Sobustawojo sportoweho towarstwa Marijina hwězda Pančicy-Kukow su so njedawno we wjacezaměrowym domje při sportnišću zetkali, zo bychu swoju hłownu a wólbnu zhromadźiznu přewjedli.
Enrico Kral zhromadźiznu wustojnje a konstruktiwnje nawjedowaše. Na spočatku poda pokładnica Susan Kubicowa přehlad wo aktualnym stawje towarstwoweje kasy. Při tym wona naspomni, zo drje su zašłe lěto někotre wjetše wudawki měli, zo pak ma towarstwo hišće pjenježne rezerwy.
Po tym předstajichu jednotliwe sportowe wobłuki swoju lětnu bilancu. Wosebje wjesela so w Pančicach nad wutworjenjom dweju noweju wobłukow. To stej pućowanje a badminton. Mjez wolejbulistami maja tójšto dorosta, tak zo chcedźa tam w přichodźe samo dalšu, třeću skupinu wutworić.
