ST Łužnica –
Viktoria Worklecy 3:0
(25:18, 25:17, 25:23)
Kaž butler w „Dinner for one“ praji: „Same procedure as every year!“ – kóžde lěto samsna situacija. Byrnjež su poprawom wšitcy doma a bychu wjele trenować móhli, je přeco přičinow, kotrež aktiwnosći zadźěwaja. Raz je to hodownička, raz koparski turněr, kotryž halu blokuje, a raz je to prosće jenož „nutřkowny swinjacy psyk“. Tak nastupichu Worklečanscy wolejbalisća tež z chětro mało přihotom do druheho koła sezony w Sakskej klasy. Dokładnje bě to hišće nachwatanska hra z prěneje połserije, kotraž měješe so tutu sobotu we Łužnicy absolwować. Z kadra pobrachowaštaj bohužel přistajer Marcel Rjelka a stajny libero Daniel Wałda. Za poslednjeho zaskoči Marko Brězan, kiž tutu poziciju hižo husto angažowany wobsadźi a tež tón dźeń solidnje agěrowaše.