Berlin/Kabul (dpa/SN). Po nimale 20 lětach je najhórše a najdróše wukrajne zasa­dźenje w stawiznach Zwjazkoweje wo­bory nimo. Dźensa su poslednich němskich wojakow z Afghanistana z lětadłom domoj přiwjezli. Něhdy naj­wjet­še wojerske zepěranišćo Němskeje, camp Marmal, běchu do toho wurumowali a afghaniskim wěstotnym mocam přepodali. Wojakow su ze štyrjomi wojerskimi lětadłami transportowali. Poslednja mašina typa A400M wopušći afghaniski powětrowy rum wčera w 21.24 hodź.

Zwjazkowa zakitowanska ministerka Annegret Kramp-Karrenbauer (CDU) mjenowaše zasadźenje němskich wojakow w Afghanistanje „historiski kapitl“, při kotrymž je Zwjazkowa wobora „wu­žadacy nadawk spjelniła“.

59 němskich wojakow je w Afghanistanje žiwjenje přisadźiło, 35 při nad­padach a wojowanjach. Wojerske zasadźenje je wjace hač dwanaće miliardow eurow płaćiło. Spočatnje jako měrowa misija planowane bě so wone spěšnje na bo­jowe zasadźenje přećiwo militantnym talibanam wuwiło. Naposledk běchu němscy wojacy jako wukubłarjo afgha­niskich wojakow zasadźeni.

Rom (dpa/SN). Zwjazkowy wonkowny minister Heiko Maas (SPD) je za jutře planowane zběhnjenje pawšalneho warnowanja před jězbami do wukraja zakitował. „Čas pawšalnych posudkow dyrbi nimo być“, rjekny Maas na kromje zetkanja wonkownych ministrow skupiny G20 w italskim měsće Matera. „Tam, hdźež je wuwiće pozitiwne, njeje žaneje přičiny restrikcije dlěje wobchować.“

Zwjazkowe knježerstwo bě před tydźenjomaj wobzamknyło, warnowanja před pućowanjemi za wšitke rizikowe kónčiny z mjenje hač 50 nowymi korona-natyknjenjemi na 100 000 wobydlerjow 1. julija zběhnyć. To płaći za wjace hač 80 krajow swěta. Nimo toho nochce němske knježerstwo wjace wot turistiskich jězbow do wukraja wotradźeć. Kraje kaž Italsku, Awstrisku, Grjeksku a wulke dźěle Španiskeje nastupajo wšak prosy ludźi wo „wosebitu kedźbnosć“.

Warnowanje před jězbami do wukraja płaći jenož hišće za kraje z wulkim podźělom wirusowych wariantow, kaž za Wulku Britanisku, Portugal a Rusku.

Wěsće hišće, kak je so zasadźenje Zwjazkoweje wobory w Afghanistanje zapo­čało? Po terorowych nadpadach w New Yorku 11. septembra 2001 bě tehdyši prezident USA George W. Bush Afghanistan nadpadnyć dał, dokelž běchu kraj jako žórło terorizma identifikowali. Němska so po wobzamknjenju zwjazkoweho sejma na iniciatiwu tehdyšeho knježerstwa SPD a Zelenych ze zwjazkowym kanclerom Gerhardom Schröderom (SPD) kónc samsneho lěta přizamkny. Sčasami bě hač do 5 300 němskich wojakow w Afghanistanje zasadźenych. Njezapomnite je tež wuprajenje tehdyšeho zakitowanskeho ministra Petera Strucka (SPD), zo „wěstotu Němskeje tež pod Hindukušom zakituja“. Po 20 lětach z 59 mortwymi němskimi wojakami a dwanaće miliardami wudatych eurow je akcija skónčena. Fachowcy nałožowane mocy a wužitk zasadźenja zawěsće pruwuja. Tak derje kaž wěste pak je, zo talibanojo bórze zaso do afghaniskeje stolicy Kabula zaćahnu. Marko Wjeńka

Awto zemrěteje britiskeje princesny Diany je muzej w Chile kupił. Ford Escort bě na wčerawšim internetnym přesa­dźo­wanju přeličene 61 145 eurow wunjesł. Diana bě awto 1981 jako dar k slubej wot princa Charlesa dóstała a wopytowaše jeho­ z Fordom často k polo-hram. Pozdźišo wona awto fanej předa. Diana, ko­traž­ bě 1997 při njezbožu z awtom w Parisu žiwjenje přisadźiła, by jutře, 1. julija, 60. narodniny swjećiła.

Njewšědna spowědź: Njeznaći paduši su cyrkwi w Dormagenje swoju rubiznu wróćili a so z listom pola wosady zamołwili. Kaž policija zdźěli, běchu paduši mi­nje­ny tydźeń swěčnik a jedyn z wo­bra­zow křižoweho puća pokradnyli. Woboje ležeše nětko derje zapakowane zhromadnje z listom před cyrkwju. Pakostnikaj prosytaj wo wodaće za njeskutk, kotryž „sta so pod šwarnym wliwom alkohola“. Policija jeju nětko prosy, so tež pola njeje wosobinsce „wuznać“, štož móhło jimaj při chłostanskim jednanju pomhać.