Lětsa mało wobornikow při wysokim saku sportowało
11. wólnočasny wolejbulowy turněr wo pokal wjesnjanosty přewjedli
Dobrowólni wohnjowi wobornicy gmejny Ralbicy-Róžant wubědźowachu so minjenu sobotu w Ralbičanskej sportowni při wysokim saku wo pokal wjesnjanosty we wolejbulu. Lětsa pak bě jenož mało wobdźělnikow na turněr přišło, štož zaležeše zawěsće na prózdninskim a dowolowym času. Turněr přestorčić zamołwići nochcychu, wšako je za nich sobota po róžowej póndźeli kruty termin. Přiwšěm nastupi na 11. nakładźe pjeć kompletnych mustwow w Ralbicach: Konjecy-Šunow, Ralbicy, Sernjany, Róžant a zakitowar pokala Smjerdźaca. Čłonojo młodźinskeje wobory gmejny Ralbicy-Róžant běchu wšitcy zadźěwani.
Načolnik před wrotami zymnokrejniši był
Sokoł Ralbicy/Hórki – SC 1911 Großröhrsdorf 1:3 (1:1)
Zestawa domjacych: Ch. Gloxyn – Rawš, J. Bjeńš, Šewc, Kř. Matka (67. Młynk), Šołta, D. Gloxyn, St. Bjeńš, Janca, M. Matka (73. Materne), Kurjat (46. Bejma)
Njedźelu je do Ralbic přijěł načolnik wokrjesneje wyšeje koparskeje ligi z Großröhrsdorfa. Sokoljo chcychu na twjerdym hrajnišću ze samsnej zestawu kaž tydźeń do toho w Kumwałdźe znowa dypkować. Krótko do partije pak so Pětr Domaška schorjenja dla wotzjewi, za njeho zaskoči Dirk Šołta.
Widźał,słyšał, napisał (19.02.18)
Smy wosrjedź olympiskich hrow. Sportowcy swěta su so do Južneje Koreje podali, zo bychu so tam w měrliwym a fairnym boju wo olympiske medalje wubědźowali. Olympiske hry – wšojedne hač lěćne abo zymske – tworja w žiwjenju sportowcow stajnje wjeršk. Dołho a intensiwnje so woni na podawk přihotuja.
Ze stawiznow wěmy, zo běchu hižo w antikskej Grjekskej tysac lět olympiske hry wotměwali, a to kóžde štyri lěta na česć boha Zeusa. Wot lěta 776 do Chrystusa zapisowachu mjena olympiskich dobyćerjow do wosebitych čestnych lisćinow. W lěće 393 po Chrystusu romski kejžor Theodosius olympiske hry zakaza.
Čechowka wo dotal najwjetšu sensaciju w Južnej Koreji so postarała
Staw medaljow po 61 ze 102 rozsudow:
złoto slěbro bronza
1. Norwegska 9 9 8
2. Němska 9 5 4
3. Nižozemska 6 5 2
4. Kanada 5 5 6
5. USA 5 3 2
6. Šwedska 4 3 0
Ester Ledecká, dwójna swětowa mišterka w jězdźenju ze snowboardom, chowaše so sobotu na nowinarskej konferency za wulkimi sněhakowarskimi nawočemi. Do naprašowanja žurnalistow bě čěska sportowča mjenujcy alpinski super-G dobyła, cyłu spěšnosněhakowarsku elitu swěta šokowała a so wo dotal najwjetšu sensaciju w Južnej Koreji postarała. Ledecká, kotraž startuje na swětowych cupach nětko tež w lěhwje spěšnosněhakowarkow, doby z 0,01 sekundu předskoka před faworitku Annu Veith z Awstriskeje.
Nimo Ester Ledeckeje postara so tež němska lodohokejowa wubranka wo sensaciju. Team trenarja Marca Sturma móžeše sej prěni króć po 16 lětach dobyće přećiwo Norwegskej na olympiskich hrach zapisać. Po třělenju penaltyjow rěkaše kónčny wuslědk 2:1 za Němsku.
Spěšnosankowarjo dalšu złotu medalju Němskej zawěsćili
Staw medaljow po 44 ze 102 rozsudow:
złoto slěbro bronza
1. Němska 9 2 4
2. Norwegska 6 8 5
3. Nižozemska 5 5 2
4. USA 5 1 2
5. Kanada 4 5 4
6. Šwedska 4 2 0
7. Francoska 3 2 2
Cyłkownje dźewjatu złotu medalju za němsku olympisku wubranku docpěchu spěšnosankowarjo wčera w zakónčacym teamowym wubědźowanju. To rěka, zo su Němcy wuspěch ze Sočija hižo přetrjechili a su najwuspěšniši kraj w sankowarskim wubědźowanju.
Jednotliwcaj Natalie Geisenbergera, Johannes Ludwig kaž tež Tobias Wendl a Tobias Arlt na dwojosydłaku su swojej faworitowej róli wotpowědowali a Němskej dalše olympiske złoto zawěsćili. Slěbro zawěsći sej Kanada. Awstričenjo wobsadźichu třeće městno. Němske mustwo bě teamowe wubědźowanje hižo 2014 w Sočiju dobyło, jako je tam prěni króć přewjedźechu.
