Praha (dpa/SN). Nowy coronawirus je sej prěni smjertny wopor w Čěskej žadał. Wčera wječor je 95lětny pacient zemrěł, kaž jeho lěkowaca chorownja w Praze zdźěli. Před štyrjomi dnjemi běchu pola njeho chorosć płucow covid-19 zwěsćili. Muž měješe přidatne strowotniske problemy swojeje wysokeje staroby dla. „To je njesměrnje zrudźaca powěsć“, rjekny minister za strowotnistwo Adam Vojtěch w telewizijnym sćelaku ČT. W Čěskej je so dotal 1 120 ludźi z wirusom natyknyło, 19 z nich lěkuja na intensiwnej staciji.

Mjezy Čěskeje wostanu stracha coronawirusa dla „wjele měsacow“ za tu- a wukrajnikow zawrjene, znajmjeńša pak poł lěta. To je nawoda čěskeho krizoweho staba coronawirusa dla, epidemiologa Roman Prymula wčera wječor připowědźił. Wukrajnicy smědźa kraj wopušćić, njesmědźa pak znowa do kraja přińć. Wuwzaća płaća za powołanskich dojězdźowarjow, kotřiž w Sakskej, Bayerskej a Awstriskej dźěłaja. Dyrbjeli-li so wuwzaća znjewužiwać, je „kónc dobroćiwosće“, zdźěli nutřkowny minister Jan Hamáček.

Zwjazkowe knježerstwo planuje 156 miliardow eurow za sćěhi wirusa

Berlin (dpa/SN). K wobmjezowanju negatiwnych sćěhow rozšěrjenja coronawirusa dla je zwjazkowy kabinet dźensa wobšěrne naprawy wobzamknył. Při tym dźe wo škitne systemy za předewzaća, přistajenych a chorownje. W tym zwisku su tež wšelake prawniske předpisy změnili, zo móhli naprawy spěšnje přesadźić. Hižo zajutřišim, srjedu, chce zwjazkowy sejm naprawy schwalić.

„Wobšěrne naprawy, kiž je kabinet dźensa schwalił, podpěruja swójby, po­družnikow, dźěławych, samostatnych a předewzaća cyle praktisce, spěšnje a njeběrokratisce“, rjekny generalny sekretar SPD Lars Klingbeil powěsćerni dpa. Klinbeil rěčeše wo „hoberskich sumach“, kotrež dyrbi financny minister Olaf Scholz (SPD) za to nałožić. „Stat ludźi w tuchwilnej krizy njewopušći. Přichodne tydźenje njebudu lochke, na kóncu pak wuńdźe naša towaršnosć zesylnjena.“ Zwjazkowe knježerstwo chce dotatny etat 156 miliardow eurow za lěto 2020 přesadźić a za to płaćiwe směrnicy nastupajo hranicu znowazadołženja stata zběhnyć.

Njelepe zadźerženje w časach coronawirusa je wyšej měšćanostce Roma Virginiji Raggi tójšto kritiki wunjesło. Wona bě ludźi we widejowym poselstwje kónc tydźenja namołwiła, doma wostać a so měšćanskich parkow wzdać: Hłupe jenož bě, zo steješe sama w zelenym kćějatym parku. Italska bě ludźom kónc tydźenja wuraznje zakazała do parkow hić. Policija ma to raznje kontrolować.

Dosć kreatiwni su Španičenjo, wukładować zakazy nastupajo rozšěrjenje coronawirusa. Dokelž je dowolene „z domjacym zwěrjećom“ na čerstwy powětr hić, su mnozy z kozu, swinjećom a samo kanarikom po puću, kaž nowinarjo rozprawjeja. Policija apeluje na rozum ludźi a warnuje jich před pospytami jebanstwa. W Španiskej knježi wot wčerawšeho kruty zakaz, dom wopušćić, štož płaći najprjedy raz 15 dnjow.

Kalawa (SN/JaW). Naležnosće Serbow w Braniborskej měli zamołwići wjele spěšnišo zwoprawdźeć. To žada sej předsydka frakcije Lěwicy w krajnym sejmje Kathrin Dannenberg, kaž braniborska Lěwica w medijowej zdźělence informuje. Zwurazniła je to krajna politikarka, kotraž je zdobom rěčnica za mjeńšinowu politiku swojeje frakcije, tele dny na zetkanju z předsydku a čłonku Rady za serbske naležnosće Braniborskeje Kathrin Šwjelinej a Utu Henšelowej w Kalawje.

„Trjebamy skónčnje koncept nastupajo posrědkowanje delnjoserbskeje rěče wot pěstowarnje hač k abiturje“, wuzbě­hny zapósłanča Dannenberg na dźěłowej rozmołwje. „Wšitcy na koncepće wob­dźěleni, na čole braniborske ministerstwo za kubłanje, młodźinu a sport, hibaja so po tempje kaž šlinki. Ze stron koalicije faworizowany wjacerěčny koncept za wšitke njeněmske rěče, kotrež abo w kotrychž na šulach wuwučuja, njeje žane narunanje“, lěwicarka Kathrin Danneberg jasnje potwjerdźi.