Do lětušeho łapanja kokota wótře wo přichodźe nałožka diskutowali

Budyšin/Choćebuz (SN/mb). 600 milionow honačikow kóžde lěto w Němskej zarězaja. Hdyž pak 20 kokotow za serbski nałožk łapanja kokota swoje žiwjenje přisadźi, je to pozdatnje towaršnostny skandal. Přichodny kónc tydźenja so lětuša sezona w Barbuku a Bórkowach zahaji, kotraž so 27. septembra ze superkokotom w Popojcach zakónči. Hdyž su škitarjo zwěrjatow zašłe lěta přećiwo „wurubjenju ćěłow“ polemizowali a jich najwažniša organizacija PETA prawidłownje kampanje w medijach přećiwo serbskemu nałožkej wjedźeše, je lědma štó z tym ličił, zo so to praktisce wuskutkuje. Tola na njedawnym posedźenju krajneho sejma w Podstupimje warnowaše předsyda braniborskeje serbskeje rady, Marcus Końcaŕ, zo móhli so nałožki z prawniskich přičin zhubić.