rjedźe Budyskich narěčow, kotrež so pjatk wječor w Budyskej tachantskej cyrkwi wotmě. Dokelž sej mnoho wobydlerjow města tele prašenje staja, je tójšto připosłucharjow přichwatało a so wotmołwy stawiznarja a publicista Karla Schlögela nadźiješe. Jako su organizatorojo temu wječora wuzwolili, wšak njeje so scena mjez prezidentom USA Donaldom Trumpom a jeho ukrainskim kolegu Wolodolyrom Zelenskyjom w Oval Officu we Washingtonje hišće stała. Powěsće z Běłeho domu pak su předstawy Karla Schlögela přetrjechili, wón přizna. „Scenarij, z kotrymž dyrbimy wobchadźeć, je so dospołnje změnił“, wón zwurazni. Trump je Ukrainu a Europu přeradźił. Stawiznar so tohorunja praša, čehodla je móžno, zo so něchtó na čoło najmócnišeho kraja swěta dóstanje, kotryž njezmysł powěda, informowany njeje, a złe wěcy powěda. Hdźe je opozicija, hdźe je spjećowanje? To je prašenje, na kotrež tež Schlögel wotmołwić njemóže. Kraj je kaž lemjeny.