Po dobyću srjedźoněmskeho cupa seniorow 2016 w Dessauwje a slěbra na sakskich mišterstwach 2017 w Ehrenfriedersdorfje hrajachu volleyballisća Bu­dyskeje FSG a Sportoweho towarstwa Marijina hwězda třeći raz zhromadnje wo najlěpše rezultaty na sakskim wuri­sanju 2018. Nimo kombinowaneho cyłka z pjeć serbskimi hrajerjemi dojědźechu sej dalše štyri zastupnistwa do Lubija, zo bychu so wo titul krajneho mištra seniorow nad 53 lětami wubědźowali. W turněrowej formje hrajachu cyłki kóždy přećiwo kóždemu dwě sadźbje.

Mustwo Budysko-Pančičanskich volleyballistow startowaše z 2:0 přećiwo BSV Ehrenfriedersdorfej, hačrunjež w prěnich dźesać mjeńšinach wšitko kaž na štryčku njeběžeše. Hrajerjo wokoło kapitana Marka Kowarja so w dalšim wotběhu lěpje­ na so nastajichu a skónčichu partiju z 25:21 a 25:18. Přećiwo amtěrowacemu kaž tež nowemu sakskemu mištrej, SZ Motor Thurm, wisachu kiće jara wysoko. Łužičenjo mějachu w přijimanju nadaćow swoje ćeže, štož so na hrajny natwar wuskutkowa. Tak radowachu so senio­rojo z Thurma, města blisko Šwikawy, nad jasnym 25:17 a 25:15.

Tež lětsa bě sej KST Łuty koparske rezerwy na halowy turněr do braniborskeje Hóznje (Hosena) přeprosyło. Po lońšim 2. městnje wobdźěli so tež znowa druhe zastupnistwo Chróšćanskeje SJ na wurisanju. A bě sej kruće předewzało tónraz dobyć. Hnydom prěnju hru přećiwo SZ Kropni (Kroppen) II móžeše tež jasnje ze 4:1 za sebje rozsudźić. W druhej partiji přećiwo KST Łutam II je tohorunja z 3:0 suwerenje dypkowało. Při tym staj wosebje Jan Bogusz a Tomaš Domaška napadnyłoj. Wobaj zamóštaj w nadběhu derje bul dźeržeć a přihrawać. Třeća 14mjeńšiska hra žadaše sej wot Chróšćanow wjele wutrajnosće, a tak koncentracija škita pomału popušćeše. Bjez wjacorych wotwobaranych bulow wrotarja Józefa Matješka bychu bjezmała přěhrali. Přiwšěm woni njerozsudne 2:2 přećiwo ST Lubušej II hač do kónca zachowachu.

Kónc lěta je cyle wěsće nimale kóždy sportowc wo wukonach w swojej družinje přemyslował. Kóždy chce wšak wědźeć, hač su so nałožene mocy a wudawki zadanili. Tajka bilanca wuspěchow aktiwnych běharjow po srjedźnych a dołhich čarach w minjenej sezonje 2017 we wobłuku doskónčneho zaměstnjenja, wuhódnoćenja a mytowanja hłowneju rjadneju lisćinow našeju Łužicow, Wopačanskeho cupa běharjow a Łužiskeje běhanskeje serije kaž tež Drježdźanskeje wobwodneje serije, je zrealizowana. Poslednje lońše hódnoćenske wubědźowanje za Wopačanski cup kaž tež za Drježdźansku seriju běše 17. Biskopičanski Butrowohórski­ běh w septembru, a za Łužisku seriju běše to 39. Oberlichtenauski silwesterski běh.

Młodźina za bulom honi

Sportowe towarstwo 1922 Radwor wuhotuje wot pjatka, 2., do njedźele, 4. februara, wjacore halowe koparske turněry za dorost w „Slaviji“. Pjatk wot 19 do 23 hodź. přewjedu turněr młodźiny A. Sobotu wot 9 do 13 hodź. hraja cyłki młodźiny F, wot 14 do 18 hodź. zastupnistwa młodźiny C a wot 19 do 23 hodź. młodźina B. Njedźelu wot 9 do 13 hodź. budźe wurisanje młodźiny E a wot 14 do 19 hodź. młodźiny D.

Hwězdźički doma hraja

Wolejbulistki ST Marijineje hwězdy z Pančic-Kukowa nastupja jutře w domjacej hali wot 14 hodź. přećiwo holcam z Kupoje-Noweje Łuki a wot 16 hodź. přećiwo Lubijej. Najprjedy wubědźuja so hwězdźički z poslednim wobwodneje ligi, po tym z prěnim. Próstwu Pančičanske hrajerki tohorunja maja: Wone py­taja wolejbulistki, kotrež bychu so rady aktiwnje na dypkowych hrach wobdźě­leli. Štóž ma zajim, njech so w Ralbicach pola Haleny Jancyneje přizjewi: abo z krótkej powěsću na Facebooku pod 1. Damen Volleyball SV Sankt Marienstern.

Koparski turněr CDU