Sport (16.02.18)
Chcedźa na němske mišterstwa
Dokelž běchu so z Durinskeje jenož Nordhausenscy volleyballisća za přichodne regionalne koło w starobnej klasy nad 53 lětami skwalifikowali, smě so na přichodnym kole tež třeći sakskich mišterstwow wobdźělić. Tak přewjedu Budyšenjo-Pančenjo 11. měrca w sportowni Serbskeho šulskeho a zetkawanskeho centruma regionalne wurisanje, hdźež chcedźa štyri mustwa wo jězdźenku na němske mišterstwa wojować.
Witaja nalěćo
Wólnočasni volleyballisća abiturneho lětnika 1996 Serbskeho gymnazija Budyšin zarjaduja štwórtk, 1. měrca, turněr z mjenom „Witamy nalěćo“, a to za prošene mustwa. Wot 18 hodź. chce so w Ralbičanskej ćěłozwučowarni šěsć volleyballowych cyłkow wubědźować, a to na dwěmaj hrajnišćomaj.
Běhanska sezona bórze startuje
Z grandioznym wukonom tola hišće złoto zdobyłoj
Staw medaljow po 31 ze 102 rozsudow
złoto slěbro bronza
1. Němska 8 2 3
2. Nižozemska 5 4 2
3. USA 4 1 2
4. Norwegska 1 4 3
5. Kanada 3 4 3
6. Francoska 2 1 2
7. Awstriska 2 1 1
Aljona Zawčenko a Bruno Massot staj z wulkotnym wukonom we wólnym krasnosmykanju porow na Olympiskich zymskich hrach w Pyeongchangu złoto zdobyłoj. Po tym zo bě so jimaj krótkoprogram ze štwórtym městnom nimokulił, staj wonaj dźensa rano z grandioznym předstajenjom zastatk nachwatałoj a před chinskim a kanadiskim porom dobyłoj.
Němske narodne mustwo steji tak dale na prěnim městnje medaljoweje lisćiny. Hižo nětko su cyłkowny wuslědk ze Sočija nimale docpěli. Najwuspěšniši kraj na olympiadźe 2014 bě Norwegska z cyłkownje jědnaće złotymi medaljemi.
Znowa přesłapili
Kehelowanje
wokrjesna liga, stafla 1
1. KSV 47 Wojerecy 8 10:6
2. KSV 69 Łuty II 8 10:6
3. KSV Medingen II 8 8:8
4. SZ Kamjenc II 8 8:8
5. Sokoł Ralbicy/Hórki 8 6:10
6. ST Porchow II 8 6:10
wokrjesna liga, stafla 2
1. TSG Wóspork/Hrodźišćo II 9 14:4
2. ST 1996 Wulka Dubrawa II 8 12:4
3. MSV Krakecy II 9 12:6
4. ST Zemicy-Tumicy 9 10:8
Kehelerjo Sokoła Ralbicy/Hórki su w dypkowej hrě pola KSV Łutow II znowa přesłapili. Tež domjacy žane štomy njezwutorhachu, na kóncu pak partiju z 2 394 : 2 281 kehelemi za sebje rozsudźichu. Jako prěnjej dźěštaj Gisbert Šiman a Hans-Joachim Schöne na čarje. Z 390 respektiwnje 427 drjewami pokazaštaj wobaj spokojacy wuslědk. Sokołaj běštaj wo štyri drjewa lěpšej hač jeju přećiwnikaj. Tola přichodnaj starteraj, Herman Woko a Achim Kral, njemóžeštaj so z čaromaj spřećelić. Woko z 334 a Kral z 320 kehelemi přesłapištaj na cyłej liniji. Tak běchu serbscy kehelerjo w zastatku 91 drjewow. Roberto Wjenk z 394 a Jurij Šiman ze 416 drjewami docpěštaj zaso normalnu formu, ale njemóžeštaj poražce hižo zadźěwać.
Byrnjež z Handrijom Hejdušku a Tobiasom Mikławškom stajnaj kehelerjej wupadnyłoj, njeje njetrjebawša poražka žane zamołwjenje. Franc Nowak
Wo pokal wjesnjanosty
Čas žiwjenja z delanskim sportom zwjazany
Sportowcow, kotřiž so wot dźěćatstwa hač do rentnarskeje staroby w jednym a tym samsnym towarstwje angažuja, lědma namakaš. Jan Bjeńš ze Šunowa je jedyn z nich. Za njesprócniwe dźěło je jeho Sakski sportowy zwjazk z čestnej jehłu w bronzy wuznamjenił.
Hižo jako dźěćo bě so Jan Bjeńš za sport zahorjał. Kaž nimale kóždy hólc honješe wón za bulom. Wo prawych sportnišćach móžachu tehdy w Delanach jeno sonić. Tola hač bě to na pućach a w zymje na łukach, „móžnosće so přeco namakachu“, so dźensa 73lětny dopomina. Wo kwaliće bulow radšo njepowěda, dokelž to by dźensa lědma štó wěrił.
